ដោយ ហ្សូលី
សៀមរាបៈ បើតាមអាជ្ញាធរជាតិអប្សរាបានឱ្យដឹងថា ខេត្តសៀមរាបនឹងមានរៀបចំកម្មវិធីសៀមរាប សង្ក្រានជាថ្មីម្តងទៀតនៅក្នុងឆ្នាំ២០២០នេះ ដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ។
អាជ្ញាធរជាតិអប្សារា សហការជាមូយសហភាពសហព័ន្ធយុវជនកម្ពុជា ប្រចាំខេត្តសៀមរាប រដ្ឋបាលខេត្តសៀមរាប និងស្ថាប័នពាក់ព័ន្ធដទៃទៀត គ្រោងនឹងរៀបចំកម្មវិធីសង្ក្រានឆ្នាំថ្មីនេះ នៅបរិវេណប្រាសាទអង្គរវត្ត ដែលនឹងប្រព្រឹត្តទៅនៅថ្ងៃទី១៣ ដល់ថ្ងៃទី ១៦ ខែ មេសា ឆ្នាំ ២០២០។
សៀមរាបសង្ក្រានឆ្នាំថ្មីនេះ នឹងរៀបចំឡើងក្រោមប្រធានបទ« អង្គរ អតីតកាល បច្ចុប្បន្ន និងអនាគត» ដែលនឹងមានជាការតាំងពិពរណ៌បង្ហាញ ពីការកំណាយបុរាណវិទ្យា សមិទ្ធផលរបស់អាជ្ញាធរជាតិអប្សរា និងការអភិវឌ្ឍវិស័យទេសចរណ៍។
គោលដៅនៃកម្មវិធី សៀមរាបសង្ក្រាននេះ ប្រារព្ធឡើងដើម្បីលើកកម្ពស់សេដ្ឋកិច្ចនិងជីវភាពប្រជាជនក្នុងស្រុក ទាក់ទាញភ្ញៀវទេសចរណ៍ជាតិ-អន្តរជាតិ ឱ្យមកកម្សាន្តទស្សនាតំបន់រមណីយដ្ឋានអង្គរឱ្យកាន់តែច្រើន និងលើកកម្ពស់តម្លៃសិល្បៈខ្មែរ។
កម្មវិធីទាំងអស់នេះ នឹងផ្តល់ចំណេះដឹងដល់សាធារណជន ឱ្យបានស្គាល់ពីបច្ចេកទេសនៃការប្រើប្រាស់ ការកែច្នៃថ្មតាមបែបបុរាណនិងទំនើប ការព្យាបាលថ្ម ការសាងសង់ប្រាសាទខ្មែរ ផែនទីតំបន់អង្គរ និងការស្រាវជ្រាវបុរាណវិទ្យាជាដើម។
លើសពីនេះក៏មានការបញ្ចូលវប្បធម៌ ប្រពៃណីរបស់អ្នកស្រុកអង្គរ ការលេងល្បែងប្រជាប្រិយខ្មែរ ការដាក់តាំងបង្ហាញពីការដាប់ឆ្លាក់ចម្លាក់ សិប្បកម្ម ដូច្នេះសាធារណជន និងភ្ញៀវទេសចរជាតិ អន្តរជាតិអាចជាវយកទៅប្រើប្រាស់ និងជួយដល់ជីវភាពរបស់ប្រជាជនបានផងដែរ៕
