ដោយវុត្ថា
ភ្នំពេញៈ យោងតាមប្រការ ៦ នៃប្រកាសលេខ ៤៩៣ សហវ.ប្រក ចុះថ្ងៃទី១៩ ខែកក្កដា ឆ្នាំ២០១០ស្ដីពីការ ប្រមូលពន្ធលើអចលនទ្រព្យបានឱ្យដឹងថា មូលដ្ឋានគិតពន្ធលើអចលនទ្រព្យ គឺជាតម្លៃអចលនទ្រព្យ ដែលត្រូវបានអនុញ្ញាតឱ្យ កាត់បន្ថយនូវទឹកប្រាក់ចំនួន១០០.០០០.០០០(មួយរយលាន)រៀល។
គេសង្កេតឃើញថា នេះជាការអនុគ្រោះលើកទី១ ប៉ុន្ដែវិធាននេះមិនត្រូវបានយកអនុវត្ដន៍ទេ ចាប់តាំងពីកាលបរិច្ឆេទនៃការចេញប្រកាសខាងលើមក។លុះមកដល់ថ្ងៃទី៥ ខែឧសភា ឆ្នាំ២០១១ ក្រសួងសេដ្ឋកិច្ច និងហិរញ្ញវត្ថុ បានបង្កើតប្រកាសមួយទៀត លេខ ៣៧១ សហវ.ប្រកស្ដីពី តម្លៃគិតពន្ធលើអចលនទ្រព្យ ក្នុងជំហ៊ានដំបូង មូលដ្ឋានសម្រាប់គិតពន្ធលើអចលនទ្រព្យ គឺ៨០(បែតសិប)ភាគរយ នៃតម្លៃអចលនទ្រព្យសរុប (ទាំងតម្លៃដីនិងតម្លៃសំណង) ដោយកាត់បន្ថយនូវទឹកប្រាក់ចំនួន ១០០.០០០.០០០ (មួយរយលាន)រៀល។
មូលដ្ឋានគិតពន្ធ = (តម្លៃអចលនទ្រព្យសរុប x ៨០%)-១០០.០០០.០០០ រៀល
រូបមន្គគណនាពន្ធ
ជាគោលការណ៍ ពន្ធលើអចលនទ្រព្យ tax on real property ត្រូវគណនាតាមរូបមន្ដ ដូចជា ពន្ធលើអចលនទ្រព្យ = មូលដ្ឋានគិតពន្ធ x អត្រាពន្ធ។ ពន្ធលើអចលនទ្រព្យ ត្រូវប្រមូលប្រចាំឆ្នាំតាមអត្រា ០.១% លើមូលដ្ឋានកំណត់ពន្ធ។
ពន្ធលើអចលនទ្រព្យ = [(តម្លៃអចលនទ្រព្យសរុប x ៨០%) – ១០០.០០០.០០០ រៀល] x ០.១% ។តម្លៃអចលនទ្រព្យសរុប បង្កើតឡើងដោយតម្លៃដីរួមផ្សំនឹងតម្លៃសំណង់៕
