ដោយ វុត្ថា
ភ្នំពេញ ៖ ចក្ខុវិស័យស្តីពីគោលនយោបាយដីធ្លីនៅកម្ពុជា ដីធ្លីត្រូវបានគ្រប់គ្រង រៀបចំ និងបែងចែកតាមរបៀបមួយ ដើម្បីរួមចំណែកធ្វើឱ្យសម្រេចនូវគោលដៅជាតិដ៏ទូលំទូលាយក្នុងការកាត់បន្ថយភាពក្រីក្រ ការអភិវឌ្ឍសេដ្ឋកិច្ច និងសង្គមប្រកបដោយសមធម៌ អភិបាលកិច្ចល្អនៅក្នុងសង្គមប្រជាធិបតេយ្យដែលតម្រង់ទិសទៅរកទីផ្សារដូចបានពិពណ៌នានៅក្នុងសេចក្តីប្រកាសស្តីពីគោលនយោបាយដីធ្លី។
យោងតាមឯកសាររបស់ក្រសួងរៀបចំដី នគរូបនីយកម្ម និងសំណង់ ស្តីពីក្របខ័ណ្ឌយុទ្ធសាស្ត្រនៃគោលនយោបាយដីធ្លីបានឱ្យដឹងថា ចក្ខុវិស័យនេះ ត្រូវបានចែកនៅក្នុងទិដ្ឋភាពធំៗចំនួន៣ រួមមាន ៖
១) ដីត្រូវបានគ្រប់គ្រងតាមវិធីដែលបានកំណត់ និងធ្វើឱ្យសិទ្ធិកាន់កាប់លើអចលនទ្រព្យមានភាពច្បាស់លាស់ និងមានសុវត្ថិភាព ដែលអាចធ្វើឱ្យការផ្ទេរសិទ្ធិជាផ្លូវការមានភាពងាយស្រួល និងអាចកាត់បន្ថយវិវាទ ជាពិសេសចំពោះករណីណាដែលមានលទ្ធភាពអាចដោះស្រាយបាន នឹងដោះស្រាយនៅក្រៅប្រព័ន្ធតុលាការ។
២) ដីត្រូវបានរៀបចំតាមវិធីមួយដែលធ្វើឱ្យការប្រើប្រាស់បានល្អប្រកបដោយចីរភាព និងត្រឹមត្រូវតាមបែបបទបរិស្ថាន ។ នៅក្នុងតំបន់រួម ការប្រើប្រាស់ដីទាមទារឱ្យមានតុល្យភាពរវាងអ្នកប្រើប្រាស់ទាំងឡាយ និងការប្រើប្រាស់ច្រើនគោលដៅ ទន្ទឹមនេះ ទាមទារឱ្យមានការចូលរួមពីអ្នកពាក់ព័ន្ធនានា។
៣) ដីរដ្ឋត្រូវបានការពារសម្រាប់ការប្រើប្រាស់ជាសាធារណៈតាមកន្លែងណាដែលសមនឹងប្រើ ក្រៅពីនោះត្រូវបែងចែកសំរាប់ជាប្រយោជន៍ឯកជនតាមរយៈដំណើរការដែលមានតម្លៃភាព។
ពេលសម្រេចបានចក្ខុវិស័យទាំងនេះ នឹងអនុញ្ញាតឱ្យការប្រើប្រាស់ដីមានភាពត្រឹមត្រូវ និងប្រកបដោយប្រសិទ្ធិភាពខ្ពស់ សម្រាប់គោលដៅសេដ្ឋកិច្ច និងសង្គមកិច្ច និងធ្វើឱ្យមានការដោះដូរដីធ្វើបានដោយសេរី ព្រមទាំងទទួលបានផលចំណេញពីដីដែលជាបេតិកភណ្ឌសាធារណៈ ៕
