ដោយ Donald Lee
ភ្នំពេញ៖ រដ្ឋាភិបាលជប៉ុននឹងបញ្ជូនយន្ដហោះឯកជនទៅទីក្រុង Wuhan ក្នុងប្រទេសចិននាល្ងាចនេះដើម្បីជួយសង្គ្រោះជនជាតិរបស់ខ្លួន អំឡុងពេលការផ្ទុះវីរុសថ្មីនេះ។
រដ្ឋាភិបាលជប៉ុនបានទទួលការអនុញ្ញាតពីទីក្រុងប៉េកាំងរួចហើយដើម្បីជម្លៀសប្រជាជនចំនួន ៦៥០ នាក់ដែលស្នើសុំការធ្វើមាតុភូមិនិវត្តន៍។
រដ្ឋមន្រ្តីក្រសួងការបរទេសជប៉ុន Toshimitsu Motegi បានប្រាប់អ្នកយកព័ត៌មានថា “យើងបានរៀបចំចប់សព្វគ្រប់ហើយ ហើយភាគីចិនបានទំនាក់ទំនងមកយើងថា ពេលនេះត្រៀមខ្លួនទទួលយកជើងហោះហើរជាលក្ខណៈតែមួយ។ ការរៀបចំត្រូវបានធ្វើឡើងដើម្បីធានាការដឹកជញ្ជូនទៅកាន់អាកាសយានដ្ឋាន”។
ការហោះហើរឯកជនលើកដំបូងនឹងដឹកជញ្ជូនការផ្គត់ផ្គង់វេជ្ជសាស្រ្ត ដូចជាម៉ាស និងសម្លៀកបំពាក់ការងារការឆ្លងពីជំងឺសម្រាប់អាជ្ញាធរចិន ហើយនឹងអាចយកជនជាតិជប៉ុន ២០០ នាក់ត្រឡប់ទៅកាន់ប្រទេសជប៉ុនវិញ។
ក្រុមគ្រូពេទ្យ និងមន្ដ្រី នឹងនៅលើយន្ដហោះដើម្បីត្រួតពិនិត្យសុខភាពរបស់ជនជាតិជប៉ុន ហើយប្រសិនបើពួកគេចាំបាច់ ត្រូវដាក់ឱ្យនៅដាច់ពីគេ។
ផ្សារហ៊ុននៅទូទាំងតំបន់អាស៊ីប៉ាស៊ីហ្វិកកំពុងធ្លាក់ចុះ ដោយសារវីរុស Corona ដូចដែលទិន្នន័យថ្មីបានចេញផ្សាយកាលពីថ្ងៃ អង្គារ បង្ហាញថា មនុស្សជាង ១០០ នាក់បានស្លាប់នៅក្នុងប្រទេសចិន និងជាង ៤ ៥០០ នាក់បានឆ្លងវីរុសនេះនៅទូទាំងពិភពលោក៕
