ដោយវុត្ថា
ភ្នំពេញៈ គិតចាប់ពីដើមឆ្នាំ២០២០រហូតមកដល់ពេលនេះ គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា(CDC) បានចេញវិញ្ញាបនបត្រដល់ក្រុមហ៊ុនវិនិយោគចំនួន៧៦ មានទំហំទុនវិនិយោគចំនួន១៥០០លានដុល្លារអាមេរិក និងអាចបង្កើតការងារជាង៥ម៉ឺនកន្លែងជូនដល់ពលរដ្ឋកម្ពុជា។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា នៅក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងារបន្ដរបស់ក្រសួងរ៉ែ និងថាមពល»នាថ្ងៃទី ២១ ខែមេសា ឆ្នាំ ២០២០នេះឱ្យដឹងថា ក្នុងចំណោមក្រុមហ៊ុនវិនិយោគទាំង៧៦ មានរោងចក្រមានចំនួន៤១កន្លែង និងគម្រោងសាងសង់អគារចំនួនជាង១០កន្លែង និងរោងចក្រផលិតឧបករណ៍អេឡិចត្រូនិក រោងចក្រផលិតបរិក្ខា និងរោងចក្រ ផលិតកម្មចំណីអាហារមានចំនួន ២០កន្លែង។
លោកបញ្ជាក់ទៀតថា “ទោះបីកម្ពុជាមានបញ្ហាប្រឈម ចំពោះការរីករាលដាលជាសាកលយ៉ាងណា ក៏កម្ពុជានូវតែទទួលបានគម្រោងវិនិយោគជាបន្តបន្ទាប់ ប្រកបដោយសក្តានុពលខ្ពស់ និងថាមពល”។
ទោះជាយ៉ាងណាក៏ដោយ លោក ផៃ ស៊ីផាន មិនបានបញ្ជាក់ថា ចំនួននេះ មានការកើនឡើងឬក៏ថយចុះនោះទេ បើធៀបទៅនឹងឆ្នាំមុន។
លោក សុខ ចិន្តា សោភា រដ្ឋមន្ត្រីប្រតិភូអមនាយករដ្ឋមន្ត្រី និងអគ្គលេខាធិការក្រុមប្រឹក្សាអភិវឌ្ឍន៍កម្ពុជា ធ្លាប់បានមានប្រសាសន៍កន្លងមកនេះថា ប្រទេសកម្ពុជាមានសក្តានុពល និងកាលានុវត្តន៍ភាពវិនិយោគខ្លាំងនៅក្នុងតំបន់។
លោកបន្តថា “ក្រៅពីធនធាន ធម្មជាតិដ៏សម្បូរបែប និងកម្លាំងពលកម្មដែលមានតម្លៃមិនសូវថ្លៃ កម្ពុជាជាប្រទេសមានសក្តានុពលវិនិយោគខ្លាំងនៅក្នុងតំបន់ បើផ្អែកទៅតាមទីតាំងភូមិសាស្ត្រ កត្តាស្ថេរភាពនយោបាយ កត្តាស្ថេរភាពម៉ាក្រូសេដ្ឋកិច្ច។ល។ បន្ថែមពីទៅទៀត កម្ពុជាបានរក្សានូវ កំណើនអតិផរណាប្ររចាំឆ្នាំរបស់ខ្លួន នៅក្នុងកម្រិតទាបបំផុត”។
លោករដ្ឋមន្ត្រីបន្ថែមថា កម្ពុជាផ្តល់ដល់វិនិយោគិន នូវបរិស្ថានវិនិយោគមួយប្រកបដោយភាពស្មើគ្នា រវាងបរទេសនិងជនកម្ពុជា ក៏ដូចជាការលើកទឹកចិត្ត ដែលមានលក្ខណៈប្រកួតប្រជែង គឺវិនិយោគិនបរទេសអាចធ្វើការវិនិយោគ១០០% លើស្ទើរគ្រប់វិស័យ ដោយមិនចាំបាច់មានការចូលរួមពីវិនិយោគិនកម្ពុជា។ អ្នកវិនិយោគ ក៏អាចធ្វើការផ្ទេរដោយសេរីនូវប្រាក់ចំណេញ ទៅប្រទេសរបស់ខ្លួនដោយគ្មានការរឹតត្បិត និងអាចទទួលបាននូវការលើកលែងពន្ធ លើប្រាក់ចំណេញពី៦ឆ្នាំ ទៅ៩ឆ្នាំ ព្រមទាំងការលើកទឹកចិត្តដទៃផ្សេងទៀត ដែលមិនមានប្រទេសផ្សេងទៀតនៅក្នុង តំបន់ ដែលអាចផ្តល់អោយដល់វិនិយោគិនបរទេស៕
