ដោយ ហ្សូលី
ភ្នំពេញ៖ ភ្ញៀវទេសចរក្នុងស្រុកមានអត្រាធ្លាក់ចុះជាង ៣០ភាគរយ ក្នុងអំឡុងពេលវិបត្តិ Covid-19 នេះរាតត្បាត។ នេះបើតាមឱ្យដឹងពីក្រសួងទេសចរណ៍កម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា ចាប់ពីខែឧសភា ឆ្នាំ ២០២០នេះទៅ ក្រសួងទេសចរណ៍នឹងផ្តោតសំខាន់យកចិត្តទុកដាក់ទៅលើទេសចរណ៍ក្នុងស្រុកឱ្យបានច្រើននិងយកចំនុចនេះជាអាទិភាព ដោយសារតែរដ្ឋាភិបាលបានចេញច្បាប់បិទការធ្វើដំណើរឆ្លងពីខេត្តមួយទៅខេត្តមួយ។
លោករដ្ឋមន្ត្រីបានលើកឡើងថា ក្រសួងទេសចរណ៍មានគម្រោងដាក់ចេញនូវគោលការណ៍ទេសចរណ៍ថ្មីមួយ ដើម្បីឱ្យវិស័យទេសចរណ៍មានសន្ទុះកក្រើកឡើងវិញនៅក្នុងខែឧសភានេះ។
ទន្ទឹមនេះ រដ្ឋមន្ត្រីរូបនេះបានសង្កត់ធ្ងន់ថា ក្រុមហ៊ុនឬអ្នកផ្តល់សេវាកម្មវិស័យបដិសណ្ឋារកិច្ចអាចនឹងត្រូវបង្ខំចិត្តព្យួរអាជីវកម្ម មុខជំនូួញ ឬបិទចោលតែម្តងប្រសិនបើពួកគេមានភាពបរាជ័យក្នុងការអនុវត្តតាមគោលការណ៍ទេសចរណ៍ថ្មីនេះ។
យោងតាមទិន្នន័យរបស់ក្រសួងទេសចរណ៍បង្ហាញថា ការមកដល់នៃភ្ញៀវទេសចរបរទេសមានត្រឹមជាង ១លាននាក់តែប៉ុណ្ណោះ នៅក្នុងត្រីមាសទី ១ ឆ្នាំ ២០២០នេះ ធ្លាក់ចុះប្រមាណ៣៨ភាគរយ ដោយសារតែការរងឥទ្ធិពលពីវិបត្តិនៃជំងឺ Covid-19។ ជាការពិត ភ្ញៀវទេសចរចិនបានធ្លាក់ចុះជាង ៦០ភាគរយ អាមេរិកធ្លាក់ចុះជាង ៣០ភាគរយ និង កូរ៉េខាងត្បូងធ្លាក់ចុះជាង ៣៦ ភាគរយ។
កាលពីឆ្នាំមុន កម្ពុជារកចំណូលបានពីភ្ញៀវទេសចរបរទេសចំនួនប្រហែល ៥ ពាន់លានដុល្លារ ពីភ្ញៀវទេសចរចំនួន ៦.៦លាននាក់៕ Vietnamplus
