ដោយ ហ្សូលី
សៀមរាប៖ សណ្ឋាគារនៅខេត្តសៀមរាបប្រមាណជា ៧ភាគរយ បានផ្អាកអាជីវកម្ម ដោយការធ្លាក់ចុះភ្ញៀវទេសចរ អំឡុងពេលវីរុសកូរ៉ូណាកំពុងវាយលុកនៅប្រទេសចិន និងទូទាំងពិភពលោក។ នេះបើតាមការលើកឡើងរបស់ ឯកឧត្តម ទិត ចន្ថា រដ្ឋលេខាធិការ និងជាអ្នកនាំពាក្យក្រសួងទេសចរណ៍ ថ្លែងក្នុងសន្និសិទសារព័ត៌មាន ស្ដីពី «វឌ្ឍនភាព និងទិសដៅបន្ដការងារបន្ដរបស់ក្រសួងទេសចរណ៍» នាព្រឹកថ្ងៃទី០២ ខែមីនា ឆ្នាំ២០២០។
ឯកឧត្តម ទិត ចន្ថា បានមានប្រសាសន៍ថា « ផលប៉ះពាល់មកដល់ពេលនេះ បើនិយាយពីសណ្ឋាគារគឺមានតិចតួចទេ នៅខេត្តសៀមរាបមានការផ្អាកអាជីវកម្មខ្លះ ខ្លះក៏សុំផ្អាកដើម្បីធ្វើការជួសជុលកែលម្អដោយសារភ្ញៀវតិច អញ្ចឹងទៅគាត់ក៏យកឱកាសនោះដើម្បីធ្វើការកែលម្អ រៀបចំតែម្តងទៅ មានប្រហែលជា ៧% ក្នុងចំណោមសណ្ឋាគារ ភោជនីយដ្ឋាន យើងអត់រាប់ផ្ទះសំណាក់ទេ។»
