ដោយ គង់ ម៉ាលីន
ភ្នំពេញ៖ ដោយសារកំនើនប្រាក់ចំណូលប្រជាពលរដ្ឋ បានធ្វើឲ្យកំលាំងទិញកើនឡើង អ្នកវិនិយោគអន្តរជាតិនានា បានបោះទុនវិនិយោគផ្សារទំនើបលំដាប់អន្តរជាតិជាច្រើននៅកម្ពុជា។
គេហទំព័រអចលនទ្រព្យ និងសេដ្ឋកិច្ច propertyarea.asia ដែលកាលពីដើមសប្តាហ៍នេះ បានបង្ហាញផ្សារទំនើបក្នុងស្រុកចំនួន៥នឹងបើកនៅឆ្នាំនេះ ប៉ុន្តែថ្ងៃនេះយើងនឹងនាំអ្នកអាន មកស្វែងយល់ផ្សារទំនើបលំដាប់អន្តរជាតិចំនួន៥ទៀត នឹងបើកដំណើរការនៅឆ្នាំនេះ ដែលផ្សារទាំងនោះ រួមមាន ផ្សារទំនើបលំដាប់អន្តរជាតិ AEON Mall2, ស្ថិតក្នុងខ័ណ្ឌសែនសុខ Phnom Penh Mega Mall ស្ថិតនៅតាមមហាវិថីសហព័ន្ឋរុស្ស៊ី Prince Plaza Mallស្ថិតនៅតាមបណ្តោយមហាវិថីព្រះនរោត្តម Midtown Mallស្ថិតនៅតាមផ្លូវលេខ២០០៤ និងផ្សារទំនើបEden Gardenស្ថិតនៅក្នុងតំបន់បឹងកក់ នឹងបើកដំណើរការនៅឆ្នាំនេះ។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុនលំដាប់ពិភពលោក CBRE Cambodiaបានថ្លែងដោយសយទិដ្ឋិនិយមថា ទីផ្សារទំនើបនៅកម្ពុជានៅតែបង្ហាញសញ្ញាវិជ្ជមាន ដោយសារចំនួនប្រជាពលរដ្ឋកើនឡើង និងអំណាចនៃការទិញបានកើនឡើងនៅក្នុងទីផ្សារកម្ពុជា ព្រោះប្រាក់ចំណូលប្រជាពលរដ្ឋកើនឡើង ស្របពេលដែលអ្នកវិនិយោគបានចាប់យកចំណែកទីផ្សារខុសៗគ្នា ដើម្បីធ្វើឲ្យអាជីវកម្មរបស់ពួកគេជោគជ័យ។
អ្នកនាងបន្តថា “ទោះជាយ៉ាងណាការទិញទំនិញល្បីៗ នៅតាមផ្សារទំនើបនៅកម្ពុជាមិនទាន់ច្រើននៅឡើយទេ ប៉ុន្តែសេវាកម្មភេសជ្ជៈ និងម្ហូបអាហារជាផ្នែកដែលមានការពេញនិយមជាងគេនៅក្នុងទីផ្សារនានា”។
ប្រធានក្រុមប្រឹក្សាភិបាលនៃក្រុមហ៊ុន World Bridge Group លោកឧកញ៉ា សៀ រិទ្ឋីដែលគ្រោងនឹងបើកផ្សារទំនើបថ្មីមួយ នៅក្នុងអាគារ The Bridge គឺ The Bridge Commercial បានទទួលស្គាល់ថា នៅកម្ពុជាមិនទាន់ដល់ពេលសម្រាប់ផលិតផល ដែលមានកេរ្ត៍ឈ្មោះល្បីៗលំដាប់ពិភពលោកទេ វាត្រូវការពេលវេលាពី៥ទៅ១០ឆ្នាំទៀត ដោយសារអ្នកមានប្រាក់សម្រាប់ទិញទំនិញបែបនេះមិនទាន់ប្រើប្រាស់ផ្សារទំនើបក្នុងស្រុក និងទិញទំនិញក្នុងស្រុកទេ។
លោកបន្តថា “មិនថាតែកម្ពុជា សូម្បីតែអ្នកមាននៅប្រទេសវៀតណាម ពួកគេនៅតែមានការពេញនិយមទិញទំនិញនៅក្រៅប្រទេស ប៉ុន្តែការមកដល់របស់ផលិតផលម៉ាកល្បីៗទាំងនោះ ពួកគេមិនគិតច្រើននោះទេ អ្វីដែលសំខាន់គឺពួកគេពង្រីកការចែកចាយផលិតផលរបស់ពួកគេ”។លោកបន្តថា “ខ្ញុំគិតថាមិនទាន់ដល់ពេលសម្រាប់ផលិតផលល្បីៗ នៅកម្ពុជានៅឡើយទេ វាត្រូវការពេលវេលាបន្ថែមទៀត”៕
