ដោយ ប៊ី
ភ្នំពេញ៖ ការរាតត្បាតនៃជំងឺ COVID-19 មានផលប៉ះពាល់អវិជ្ជមានដល់សេដ្ឋកិច្ច CLMV (កម្ពុជា ឡាវ មីយ៉ាន់ម៉ា វៀតណាម) ដោយសារការពឹងផ្អែករបស់ប្រទេសទាំងនេះលើប្រាក់ចំណូលប្រភពបរទេសពីទេសចរណ៍ និងការនាំចេញនេះ។ បើយោងតាមការស្រាវជ្រាវរបស់មជ្ឍមណ្ឌល KResearchCenter ដែលមានមូលដ្ឋាននៅប្រទេសថៃចេញផ្សាយកាលពីថ្មីៗនេះ ។
ខណៈពេលវិបត្ដិជំងឺ COVID-19 បានធ្វើឱ្យអត្រាកំណើនសេដ្ឋកិច្ចនៅក្នុងប្លុក CLMV ស្ថិតក្នុងកម្រិតទាបបំផុតក្នុងរយៈពេលពីរទសវត្សសេដ្ឋកិច្ច CLMV អាចនឹងមានកំណើនត្រឹម ៣,៤ ភាគរយនៅឆ្នាំនេះ។
សេដ្ឋកិច្ច CLMV នឹងមានទំនោរទៅរកការងើបឡើងវិញយ៉ាងឆាប់រហ័សក្នុងរយៈពេល ១ ទៅ ២ ឆ្នាំខាងមុខ ដោយកំណើនសេដ្ឋកិច្ចត្រូវបានព្យាករណ៍ថានឹងកើនឡើងដល់ ៦,៤ ភាគរយនៅឆ្នាំ ២០២១ និង ៦,៥ ភាគរយនៅឆ្នាំ ២០២២។
បណ្តាប្រទេសដែលពឹងផ្អែកយ៉ាងខ្លាំងលើប្រាក់ចំណូលបរទេសកំពុងប្រឈមមុខនឹងផលប៉ះពាល់អវិជ្ជមានបន្ថែមទៀតក្នុងកំឡុងពេលមានវិបត្តិនេះ។
ប្រទេសកម្ពុជាគឺជាប្រទេសពឹងផ្អែកខ្លាំងលើប្រាក់ចំណូលបរទេសតាមរយៈវិស័យទេសចរណ៍ និងការនាំចេញ។ វិស័យទេសចរណ៍ត្រូវបាន រំពឹងថានឹងធ្លាក់ចុះប្រហែល ៦០ ភាគរយនៅឆ្នាំនេះ។ ទន្ទឹមនឹងនេះ បើនិយាយពីការនាំចេញវិញ កម្ពុជានៅតែពឹងផ្អែកលើទីផ្សារអឺរ៉ុប និងសហរដ្ឋអាមេរិកដដែល។ ទាំងសហរដ្ឋអាមេរិក និងប្លុកសហគមន៍អឺរ៉ុបបច្ចុប្បន្នងាយរងគ្រោះបំផុតចំពោះការរីករាលដាលនៃ COVID-១៩ ។
ដូច្នេះតម្លៃនៃការនាំចេញសម្រាប់ឆ្នាំ ២០២០ ត្រូវបានគេព្យាករថានឹងធ្លាក់ចុះ ១០ ភាគរយដែល នឹងនាំឱ្យមានការធ្លាក់ចុះ ០,៩ ភាគរយនៅក្នុងសេដ្ឋកិច្ចទាំងមូលរបស់ប្រទេសកម្ពុជា។ ទោះបីជាយ៉ាងណាក៏ដោយ រដ្ឋាភិបាលកម្ពុជាបានតៀមកញ្ចប់ថវិកាដើម្បីជំរុញសេដ្ឋកិច្ចខ្លួន។
ការនាំចេញរបស់វៀតណាមក្នុងឆ្នាំ ២០២០ បានធ្លាក់ចុះត្រឹមតែចំនួនតិចតួចប៉ុណ្ណោះជាមួយនឹងការរំពឹងទុកថានឹងមានការធ្លាក់ចុះចំនួន ៥ ភាគរយនៃតម្លៃនៃការនាំចេញ។ រដ្ឋាភិបាលវៀតណាមបានអនុវត្តគោលនយោបាយជំរុញសេដ្ឋកិច្ចក្នុងទម្រង់ជាជំនួយនិងការកាត់បន្ថយពន្ធ។ អត្រាកំណើនសេដ្ឋកិច្ចរបស់ប្រទេសវៀតណាមនៅតែត្រូវបានគេរំពឹងថានឹងមានចំនួន ៣,៦ ភាគរយនៅឆ្នាំនេះ។
តម្លៃនៃការនាំចេញរបស់មីយ៉ាន់ម៉ាត្រូវបានគេព្យាករថានឹងធ្លាក់ចុះ ១០ ភាគរយនៅឆ្នាំនេះ។
សម្លៀកបំពាក់និងវាយនភណ្ឌដែលជាការនាំចេញធំបំផុតទី ២ របស់មីយ៉ាន់ម៉ាក៏បានទទួលរងនូវផលប៉ះពាល់យ៉ាងខ្លាំងពីការបិទរោងចក្រនៅប្រទេសចិន និងពីការធ្លាក់ចុះតម្រូវការក្នុងទីផ្សារអឺរ៉ុប។
តម្លៃនៃការនាំចេញរបស់មីយ៉ាន់ម៉ាត្រូវបានគេព្យាករថានឹងធ្លាក់ចុះ ១០ ភាគរយនៅឆ្នាំនេះ។
សេដ្ឋកិច្ចរបស់ប្រទេសឡាវត្រូវបានគេព្យាករថានឹងកើនឡើងដល់ ៣,៩ ភាគរយនៅឆ្នាំ ២០២០។ ប្រទេសលាវគឺជាប្រទេសមួយផ្សេងទៀតដែលទទួលបានផលប៉ះពាល់សេដ្ឋកិច្ចតិចតួចពីជំងឺរាតត្បាត COVID-19 ដោយសារតែប្រទេសនេះមិនពឹងផ្អែកលើវិស័យទេសចរណ៍ ឬការនាំចេញដែលជាប្រភពចំណូលដ៏សំខាន់។
វិស័យទេសចរណ៍របស់ប្រទេសឡាវពឹងផ្អែកភាគច្រើនទៅលើការមកដល់របស់ភ្ញៀវទេសចរថៃ។ ដោយសារប្រទេសថៃស្ថិតក្នុងចំណោមប្រទេសអាស៊ានដែលងាយទទួលរងគ្រោះក្នុងកំឡុងពេលមានវិបត្តិនេះ ទេសចរណ៍របស់ប្រទេសឡាវទំនងជារងផលប៉ះពាល់យ៉ាងធ្ងន់ធ្ងរ។
បើនិយាយពីការនាំចេញរបស់ប្រទេសឡាវវិញតម្លៃនៃការនាំចេញសម្រាប់ឆ្នាំ ២០២០ ត្រូវបានគេប៉ាន់ស្មានថានឹងធ្លាក់ចុះប្រមាណ ៥ ភាគរយ។ ជាសំណាងល្អការនាំចេញរបស់ឡាវភាគច្រើនគឺមកពីឧស្សាហកម្មរុករករ៉ែ និងថាមពលអគ្គីសនី ហើយវិស័យទាំងនេះមិនមានបុគ្គលិកច្រើនទេ៕
