រដ្ឋាភិបាលអូស្ត្រាលី បើកពង្រីកទីផ្សារស្វាគមន៍កម្ពុជាដើម្បីពង្រឹងទំហំពាណិជ្ជកម្មប្រទេសទាំង២

ស្ថាប័នសំខាន់ៗ ដែលជាគោលដៅក្នុងកិច្ចបង្កើតប្រតិបត្តិការរួមគ្នាជាមួយភាគីរដ្ឋាភិបាលអូស្ត្រាលី រួមមានដូចជាក្រសួងសេដ្ឋកិច្ចនិងហិរញ្ញវត្ថុ លើវិស័យពន្ធដារ ក្រសួងរ៉ែនិងថាមពល ក្រសួងសាធារណការ និងដឹកជញ្ជូន ក្រសួងសុខាភិបាល ក្រសួងមហាផ្ទៃ ក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រសួងការពារជាតិផងដែរ។ អូស្ត្រាលី បើកចំហជូនប្រជាជនកម្ពុជា ទៅធ្វើទស្សនកិច្ច ដើម្បីវិនិយោគ ក៏ដូចជាទៅបន្តការសិក្សានៅទីនោះផងដែរ។

សម្តេច តេជោ ហ៊ុន សែន បានស្វាគមន៍ចំពោះវត្តមាននៃការមកដល់ និងយល់ស្របចំពោះការលើកឡើងរបស់លោកឯកអគ្គរដ្ឋទូតថ្មីរូបនេះ ។ សម្ដេច តេជោ បានបន្ដថា កម្ពុជា និងអូស្ត្រាលី មានទំនាក់ទំនងលើច្រើនវិស័យ ជាមួយនឹងស្ថាប័ន និងស្ថាប័នជាដើម ហើយក៏មានទំនាក់ទំនងជាពិសេសផងដែរ ក្នុងក្របខ័ណ្ឌអង្គការសហប្រជាជាតិ ក្របខ័ណ្ឌអាស៊ាន ក្របខ័ណ្ឌអាស៊ីបូព៌ា ក៏ដូចជាដៃគូ កិច្ចសហប្រតិបត្តិការគ្រប់ជ្រុងជ្រោយផងដែរ។

ជាងនេះទៅទៀត អូស្ត្រាលី ក៏មានកិច្ចសហប្រតិបត្តិការទ្វេភាគីពិសេសជាច្រើន ដូចជាបានជួយដល់កម្ពុជាក្នុងការស្វែងរកសុខសន្តិភាព និងការផ្តល់ជំនួយជាថវិការជាបន្តបន្ទាប់ ជាក់ស្ដែងក្នុងរយៈពេល៤ឆ្នាំចុងក្រោយនេះ រដ្ឋាភិបាលអូស្ត្រាលីបានផ្តល់ជាជំនួយប្រមាណជាង២២៣លានដុល្លារ ក្នុងការអភិវឌ្ឍសេដ្ឋកិច្ចជាតិ៕