ដោយ ៖ រ៉ាណេត
កណ្ដាល ៖ ស្ថិតនៅក្នុងគម្រោងអភិវឌ្ឍន៍ក្រុងថ្មី ដីមាស សំរោងលើ ក្រោមការប្រឹក្សា និងផ្ដល់សេវាកម្មលក់ដោយក្រុមហ៊ុនជំនាញ KH Land ហាងកាហ្វេម៉ាកល្បីឈ្មោះ ARABITIA រួមជាមួយនឹងផាប់ភូមិយើង ដែលបានបើកសម្ពោធលក់ជាផ្លូវការកាលពីព្រឹកថ្ងៃទី២៤ ខែមីនា ឆ្នាំ២០២០នេះ បានទទួលការគាំទ្រពីសំណាក់អតិថិជនដែលជាប្រជាពលរដ្ឋ ក៏ដូចជាបណ្តាអ្នកជំនួញផ្នែកវិស័យដីធ្លីនៅក្នុងតំបន់យ៉ាងច្រើនកុះករ។
មានប្រសាសន៍នៅក្នុងពិធីបើកសម្ពោធដំណើការជាផ្លូវការ អ្នកគ្រប់គ្រងទូទៅនៃហាងកាហ្វេ ARABITIA អ្នកស្រី កានចាផុន ខាំសានូ (Kanjaphon Khamsanoh) បានមានប្រសាសន៍ ARABITIA ជាហាងកាហ្វេម៉ាកដ៏ល្បីឈ្មោះ ដែលមានប្រភពដើមមកពីប្រទេសថៃ និងទើបតែបានចូលមកកាន់ទីផ្សារកម្ពុ។ ជាក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែទទួលបានលទ្ធផលគួជាទីមោទនក្រោមការគាំទ្រពីសំណាក់អតិថិជនជាតិ និងអន្តរជាតិយ៉ាងច្រើន។ លោកស្រីបានបង្ហាញពីក្ដីរំពឹង និងជឿជាក់ថា “ជាមួយនឹងការបើកសម្ពោធដាក់ដំណើរការនៅក្នុងគម្រោងអភិវឌ្ឍន៍ក្រុងថ្មី ដីមាស សំរោងលើ ដែលស្ថិតនៅក្នុងឃុំសំរោងលើ ស្រុកអង្គស្នួល ខេត្តកណ្តាលនៅពេល ពិតជាទទួលបានការគាំទ្រច្រើនពីសំណាក់អតិថិជន ដែលក្រៅពីមានផ្ដល់ជូននួវកាហ្វេដែលមានរសជាតិឈ្ងុយឆ្ងាញ់ ថែមទាំងមានទីកន្លែងដ៏ស្រស់ស្អាតសមស្របទៅនឹងការអង្គុយជជែកពិភាក្សាការងារ និងមុខជំនួញយ៉ាងប្រសើរ ហើយក៏សូមថ្លែងអំណរគុណចំពោះក្រុមហ៊ុន KH land ដែលមានទំនុកចិត្ត និងផ្តល់ឱកាសដល់ហាងកាហ្វា ARABITIA ចូលមកកាន់គម្រោងទីមួយនៃសាខាខេត្តកណ្តាល”។
ម្ជាស់ហាងកាហ្វេ ARABITIAសាខានៅក្នុងគម្រោងក្រុងថ្មី ដីមាស សំរោងលើ លោក លោក ឡាយ វិនធីង បានមានប្រសាសន៍ថា “ការបើកសម្ពោធហាងកាហ្វេ នាថ្ងៃនេះ មិនមែនជាការចៃដន្យនោះឡើយ តែជាការខិតខំប្រឹងប្រឹងក្នុងការអភិវឌ្ឍន៍អាជីវកម្ម ដោយបានឆ្លងកាត់ការសិក្សារ វិភាគយ៉ាងស៊ីជម្រៅនិងច្បាស់លាស់ ដើម្បីបង្កើតអាជីវកម្មនេះឡើង ស្របតាមតម្រូវការទីផ្សារបច្ចុប្បន្ន និងអនាគត”។ លោកបន្តថា “ហាងកាហ្វេ Arabitia យើងនេះ កំពុងលេចរូបរាងឡើងយ៉ាងស្រស់ស្អាតមុនគេបង្អស់ ក្នុងចំណោមអាជីវកម្មសរុបចំនួន៨ ដូចជា ភោជនីយដ្ឋាន ម៉ាត ហ្វាម៉ាស៊ី សាឡន ហាងលក់ទំនិញ ហាងលក់សម្លៀកបំពាក់ ហាងកាហ្វេ និងផាប់។ ហាងកាហ្វេ Arabitia ក្រុងថ្មីដីមាសសំរោងលើនេះ មានកាហ្វេល្បីៗជាច្រើនប្រភេទនិងពេញនិយមដែលមានរសជាតិឆ្ងាញ់ពិសារ មានគុណភាព មានអនាម័យខ្ពស់ សេវាកម្មល្អពេញចិត្ត ដើម្បីបំរើជូនអតិថិជន។ ខ្ញុំសង្ឃឹមថា ហាងកាហ្វេ Arabitia និងផាប់ភូមិយើង នៃក្រុងថ្មីដីមាសសំរោងលើនេះ នឹងទទួលបានការគាំទ្រយ៉ាងខ្លាំងពីសាធារណៈជន”។
នៅក្នុងឱកាសនាពេលនោះ ម្ចាស់អាហារដ្ឋាន ផាប់ភូមិយើង ដែលត្រូវបានបើកសម្ពោធក្នុងពេលជាមួយគ្នានេះ លោក ម៉ាច ស៊ីមាន ក៏បានមានប្រសាសន៍ផងដែរថា “ការសម្រេចបើកសម្ពោធ ផាប់ភូមិយើង នៅពេលនៅជាឱកាសដ៏ល្អនិងស្ថិតនៅទីតាំងដ៏ល្អ និងមានសក្ដានុពល ដែលនឹងជួយជម្រុញឱ្យអាជីវកម្មទទួលបានជោគជ័យនៅពេលខាងមុខនេះជាក់មិនខាន”។ លោកបានបន្តទៀតថា “ផាប់ភូមិយើង គឺជាអាជីវកម្មបែបទាន់សម័យ ដែលស្របទៅនឹងកម្រិតជីវភាពរបស់នៅរបស់ប្រជាពលរដ្ឋនាពេលបច្ចុប្បន្ន ដែលទាំងការរៀបចំរចនាម៉ូដដ៏ស្រស់ស្អាត និងទាក់ទាញ មានទីធ្លាធំទូលាយ មានបរិក្ខាទំនើបៗ ដែលបំពាក់ទៅដោយប្រព័ន្ធការពារសុវត្ថិភាពខ្ពស់”។
លោក ម៉ាច ស៊ីមាន បានបន្តថា “តាមរយៈវត្តមាន ផាប់ភូមិយើង ដែលទើបសម្ពោធបើកដំណើរការនៅពេលនេះ នឹងចូលខ្លួនមកបម្រើអតិថិជនទៅលើសេវាម្ហូបអាហារ និងភេសជ្ជៈគ្រប់ប្រភេទពេលរាត្រី ក្រោមការប្រគំតន្ត្រីយ៉ាងពិរោះរណ្តុំ ដែលមានជាលើកដំបូងនៅក្នុងគម្រោងអភិវឌ្ឍន៍ ក្រុងថ្មី ដីមាស សំរោងលើ នៅលើផ្ទៃដីទំហំប្រមាណ៥០ហិកតា ជាមួយនឹងរំពឹងថា នឹងទទួលបានការគាំទ្រច្រើនពីសំណាក់អតិថិជននៅក្នុងតំបន់”។
តំណាងក្រុមហ៊ុន ខេអេច លែន ដែលជាក្រុមហ៊ុនប្រឹក្សាក្នុងការអភិវឌ្ឍន៍ និងទទួលសិទ្ធលក់នៅក្នុងគម្រោងអភិវឌ្ឍន៍ក្រុងថ្មីដីមាសសំរោងលើ លោក ជុន ជីម បានមានប្រសាសន៍ថា “ខ្ញុំពិតជាមានមោទនភាពបំផុតចំពោះវត្តមានអាជីវកម្មហាងកាហ្វេម៉ាកល្បី ARABITIA និង ផាប់ភូមិយើង បានចាប់បើកដំណើរស្របតាមផែនការយ៉ាងជោគជ័យនៅក្នុងគម្រោងអភិវឌ្ឍន៍ទីក្រុងថ្មី ដីមាស សំរោងលើ នៅពេលនេះ”។ លោកបានបន្តថា “បច្ចុប្បន្ននេះ គម្រោងអភិវឌ្ឍន៍ជាច្រើននៅ ទីក្រុងថ្មី ដីមាស សំរោងមាស កំពុងតែលេចរូបរាងឡើងជាបន្តបន្ទាប់ ដែលក្រៅពីអាជីវកម្មទាំង២សម្ពោធបើកដំណើរការនៅពេលនេះ នៅមានសំណង់អគារភោជនីយដ្ឋាន ម៉ាត សាឡន ហាងលក់ទំនិញ ហាងលក់សម្លៀកបំពាក់ រួមជាមួយនឹងគម្រោងអភិវឌ្ឍន៍សំណង់សំនៅដ្ឋាន តំបន់លំហែរកាយជាដើម ដែលការអភិវឌ្ឍជាបន្តបន្ទាប់នេះ ធ្វើឱ្យក្រុងថ្មី ដីមាស សំរោងលើ ក្លាយជាតំបន់ដ៏មានសក្ដានុពល និងមានភាពទាក់ទាញខ្ពស់”។
លោក ជុន ជីម បានបញ្ជាក់ថា “គម្រោងក្រុងថ្មី ដែលកំពុងលេចរូបរាងឡើងមួយនេះ ត្រូវបានហ៊ុព័ទ្ធទៅដោយឧស្សាហកម្មធំៗ ជាតំបន់ត្រីកោណសេដ្ឋកិច្ចពិសេស ដែលមានមុំសេដ្ឋកិច្ច៣ធំៗ ៖ មុំសេដ្ឋកិច្ចទីមួយ គឺផ្លូវជាតិលេខ៤ មុំសេដ្ឋកិច្ចទីពីរ ផ្លូវជាតិលេខ៥១ និងម៉ុសេដ្ឋកិច្ចទីបី គឺផ្លូវល្បឿនលឿន៦០ម៉ែត្រ និងគម្រោងផ្លូវរដ្ឋផ្សេងទៀត ដែលមានទំហំ២០ម៉ែត្រ៣០ម៉ែត្រ និង៤៥ម៉ែត្រ ហើយក៏ជាតំបន់ ដែលមានប្រជាជនរស់នៅច្រើនកុះករ មានមន្ទីរពេទ្យ សាលារៀន វត្តអារាម ព្រមទាំងស្ថិតនៅក្នុង គម្រោងអភិវឌ្ឍរបស់រដ្ឋ ដែលនឹងត្រូវកាត់ចូល ក្រុងក្នុងពេលឆាប់ៗខាងមុខនេះទៀតផង”។
ជាការអបអរសាទរនៃការបើកសម្ពោធ បើកដំណើរការលក់ជាផ្លូវការ ហាងកាហ្វេ Arabitia Café បានផ្ដល់ជូននូវកម្មវិធីពិសេស ដោយការបញ្ចុះតម្លៃ៥០ភាគរយ ហើយក្នុងរយៈពេល៧ថ្ងៃបន្ទាប់ អតិថិជននឹងទទួលបានកម្មវិធីទិញ២ ថែមជូន១។ ដោយឡែកសម្រាប់ហាងផាប់ភូមិយើង ក៏មានការបញ្ចុះតម្លៃ៥០ភាគរយក្នុងរយៈពេល៣ថ្ងៃជាប់គ្នាផងដែរ គឺថ្ងៃទី២៤-២៥-២៦ ខែមីនា ឆ្នាំ២០២០៕
