ដោយ Donald Lee
ភ្នំពេញៈ រដ្ឋាភិបាលអារ៉ាប់ប៊ីសាអូឌីត គ្រោងនឹងវិនិយោគទឹកប្រាក់រាប់ពាន់លានដុល្លារក្នុងការរៀបចំ ដើម្បីប្រែក្លាយរដ្ឋធានីរីយ៉ាដឱ្យទៅជា “មាតុធានីដ៏ធំបំផុត” នៅមជ្ឈឹមបូព៌ា។
បច្ចុប្បន្នទីក្រុងនេះ មានប្រជាជនមានចំនួន៧លាននាក់ និងរាប់រយរាប់ពាន់នាក់នៃប្រជាជនថ្មីមកតាំងទីលំនៅក្នុងទីក្រុងជារៀងរាល់ឆ្នាំ។
លោក Fahd Al-Rasheed ប្រធានគណៈកម្មការរាជសម្រាប់ទីក្រុងរីយ៉ាដ បានថ្លែងប្រាប់សារព័ត៌មានអារ៉ាប់ នៅទីក្រុងដាវ៉ូសកាលពីសប្តាហ៍មុនថា “យើងកំពុងបន្ថែមប្រជាជនចំនួន៣០ម៉ឺននាក់ ក្នុងមួយឆ្នាំរួចទៅហើយ”។
លោកបានបន្ថែមថា “វាជាគម្រោងដ៏គួរឱ្យរំភើបមួយពីព្រោះវាតំណាងឱ្យអនាគតនៃព្រះរាជាណាចក្រនេះ”។
អាជ្ញាធរផែនការរបស់អារ៉ាប់ប៊ីសាអូឌីត បានបញ្ជាក់ថា គម្រោងធំៗចំនួន៤២៤ គម្រោងកំពុងដំណើរការនៅក្នុងរដ្ឋធានីនេះ ដែលមានតម្លៃសរុប៥៥ពាន់លានដុល្លារ។
ការវិនិយោគហេដ្ឋារចនាសម្ព័ន្ធដ៏ធំ បានកើតឡើងនៅពេល ដែលព្រះរាជាណាចក្រនេះ ខិតខំប្រឹងប្រែងធ្វើពិពិធកម្មសេដ្ឋកិច្ចរបស់ខ្លួនពីការពឹងផ្អែកលើប្រេង។
ចំនួនប្រជាជននៅទីក្រុងរីយ៉ាត ដែលត្រូវបានបង្កើតឡើងក្នុងឆ្នាំ១៩៣២ បានកើនឡើងយ៉ាងខ្លាំង ក្នុងរយៈពេល២០ឆ្នាំចុងក្រោយនេះ ដោយសារសេដ្ឋកិច្ចបានកើនឡើង ហើយតម្លៃប្រេងនៅតែបន្តកើនឡើង។
ក្រុមហ៊ុនអារ៉ាប់ប៊ីសាអូឌីតAramco ដែលជាក្រុមហ៊ុនផលិតប្រេងឆៅធំជាងគេបំផុត និងជាអ្នករកប្រាក់ចំណេញធំបំផុតរបស់ពិភពលោក បានបង្ហាញការផ្តល់ការបោះហ៊ុន ជូនជាសាធារណៈលើកដំបូង នៅលើផ្សារភាគហ៊ុនTadawul ដែលមានមូលដ្ឋាននៅទីក្រុងរីយ៉ាដ។
យោងតាមក្រុមហ៊ុន Goldman Sachs Groupបានឱ្យដឹងថា តម្លៃភាគហ៊ុនចុងក្រោយរបស់ក្រុមហ៊ុន Aramco មានចំនួន២៩,៤ ពាន់លានដុល្លារជាមួយនឹងតម្លៃទីផ្សារ ១,៩ ទ្រីលានដុល្លារ ដែលធ្វើឱ្យក្រុមហ៊ុននេះ ក្លាយជាក្រុមហ៊ុនមានតម្លៃបំផុតក្នុងប្រវត្តិសាស្ត្រមនុស្ស។
បច្ចុប្បន្នក្រុមហ៊ុននេះ ធំជាងក្រុមហ៊ុនអេបផល និងហ្វេសប៊ុកបើទោះបូករួមបញ្ចូលគ្នាក៏ដោយ៕
