ដោយ ប៊ី
ភ្នំពេញៈ ក្រុមហ៊ុន SCG ទទួលបានចំណូល ពីការលក់នៅទីផ្សារកម្ពុជាមានចំនួន ៤៥១លានដុល្លារក្នុងឆ្នាំ២០១៩ ខណៈក្រុមហ៊ុននេះសម្រេចការលក់បានប្រហែល១១៤ លានដុល្លារក្នុងត្រីមាសទី៤ ឆ្នាំ ២០១៩។
គិតត្រឹមថ្ងៃទី ២៩ ខែមករាឆ្នាំ ២០១៩ ទ្រព្យសម្បត្តិសរុបរបស់ក្រុមហ៊ុន SCG មានចំនួនជាង២១ពាន់លានដុល្លារ ខណៈពេលដែលទ្រព្យសកម្មសរុបរបស់ក្រុមហ៊ុន SCG នៅអាស៊ាន (មិនរាប់បញ្ចូលប្រទេសថៃ) មានចំនួន៧,៥៨៤លានដុល្លារ ដែលស្មើនឹង ៣៦ភាគរយនៃទ្រព្យសម្បត្តិសរុបរបស់ក្រុមហ៊ុន SCG។
ក្រុមហ៊ុន SCG គឺជាក្រុមហ៊ុនដ៏ធំមួយ ដែលវិនិយោគនៅក្នុងការផលិតស៊ីម៉ងត៍នៅក្នុងប្រទេសកម្ពុជា។ ក្រុមហ៊ុនស៊ីម៉ងត៍កំពត ត្រូវបានបង្កើតឡើងនៅក្នុងខែមករា ឆ្នាំ២០០៨ ដែលជាការវិនិយោគរួមគ្នារវាងក្រុមហ៊ុនSCGរបស់ថៃ ដោយកាន់ភាគហ៊ុនចំនួន ៩០ភាគរយ និងក្រុមហ៊ុនក្នុងស្រុកខូវ ជូលីគ្រុប។
ក្នុងរយៈពេលដំបូង ក្រុមហ៊ុននេះសមត្ថភាពផលិតប្រចាំឆ្នាំរបស់ខ្លួន មានចំនួនប្រហែល ១,១លានតោន។ ក្រុមហ៊ុន SCG បានវិនិយោគទំហំទឹកប្រាក់ចំនួន១២០លាន ដុល្លារសហរដ្ឋអាមេរិក ក្នុងខ្សែសង្វាក់ផលិតកម្មលើកទី២ ដែលមានសមត្ថភាពផលិតប្រចាំឆ្នាំបានចំនួន ៩០០.០០០តោន ជាចំនួនដែលបានចាប់ផ្តើមប្រតិបត្តិការកាលពីឆ្នាំ ២០១៦។
ក្រុមហ៊ុនSCG ដែលជាម្ចាស់ភាគហ៊ុនដ៏ធំ របស់ក្រុមហ៊ុនស៊ីម៉ងត៍កំពត បានបើកដំណើរការរោងចក្រទី៣ របស់ខ្លួនដែលមានទីតាំង ស្ថិតនៅក្នុងខេត្តបាត់ដំបងនៅឆ្នាំ ២០១៨៕
