ដោយ : គង់ សូរិយា
ភ្នំពេញ : ទីបំផុតផ្សារទំនើបលំដាប់ពិភពលោកAEON Mall2 ស្ថិតនៅភាគខាងជើងក្រុងភ្នំពេញ នឹងបើកដំណើរការនៅចុងខែឧសភាខាងមុខនេះ ប្រសិនជាគ្មានអ្វីប្រែប្រួលទេនោះ។
ទេសរដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់បានថ្លែងឲ្យដឹង ក្នុងពិធីបើកការដ្ឋានសាងសង់ផ្សារទំនើបPH Diamond Placeកាលពីម្សិលម៉ិញនេះថា ផ្សារទំនើបលំដាប់អន្តរជាតិAEON Mall2 នឹងបើកដំណើរការនៅកំឡូងខែឧសភាខាងមុខនេះ។
ផ្សារទំនើបAEON Mall2 មានទំហំធំជាងផ្សារទំនើបAEON Mall1 និងមានសេវាកម្មកំសាន្តស្តង់ដាអន្តរជាតិ ដែលផ្តល់សេវាកម្មជាច្រើន ដល់ប្រជាជនរស់នៅភាគខាងជើងក្រុងភ្នំពេញ ដែលភាគច្រើជាក្រុមអភិជន។
-->
នាយិកាប្រចាំប្រទេសនៃក្រុមហ៊ុនCBRE Cambodiaអ្នកនាងអាន សុធីតាបានថ្លែងថា ការកើនឡើងនូវវត្តមានផ្សារទំនើបនៅកម្ពុជា បង្ហាញពីសញ្ញាល្អប្រសើរនៃសេដ្ឋកិច្ចប្រទេសនេះ ហើយកំនើនសេដ្ឋកិច្ចបានធ្វើឲ្យអំណាចនៃការទិញកើនឡើង នៅក្នុងប្រទេសកម្ពុជា។អ្នកនាងបន្តថា ទោះជាចំនួនផ្សារទំនើបកើន ឡើងច្រើនក្តី ប៉ុន្តែវាមិនមានបញ្ហានោះទេ ដោយសារអ្នកវិនិយោគបានចាប់យកអតិថិជនគោលដៅផ្សេងៗគ្នា និងស្ថិតនៅតំបន់ផ្សេងៗគ្នា។
នៅឆ្នាំ២០១៨នេះផ្សារទំនើប ដែលវិនិយោគដោយអ្នកវិនិយោគក្នុងស្រុក និងអន្តរជាតិប្រមាណ១០ទៀតនឹងបើកដំនើរការ ខណៈផ្សារទំនើបថ្មីៗជាច្រើនទៀតកំពុងសាងសង់ផងដែរ ដូចជា ផ្សារទំនើបនៃបុរីប៉េង ហួត PH ECO MALL ស្ថិតនៅតាមបណ្តោយផ្លូវជាតិលេខ១ ផ្សារទំនើបPH Diamond Placeស្ថិតនៅបណ្តោយមហាវិថីសម្តេចតេជោហ៊ុន សែនឬផ្លូវ៦០ម៉ែត្រជាដើម៕
