ដោយវុត្ថា
ភ្នំពេញ៖ ក្រុមមន្ត្រីនៃរារដ្ឋាភិបាលកម្ពុជា បានចុះពិនិត្យការដ្ឋានសាងសង់ផ្លូវជាតិលេខ១០ (អតីតផ្លូវលេខ ១៥៥១) និងផ្លូវជាតិលេខ៥៥ (កោះកុង បាត់ដំបង និងពោធិ៍សាត់)នាពេលដ៏ខ្លីខាងមុខនេះ។
ក្រុមមន្ត្រីចុះពិនិត្យការដ្ឋានសាងសង់ផ្លូវជាតិលេខ១០នាពេលខាងមុខនេះ
លោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន បានដឹកនំាមន្ត្រីខេត្តកោះកុង បាត់ដំបង និងពោធិ៍សាត់ ចុះពិនិត្យការដ្ឋានសាងសង់ផ្លូវជាតិលេខ១០ នេះ កាលពីថ្ងៃទី ៥ ខែកុម្ភៈ ឆ្នាំ ២០២០ ម្សិលមិញនេះ ដើម្បីបើកការដ្ឋានសាងសង់។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានឱ្យដឹងកន្លងមកនេះថា គម្រោងសាងសង់ថ្មីនូវផ្លូវជាតិលេខ១០ ចាប់ពីចំណុចវាលវែងខេត្តបាត់ដំបង់ ដល់ខេត្តកោះកុង នឹងចំណាយថវិកាជាង១៨៣លានដុល្លារ ដែលជាប្រាក់កម្ចីហិរញ្ញប្បទានពីចិន។
លោកបន្ដថា “គម្រោងសាងសង់ផ្លូវជាតិលេខ១០ ចំណាយថវិកា១៨៣លានដុល្លារ និងមានប្រវែង១៩៣គីឡូម៉ែត្រ ជាផ្លូវប្រភេទ DBST ។ ផ្លូវលេខ១០ ប្រជាពលរដ្ឋមកពីខេត្តបាត់ដំបង និងបន្ទាយមានជ័យ អាចដឹកទំនិញឆ្លងកាត់បាន” ។
លោករដ្ឋមន្ដ្រីបន្តទៀតថា នាពេលថ្មីៗនេះ មានអ្នកវិនិយោគស្នើសុំបង្កើតកំពង់ផែថ្មីនៅកោះកុងបន្ថែមទៀត ដូច្នេះផ្លូវជាតិលេខ១០ នឹងមានសកម្មភាពដឹកជញ្ជូនយ៉ាងច្រើន។
លោករដ្ឋមន្ដ្រីបន្ថែមថា ផ្លូវគឺជាសរសៃឈាម ដូច្នេះផ្លូវទាំងអស់នៅកម្ពុជានឹងបានចូលរួមកសាងប្រទេសជាតិ ជាពិសេសការដឹកទំនិញមានតម្លៃថោក និងចំណេញពេលវេលា។ លោកថា បើគ្មានហេដ្ឋារចនាសម្ព័ន្ធល្អនោះទេ គឺគ្មានអ្នកវិនិយោគមកកម្ពុជាឡើយ ៕
