ដោយវុត្ថា
បាត់ដំបងៈ ខេត្តបាត់ដំបងកំពុងកសាង កែលម្អជាបន្តនូវហេដ្ឋានរចនាសម្ព័ន្ធ សំដៅប្រែក្លាយទឹកដីខេត្តបាត់ដំបង ឱ្យទៅជាខេត្តដែលមានបរិស្ថានបៃតងស្រស់បំព្រង និងផាសុខភាព សក្តិសមជាខេត្តទទួលជ័យលាភីផ្ការំដួលបីទង។
លោក ងួន រតនៈ អភិបាល នៃគណៈអភិបាលខេត្ត នៅក្នុងកិច្ចប្រជុំពិភាក្សាត្រៀមរៀបចំពិធីបុណ្យទន្លេលើក៦ នៅខេត្តបាត់ដំបង នាថ្ងៃទី ២៧ ខែមករា ឆ្នាំ ២០២០នេះឱ្យដឹងថា ការកែលម្អនូវហេដ្ឋានរចនាសម្ព័ន្ធនៅទូទាំងខេត្តនេះ គឺដើម្បីប្រែខេត្តបាត់ដំបងជាមជ្ឈមណ្ឌលប្រមូលផ្តុំ ពាណិជ្ជកម្ម សេដ្ឋកិច្ច ទេសចរណ៍ វប្បធម៌ និងទាក់ទាញអ្នកទេសចរណ៍ឱ្យចង់មករស់នៅ ចង់មកកំសាន្តប្រកបមុខរបរ នោងធ្វើវិនិយោគផងដែរ ។
លោក ថោង ខុន រដ្ឋមន្ត្រីក្រសួងទេសចរណ៍ឱ្យដឹងដែរថា ខេត្តបាត់ដំបង ជាខេត្តមួយ ដែលមានដងស្ទឹងសង្កែ មានកេរ្តិ៍ឈ្មោះល្បីល្បាញ ហើយប្រជាពលរដ្ឋចំនួនស្គាល់ខេត្តបាត់ដំបងតាមរយៈបទចម្រៀង ដែលពាក់ព័ន្ធនឹងដងស្ទឹងសង្កែ ដ៏ស្រស់ស្អាតមួយនេះ។
លោកបន្តទៀតថា យោងតាមអនុសាសន៍សម្តេច អគ្គមហាសេនាតេជោបានមានប្រសាសន៍ថា ខេត្តណា ដែលប្រភពទឹកហូរចាក់ទៅទន្លេ ត្រូវធ្វើការរៀបចំពិធីបុណ្យ ដូចដែលយើងធ្លាប់កន្លងមក។ ការរៀបចំប្រព្រឹត្តិការណ៍ពិធីបុណ្យទន្លេ លើកទី៦ នៅក្នុងក្រុងបាត់ដំបង ខេត្តបាត់ដំបងបានរៀបចំកម្មវិធីនីមួយៗ ក្នុងអបអរសាទរពិធីបុណ្យទន្លេ រួមមាន ការសម្តែងសិល្បៈ កម្មវិធីកីឡា ការរៀបចំតាំងពិព័ណ៌ផលិតផលក្នុងខេត្ត ការរៀបចំវិថីមុខម្ហូបខ្មែរផងដែរ។
ខេត្តបាត់ដំបង នឹងរៀបចំពិធីបុណ្យទន្លេលើកទី៦ រយៈពេល៣ថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែមីនា ឆ្នាំ២០២០ខាងមុខ ដោយព្រឹត្តិការណ៍នេះ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តព្រឹទ្ធបណ្ឌិតប៊ុន រ៉ានី ហ៊ុន សែន នឹងអញ្ជើញជាអធិបតីដ៏ខ្ពង់ខ្ពស់ពិធីបើកបុណ្យទន្លេនេះផងដែរ៕
