ដោយវុត្ថា
ភ្នំពេញ៖ សមាគមអ្នកវាយតម្លៃ និង ភ្នាក់ងារអចលវត្ថុកម្ពុជា នឹងរៀបចំ “សន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០” ដែលនឹងប្រព្រឹត្តនៅ ថ្ងៃព្រហស្បតិ៍ ទី៣០ ខែមករា ឆ្នាំ២០២០ ខាងមុខនេះ ដោយមានអ្នកចុះឈ្មោះចូលរួមប្រមាណជាង ២០០ នាក់។
ប្រធានសមាគមអ្នកវាយតម្លៃ និង ភ្នាក់ងារអចលវត្ថុកម្ពុជា លោក ច្រឹក សុនីម បានឱ្យដឹងតាមទូរស័ព្ទនៅថ្ងៃទី ២៨ ខែមករា ឆ្នាំ ២០២០ នេះ ឱ្យដឹងថា គោលបំណងនៃសន្និបាតនេះ ធ្វើឡើងដើម្បីបូកសរុបនូវសមិទ្ធផល និងភាពជោគជ័យរបស់សមាគមដែលបានធ្វើក្នុងរយៈពេលកន្លងមក និងដាក់ទិសសម្រាប់ឆ្នាំបន្តទៀត។
លោកបន្តថា ភាពជោគជ័យរបស់សមាគមមកដល់ពេលនេះមានសមាជិកចំនួន ១០៧ ក្រុមហ៊ុនពោលគឺកើនប្រមាណ ១៥ ភាគរយ ។លោកបន្តថា ការកើនឡើងនេះ ដោយសារតែសមាគមន៍បានផ្តល់នូវសហគមន៍ដ៏ធំមួយពាក់ព័ន្ធនឹងការគ្រប់គ្រងលើមុខរបររកស៊ីក្នុងវិស័យអចលនទ្រព្យជាប្រចាំថ្ងៃដោយផ្តោតលើកម្មវិធីបណ្តុះបណ្តាល និងចែករំលែកបទពិសោធន៍ផ្សេងៗ។
លោកថាបន្ថែមថា នៅក្នុងសមាគម មានការរៀបចំធ្វើកម្មវីបណ្តុះបណ្តាលជារៀបរាល់ខែ ដើម្បីចែករំលែកបទពិសោធទៅលើការគ្រប់គ្រងភ្នាក់ងារ វាយម្លៃ និង គ្រប់គ្រងការងារនៅក្នុងក្រុមហ៊ុនរបស់សមជិក និងក្រុមហ៊ុនដែលចូលជាសមាជិកថ្មីៗដើម្បីឱ្យពួកគេមានជំនាញ និងបទពិសោធ។
លោកបន្ថែមថា ម្យ៉ាងទៀត សារៈសំខាន់នៃការចូលជាសមាជិកនេះ គឺផ្តល់ឪកាសឱ្យមានការទំនាក់ទំនងជាសកល ទាំងក្នុងស្រុក និងក្រៅស្រុក ទាំងនៅក្នុងតំបន់អាស៊ាន និងអឺរ៉ុប ជាពិសេសនៅក្នុងប្រទេសអាមេរិកដែលពួកគេអាចមានឪកាសទំនាក់ទំនងរកស៊ី និងធ្វើដំណើរទៅកាន់បណ្តាប្រទេសទាំងនោះបាន។
បន្ថែមពីនេះ សមាគម ក៏បានផ្តល់នូវការបណ្តុះបណ្តាលទៅដល់សមាជិកតាមរយៈដោយប្រយោល និងដោយផ្ទាល់ និងមិនត្រឹតែប៉ុណ្ណោះអ្នកចូលជាសមាគមន៍គឺមានឪកាសប្រើប្រាស់ស្លាកសញ្ញារបស់សមាគមដើម្បីបង្កើននូវទំនុកចិត្តជាមួយនឹងអថិតិជនផងដែរប្រកបដោយវិជ្ជាជីវៈ ។
លោកថា សម្រាប់ឆ្នាំ ២០២០នេះតទៅ សមាគមនឹងគៀងគរសមាជិកថ្មីៗបន្ថែមទៀត ព្រមជាមួយនឹងបង្ហាញពីអត្ថប្រយោជន៍នានានៅពេលក្លាយជាសជិក ដើម្បីឱ្យជាកម្លាំងដ៏រឹងមាំមួយ និងជាកន្លែងបណ្តុះបណ្តាល និងចែករំលែកបទពីសោធន៍ពីអ្នកមានជំនាញ ទៅកាន់អ្នកដែលមិនទាន់មានជំនាញ តាមរយៈបង្កើតឱ្យមានសិក្ខាសាលា ឱ្យបាន ៥ដងក្នុងមួយឆ្នាំ ជាលក្ខណៈជាតិ ជាពិសេសនឹងរៀបចំឱ្យមានការជួបជុំសមាជិកឱ្យបាន ៤ ដង ព្រមទាំងឱ្យមានការជួបជុំជាលក្ខណៈអន្តរជាតិ ។
មិនត្រឹមតែប៉ុណ្ណោះ សមាគមនឹងខិតខំបង្កើតភ្នាក់ងារវាយតម្លៃ ឱ្យដល់ ១០០០ នាក់នៅក្នុងឆ្នាំ ២០២០ នេះ។ គោលដៅនេះ គឺដើម្បីកាត់បន្ថយភាពក្រីក្ររបស់ភ្នាក់ងារតាមរយៈបណ្តុះបណ្តាលឱ្យមានវិជ្ជាជីវៈ និងប្រកបដោយក្រមសីលធម៌ខ្ពស់។
លោកក៏បានអំពាវដល់ក្រុមហ៊ុនដែលមិនទានបានក្លាយជាសមាជិករបស់សគមន៍គួរតែចូលរួមដើម្បីទទួលបាននូវចំណេះដឹង និងបទពិសោធន៍ច្បាស់ប្រកបដោយវិជ្ជាជីវៈ និងក្រមសីលខ្ពស់ក្នុងការរកស៊ីក្នុងវិស័យអចលនទ្រព្យ ដែលកំពុងមានការរីកចំរើននាពេលបច្ចុប្បន្ន និងទៅអនាគត៕
