ដោយវុត្ថា
ភ្នំពេញៈ សមាគមធ្វើការទាក់ទងនឹងវិស័យហិរញ្ញវត្ថុធំៗពីរនៅកម្ពុជា បានអះអាងថា អតិថិជនរបស់គ្រឹះស្ថានធនាគារ និងហិរញ្ញវត្ថុ នៅតែអាចប្រើប្រាស់ដីធ្លី ឬអចលនទ្រព្យ ដែលដាក់ធានា(ទ្រព្យបញ្ចាំ) បានជាធម្មតា។
វាពិតជាមិនត្រឹមត្រូវនោះទេដែលថា អតិថិជនត្រូវការប្លង់បញ្ចាំ ដើម្បីអាចឱ្យពួកគេប្រកមុខរបស់ខ្លួននោះ ។ ការនិយាយនេះ ជាការខុសឆ្គង និងមានបំណងធ្វើឱ្យសាធារណជនមានការភ័ន្តច្រឡំ និងយល់ខុសធ្ងន់ធ្ងរ។
នេះបើយោងតាមសេចក្តីថ្លែងការណ៍រួម របស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញកាលពីថ្ងៃទី២៨ ខែមេសា ឆ្នាំ២០២០កន្លងមកនេះ បានប្រតិកម្មយ៉ាងខ្លាំង ទៅនឹងរបាយការណ៍របស់អង្គការសង្គមស៊ីវិលស្តីពី ផលប៉ះពាល់លើប្រជាពលរដ្ឋ ដែលបណ្ដាលមកពីការរីករាលដាលនៃវីរុសកូវីដ១៩។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាបានចាត់ទុករបាយការណ៍មួយរបស់អង្គការលីកាដូ ក្រោមចំណងជើងថា “បំណុលមីក្រូហិរញ្ញវត្ថុ គួរត្រូវបានព្យួរ និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ អំឡុងពេលរីករាលដាលនៃជំងឺកូវីដ១៩” នេះថា ជារបាយការណ៍ មិនបានឆ្លុះបញ្ចាំងអំពីស្ថានភាពជាក់ស្តែង និងបណ្ដាលឱ្យមានផលប៉ះពាល់ដល់វិស័យ ធនាគារ និងហិរញ្ញវត្ថុ ដែលជាឆ្អឹងខ្នងនៃសេដ្ឋកិច្ចជាតិទាំងមូល។
យោងតាមរបាយការណ៍របស់អអង្គការរលីកាដូ ដែលបានបង្ហាញនៅលើគេហទំព័ររបស់ខ្លួនកាលពីថ្ងៃទី២៧ មេសាកន្លងមកបានឲ្យដឹងថា ការរងគ្រោះរបស់ប្រជាពលរដ្ឋកម្ពុជារាប់លាននាក់ ដែលកំពុងប្រឈមមុខនឹងវិបត្តិសេដ្ឋកិច្ច ពីការរីករាលដាលនៃជំងឺកូវីដ១៩ គឺកំពុងត្រូវបានរងគ្រោះបន្ថែមទៀត ដោយសារការបន្ដកើតមាននូវវិបត្តិជំពាក់បំណុលច្រើនលើសលុបនៅក្នុងប្រទេស ដែលកើតចេញពីកម្ចីឥណទានជាង១០ពាន់លានដុល្លាររបស់គ្រឹះស្ថានមីក្រូហិរញ្ញវត្ថុមួយចំនួន។
បច្ចុប្បន្ននេះ ប្រជាពលរដ្ឋកម្ពុជាច្រើនជាង២,៥លាននាក់ មានជាប់ជំពាក់កម្ចីខ្នាតតូច ជាមួយនឹងអត្រាកម្ចីជាមធ្យម ៣៨០០ដុល្លារ ដែលជាចំនួនច្រើនជាងគេនៅលើពិភពលោក ។ ការណ៍នេះធ្វើឱ្យជីវភាពរស់នៅ សុខភាព និងសុវត្ថិភាពកម្មសិទ្ធិដីធ្លីរបស់ប្រជាពលរដ្ឋកម្ពុជារាប់លាននាក់ ប្រឈមនឹងហានិភ័យ ។
របាយការណ៍របស់លៅកាដូបានបន្តថា កន្លងមករាជរដ្ឋាភិបាលមានវិធានការមួយចំនួនរួចមកហើយ ។ យើងខ្ញុំ សូមសំណូមពរបន្ថែមដល់រាជរដ្ឋាភិបាល ក្នុងការពិចារណាដើម្បីធានាថា គ្រឹះស្ថានមីក្រូហិរញ្ញវត្ថុ ឆាប់ផ្អាកការសងប្រាក់កម្ចី និងការប្រាក់ទាំងអស់ យ៉ាងតិចណាស់ចំនួន៣ខែ និងប្រគល់ជូនម្ចាស់ទ្រព្យវិញនូវប័ណ្ណកម្ម សិទ្ធិដីធ្លីរាប់លានប្លង់ពាក់ព័ន្ធនឹងកម្ចីខ្នាតតូច ដែលបច្ចុប្បន្នត្រូវបានដាក់ជាទ្រព្យធានា (បញ្ចាំ) ដោយគ្រឹះស្ថានមីក្រូហិរញ្ញវត្ថុ។
វិធានការទាំងនេះគឺមានភាពចាំបាច់ ដើម្បីធានាថាប្រជាពលរដ្ឋអាចបន្តរស់នៅក្នុងពេលមានវិបត្តិនេះ ដោយគ្មានហានិភ័យចំពោះសុខភាព ឬលំនៅដ្ឋានរបស់អ្នកទាំងនោះ និងអាចបញ្ជៀសពីកម្ចីឥណទានមានហានិភ័យ ដែលអាចនាំឱ្យកើតមានករណីធ្វើការងារដោះបំណុល ការជួញដូរមនុស្ស និងការរំលោភសិទ្ធិមនុស្សដទៃទៀត។
កម្មករ-កម្មការិនីរាប់លាននាក់ក្នុងវិស័យទេសចរណ៍ កាត់ដេរ និងសំណង់ កំពុងប្រឈមមុខនឹងការបញ្ឈប់ពីការងារ និងការបាត់បង់ប្រាក់បៀវត្សរ៍ ។ ការខិតខំប្រឹងប្រែងរបស់រាជរដ្ឋាភិបាល ក្នុងការជួយផ្គត់ផ្គង់ចំពោះការបាត់បង់ទាំងនេះកន្លងមក គឺនៅមានភាពខ្វះខាត ក្នុងការបំពេញតម្រូវការមូលដ្ឋាន របស់កម្មករ-កម្មការិនី។ បំណុលមីក្រូហិរញ្ញវត្ថុនៅកម្ពុជា ដែលភាគច្រើនមានប័ណ្ណកម្មសិទ្ធិដីធ្លី របស់អ្នកខ្ចីប្រាក់រាប់លានប្លង់ដាក់ជាទ្រព្យធានា បង្កើនឱ្យមានហានិភ័យរយៈពេលខ្លី និងវែងកាន់តែខ្លាំង ក្នុងពេលមានវិបត្តិសេដ្ឋកិច្ចនេះ ។
យើងខ្ញុំទទួលស្គាល់ពីវិធានការណណ៍ ដែលបានដាក់ចេញដោយធនាគារជាតិនៃកម្ពុជា ក្នុងការលើកទឹកចិត្តឱ្យគ្រឹះស្ថានមីក្រូហិរញ្ញវត្ថុ រៀបចំឥណទានឡើងវិញ និងការពន្យាពេលសងប្រាក់ ដោយផ្អែកតាមករណីជាក់ស្ដែងនីមួយៗ។ ទោះបីជាយ៉ាងណាក៏ដោយ កម្ពុជាមានគ្រឹះស្ថានមីក្រូហិរញ្ញវត្ថុជាង៨០ ហើយដំណើរការដោះស្រាយតាមករណីជាក់ស្ដែងនីមួយៗ នឹងមិនអាចធ្វើទៅបានលឿននោះទេ សម្រាប់អ្នកខ្ចីប្រាក់ជាង២លាន៦សែននាក់ ដែលកំពុងត្រូវការជួយសម្រាលបន្ទុកជាបន្ទាន់ ។ វិធានការជាលក្ខណៈប្រព័ន្ធលើសពីនេះ គឺត្រូវការជាបន្ទាន់ ។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាបានឱ្យដឹងផងដែរថា “ក្នុងអំឡុងពេល នៃការចាប់ផ្តើមរីករាលដាលនៃវីរុសកូវីដ១៩ ធនាគារជាតិនៃកម្ពុជាបានធ្វើការវិភាគយ៉ាងល្អិតល្អន់ នូវផលប៉ះពាល់នានា ដោយបានដាក់ចេញនូវវិធាន ដើម្បីសម្រាលបន្ទុកដល់អតិថិជនរបស់ស្ថាប័នធនាគារ និងហិរញ្ញវត្ថុ”។
សមាគទាំងពីរបានបន្តថា “គ្រឹះស្ថានធនាគារ និងហិរញ្ញវត្ថុ បាននិងកំពុងអនុវត្តន៍យ៉ាងពេញលេញ នូវគោលនយោបាយតាមអនុសាសន៍ដ៏ខ្ពង់ខ្ពស់ របស់រាជរដ្ឋាភិបាល ក្រសួងសាម៉ីពាក់ព័ន្ធ ក៏ដូចជាការណែនាំរបស់ធនាគារជាតិនៃកម្ពុជា ដែលជាអាណាព្យាបាល ដើម្បីធានា និងការពារបានគ្រប់ភាគីពាក់ព័ន្ធ រួមទាំងវិស័យទាំងមូល ដោយគ្មានភាពចាំបាច់ ក្នុងការអនុវត្តតាមការស្នើសុំ ដោយខ្វះការសិក្សាត្រឹមត្រូវតាមនិយាមបច្ចេកទេសរបស់ស្ថាប័ន ដែលមិនពាក់ព័ន្ធ ឬជំរុញឱ្យមានផលប៉ះពាល់ធ្ងន់ធ្ងរ ដល់សេដ្ឋកិច្ចជាតិ“។
ការលើកឡើងរបស់ស្ថាប័នសង្គមស៊ីវិល ពាក់ព័ន្ធនឹងទ្រព្យធានាកាតព្វកិច្ចបំណុលដែលជាការអនុវត្តទូទៅលើសកលលោក និងជាការទទួលខុសត្រូវដោយផ្ទាល់របស់ស្ថាប័នធនាគារ និងហិរញ្ញវត្ថុ គឺកំពុងតែជំរុញឱ្យមានផលប៉ះពាល់ ដល់ស្ថិរភាពសេដ្ឋកិច្ចជាតិ។
ម៉្យាងវិញទៀត អនុសាសន៍របស់អង្គការសង្គមស៊ីវិលមួយចំនួន កំពុងតែជំរុញឱ្យសេដ្ឋកិច្ចជាតិរងនូវផលប៉ះពាល់បន្ថែមទៀត ដោយបង្កឱ្យបាត់បង់នូវជំនឿទុកចិត្តពីសំណាក់ អ្នកដាក់ប្រាក់បញ្ញើ មានទាំងមូលនិធិរបស់ស្ថាប័នសាធារណៈ ឯកជន និងរបស់អង្គការសង្គមស៊ីវិលខ្លួនឯងផងដែរ។
សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏បានអំពាវនាវទុកលទ្ធភាពឱ្យសាម៉ី ស្ថាប័ន ធនាគារ និងហិរញ្ញវត្ថុបំពេញការងាររបស់ខ្លួនប្រកបដោយវិជ្ជាជីវៈ និងការទទួលខុសត្រូវខ្ពស់ផងដែរ។
ទោះជាយ៉ាងណាអតតិថិជនជាច្រើនរបស់ធនាគារនានា បាននិយាយក្នុងលក្ខខ័ណ្ឌមិនបញ្ចេញឈ្មោះថា ពួកគេមិនទទួលបានការលើកទឹកចិត្តណាមួយពីសំណាក់ធនាគារ ដែលពួកគេទទួលបានឥណទាននោះទេ ទាំងអត្រាការប្រាក់ ទាំងការពន្យាពេល ទូទាត់សំណង។
បុគ្គលិកជាច្រើនរបស់ធនាគារធំមួយនៅកម្ពុជាបាននិយាយថា ពួកគេមិនបានទទួលការណែនាំពីថ្នាក់លើរបស់ពួកគេ ទាក់ទងនឹងការពន្យាពេលសងឥណទានដល់អតិថិជន ឬការបន្ឋូរបន្ថយណាមួយនៅឡើយទេរហូតមកទល់ពេលនេះ៕
