ដោយស៊ីវ ម៉េង
ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា បានប្រកាសជាផ្លូវការនូវកិច្ចប្រជុំកំពូលមេដឹកនាំអាស៊ី អឺរ៉ុប ដែលកម្ពុជាមានកិត្តយសធ្វើម្ចាស់ផ្ទះជាលើកដំបូង។
សម្តេចតេជោ ហ៊ុន សែនបានថ្លែងក្នុងពិធីបិទសន្និបាតការងារក្រសួងការបរទេសឆ្នាំ២០១៩ និងលើកទិសដៅឆ្នាំ២០២០នាព្រឹកថ្ងៃទី៣១ មករានេះថា ការធ្វើជាម្ចាស់ផ្ទះនៃកិច្ចប្រជុំ ដែលនឹងប្រមូលផ្តុំមេដឹកនាំពី៥១ប្រទេស និងប្រធានស្ថាប័នតំបន់២ ព្រមជាមួយការចាត់តាំងរៀបចំ ព្រឹត្តិការណ៍ចំនួន៧ទៀតនោះ ទាមទារកិច្ចប្រឹងប្រែងថ្នាក់ជាតិ ដើម្បីដោះស្រាយបញ្ហាភស្តុភារ ហរិញ្ញវត្ថុ បច្ចេកទេស ទីតាំង ពិធីការ និងការធានាសន្តិសុខខ្ពស់បំផុត។
សម្តេចបានថ្លែងបញ្ជាក់ថា “កម្ពុជាប្តេជ្ញានឹងសម្រេចកិច្ចការនេះ ប្រកបដោយកិត្តិយស និងជោគជ័យ”។
សម្តេចតេជោ ហ៊ុន សែន ប្រកាសជាផ្លូវការនូវការទទួលធ្វើជាម្ជាស់ផ្ទះនៃកិច្ចប្រជុំកំពូលអាស៊ី–អឺរ៉ុបលើកទី១៣ ដែលនឹងប្រព្រឹត្តទៅនៅថ្ងៃទី១៦ និង១៧ខែវិច្ឆិកា ឆ្នាំ២០២០ នៅរាជធានីភ្នំពេញ៕
