ដោយវុត្ថា
ភ្នំពេញ ៖ លោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា បានចេញសេចក្តីសម្រេចស្តីពីការកែសម្រួលសមាសភាពគណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាខេត្តព្រះសីហនុ។
យោងតាមសេចក្តីសម្រេចដែលចុះហត្ថលេខាកាលថ្ងៃទី ៣០ ខែមករា ឆ្នាំ ២០២០ ដោយលោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា កន្លងមកនេះឱ្យដឹងថា សមាសភាពគណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាខេត្តព្រះសីហនុមាន ៣៦រូប ដោយក្នុងនោះលោក គួច ចំរើន អភិបាលខេត្តព្រះសីហនុ ធ្វើជាប្រធាន។
សេចក្តីសម្រេចដដែលបន្តថា គណៈកម្មកម្មាធិការគ្រប់គ្រង និងអភិវឌ្ឍតំបន់ឆ្នេសមុទ្រកម្ពុជា ខេត្តព្រះសីហនុ មានតួនាទី និងភាកិច្ច ដូចខាងក្រោម៖
១) រៀបចំផែនការសកម្មភាព កម្មវិធីការងារ និងគម្រោងផ្សេងៗ ដែលទាក់ទងនឹងការគ្រប់គ្រង និងការអភិវឌ្ឍតំបន់ឆ្នេរសមុទ្រខេត្តព្រះសីហនុ និងបញ្ជូនមក គ.អ.ឆ.ក ដើម្បីធ្វើសមាហរណកម្មជាមួយខេត្តផ្សេងទៀតនៃតំបន់ឆ្នេរសមុទ្រកម្ពុជា។
២) គ្រប់គ្រង អភិវឌ្ឍ និងអភិរក្សតំបន់ឆ្នេរសមុទ្រខេត្តព្រះសីហនុឱ្យចីរភាព និងសមធម៌ សក្តិសមជាសមាជិកក្លឹបឆ្នេរសមុទ្រដែលស្អាតបំផុតលើសកលលោក។
២)ពិនិត្យតាមដានសកម្មភាពនានាដែលកើតមាននៅតំបន់ឆ្នេរ និងចាត់វិធានការចាំបាច់ ដើម្បីទប់ស្កាត់រាល់សកម្មភាពអសកម្មទាំងឡាយ ដែលអាចប៉ះពាល់ដល់បរិស្ថាន និងធនធានធម្មជាតិនៅតំបន់ឆ្នេរសមុទ្រខេត្តព្រះសីហនុ។
៣) ចូលរួមពិនិត្យ និងផ្តល់យោបល់ជូន មក គ.អ.ឆ.ក នៅពេលមានសំណូមពរពី គ.អ.ឆ.កចំពោះសំណើសុំវិនិយោគពាក់ព័ន្ធលើឆ្នេសមុទ្រ និងចំណីឆ្នេរសមុទ្រ តំបន់រណប កោះ ដៃសមុទ្រ ស្ទឹង ព្រែក ផ្លូវទឹកដែលភ្ជាប់ទៅនឹងសមុទ្រ និងផ្ទៃទឹកដែលនៅជាប់នឹងឆ្នេរសមុទ្រខេត្តព្រះសីហនុ។
៤) ធ្វើជាសេនាធិការឱ្យ គ.អ.ឆ.ក ក្នុងការពិនិត្យ តាមដាន និងសម្របសម្រួលរាល់សកម្មភាពដែលកំពុងអនុវត្ត គ្រោងនឹងអភិវឌ្ឍរបស់ក្រសួង សា្ថប័ន រដ្ឋបាលថ្នាក់ក្រោមជាតិ អង្គការជាតិ និងអន្តរជាតិ អង្គការក្រៅរដ្ឋាភិបាល សង្គមស៊ីវិលនានា និងផ្នែកឯកជនដែលមាននៅតាមតំបន់ឆ្នេរសមុទ្រខេត្តព្រះសីហនុ ដើម្បីឱ្យការងារមានភាពរលូន ប្រកបដោយប្រសិទ្ធិភាព និងធានបាននូវនិរន្តរភាព ។
និងធ្វើជាសេនាធិការឱ្យ គ.អ.ឆ.ក ក្នុងការបញ្រ្ជាបការយល់ដឹងដល់រដ្ឋបាលថ្នាក់ក្រោមជាតិ ផ្នែកឯកជន និងគ្រប់ភាគីពាក់ព័ន្ធ ឱ្យយល់ដឹងពីការអភិវឌ្ឍតំបន់ឆ្នេរខេត្តព្រះសីហនុ ជាដើម។ល៕
