ដោយ Propertyarea.asia
ភ្នំពេញៈ ផ្សារហិរញ្ញវត្ថុ គឺជាស្ថាប័ន ដែលតាមរយៈនេះ មនុស្សម្នាក់ដែលមានបំណងសន្សំ អាចផ្គត់ផ្គង់មូលនិធិដោយផ្ទាល់ទៅមនុស្សម្នាកទៀតដែលត្រូវការខ្ចី។
ទីផ្សារហិរញ្ញវត្ថុសំខាន់បំផុត នៅក្នុងសេដ្ឋកិច្ចមានមចំនួន ទីផ្សារសញ្ញាប័ណ្ណ (Bond Market) និងទីផ្សារហ៊ុន (Stock Market)។
ឧទាហរណ៍៖ នៅពេលក្រុមហ៊ុន Intel ដែលជាក្រុមហ៊ុនយក្សផលិតឈីបកុំព្យូទ័រ ចង់ខ្ចីលុយ ដើម្បីធ្វើហិរញ្ញប្បទានដល់ការសាងសង់រោងចក្រថ្មីខ្លួន អាចខ្ចីដោយផ្ទាល់ពីសាធារណៈ។
ក្រុមហ៊ុនអាចធ្វើដូច្នេះបាន តាមរយៈការលក់សញ្ញាប័ណ្ណ។ សញ្ញាប័ណ្ណ (Bond) ជាប័ណ្ណនៃ ភាពជំពាក’បំណុល ដែលបញ្ជាក់អំពីកាតព្វកិច្ចរបស់អ្នកខ្ចី ចំពោះអ្នកកាន់សញ្ញាប័ណ្ណ។ និយាយឲ្យសាមញ្ញ សញ្ញាប័ណ្ណគឺ IOU ដែលមកពីពាក្យពេញថា “I owe you” និងមានន័យជា ខេមរភាសាថា “ខ្ញុំជំពាក់អ្នក”។
វាបង្ហាញអំពីពេលវេលា ដែលប្រាក់កម្ចីនឹងត្រូវបានសង ដែលហៅថា កាលវសាន្ត (Day of maturity) និងអត្រាការប្រាក់ ដែលនឹងត្រូវបានសងជាទៀងទាត់រហូតដល់ថ្ងៃកំណត់សងប្រាក់កម្ចីទាំងអស់។
អ្នកទិញសញ្ញាប័ណ្ណផ្តល់លុយរបស់ខ្លួនទៅឲ្យ Intel ជាថ្នូរទៅនឹងការសន្យារបស់ក្រុមហ៊ុន ដែលថានឹងផ្តល់ការប្រាក់ និងសងផ្តាច់ព្រាត់ (Eventual repayment)នូវចំនួនទឹកប្រាក់ដែលបានខ្ចី ឬប្រាក់ដើម (Principal)។ អ្នកទិញអាចកាន់កាប់សញ្ញាប័ណ្ណរហូតដល់ថ្ងៃកំណត់សង ឬអាចលក់វាមុនកាលកំណត់ទៅឲ្យនណាម្នាក់ផ្សេងទៀតក៏បាន៕
