ដោយ ប៊ី
ភ្នំពេញៈ ធនាគារ Maybank មានបំណងផលិតម៉ាស ដែលត្រូវបានតម្បាញដោយដៃជាង១១០,០០០ម៉ាស ដើម្បីជួយចូលរួមទប់ស្កាត់ការរីករាលដាលនៃជំងឺ Covid-១៩ នៅក្នុងតំបន់ក្រោមកម្មវិធី ដែលមានឈ្មោះ Women Eco Weavers របស់ធនាគារ ដោយសហការជាមួយអង្គការ Colorsilk ។
ធនាគារ Maybank បានឱ្យដឹងថា ស្ត្រីតម្បាញប្រមាណ២៥០នាក់ នៅក្នុងប្រទេសកម្ពុជា ក្រោមកម្មវិធីនេះនឹងផលិតម៉ាស ដែលត្បាញដោយដៃធ្វើពីកប្បាស និងសូត្រសុទ្ធ ដើម្បីជួយកាត់បន្ថយសម្ពាធលើតំរូវការម៉ាសពេទ្យ។
ធនាគារបានឱ្យដឹងថា ម៉ាសត្រូវបានបម្រុងទុកជាចម្បង សម្រាប់អ្នកជំនាញផ្នែកវេជ្ជសាស្ត្រ និងបុគ្គលិកថែទាំសុខភាព ក៏ដូចជាដើម្បីប្រឆាំងនឹងការកើនឡើងនៃតម្លៃម៉ាសនៅក្នុងតំបន់។
ធនាគារនេះបានឱ្យដឹងទៀតថា “រហូតមកដល់ពេលនេះ ម៉ាសដែលតម្បាញដោយដៃជាង ១៥.០០០ ត្រូវបានផលិតដោយអ្នកតម្បាញ ដែលម៉ាសចំនួន ១២.០០០ ត្រូវបានលក់ និង២០០០ ត្រូវបានបរិច្ចាគដល់សហគមន៍នានានៅក្នុងប្រទេសកម្ពុជា” ។
នៅប្រទេសកម្ពុជា ម៉ាសពេទ្យមួយអាចចំណាយបានយ៉ាងងាយ រហូតដល់១ ដុល្លារអាមេរិកក្នុងមួយដុំ ដែលមានប្រជាជនមួយភាគធំ រស់នៅក្រោមបន្ទាត់ភាពក្រីក្រអាចរកបានចន្លោះពី១.២៥ ដុល្លារទៅ២ដុល្លារក្នុងមួយថ្ងៃ។
ម៉ាសដែលតម្បាញពីកប្បាស អាចសម្អាតបានប្រើប្រាស់ឡើងវិញ និងចំណាយតិចត្រឹម០,៦៥ ដុល្លារអាមេរិក ហើយម៉ាសត្បាញបីសូត្រមានតម្លៃ១.៥០ ដុល្លារក្នុងមួយម៉ាស។
ម៉ាសមានទាំងព៌ណ ស មានទាំងលំនាំធម្មតា និងឆ្នូតដែលគេស្គាល់ថា ដូចក្រមា ដែលមានលក្ខណៈពិសេសដូច សូត្រដ៏ល្បីរបស់ប្រទេសកម្ពុជា។
នាយកប្រតិបត្តិនៃមូលនិធិ Maybank លោក Shahril Azuar Jimin បាននិយាយថា ចំពេលមានភាពលំបាក វាពិតជារីករាយណាស់ ដែលបានឃើញអ្នកតម្បាញបានចូលរួមទប់ស្កាត់ការរីករាលដាលនៃជំងឺដង្ហើមថ្មីនេះ ដោយផលិតម៉ាសត្បាញដោយដៃ។
លោកបានបន្តថា“ការខិតខំប្រឹងប្រែងដ៏សំខាន់នេះបានបង្ហាញថា ចាស់ ក្មេង អ្នកមាន ឬអ្នកក្រអាចបំពេញតួនាទីរបស់ពួកគេ ដើម្បីជួយគ្នាក្នុងពេលមានវិបត្តិនេះ” ។
លោក Shahril មានប្រសាសន៍ថា “វាក៏ជាការលើកទឹកចិត្តផងដែរ ដើម្បីមើលឃើញពីឥទ្ធិពលនៃការវិនិយោគរបស់យើង នៅក្នុងដំណោះស្រាយរួមសម្រាប់សហគមន៍ ដែលយើងបម្រើ” ។
យោងធនាគារ Maybank អ្នកតម្បាញតម្បាញភាគច្រើន ជាអ្នកបញ្ចប់ការសិក្សា និងជាសិក្ខាកាមនៃកម្មវិធី Maybank Women Eco-Weavers ។
វាគឺជាកម្មវិធីគំរូរបស់មូលនិធិ Maybank ដែលលើកកម្ពស់វាយនភណ្ឌប្រពៃណីនៅទូទាំងពិភពលោក ប្រកបដោយនិរន្តរភាព ខណៈពេលដែលបង្កើតឯករាជ្យភាពសេដ្ឋកិច្ច និងបរិយាប័នហិរញ្ញវត្ថុសម្រាប់ស្ត្រីតម្បាញនៅទូទាំងតំបន់អាស៊ាន។
គំនិតផ្តួចផ្តើមផលិតម៉ាស ក៏ផ្តល់នូវឱកាសសេដ្ឋកិច្ចបន្ថែម សម្រាប់អ្នកតម្បាញ និងសហគមន៍តម្បាញរបស់ប្រទេសកម្ពុជា ក្នុងការធានាឱ្យបាននូវតម្លៃសមរម្យ និងការពារសុខុមាលភាពរបស់ប្រជាជន។
ធនាគារបានឱ្យដឹងថា “ពីគំនិតផ្តួចផ្តើមនេះ អ្នកតម្បាញរកប្រាក់ចន្លោះពី២០០ ដុល្លារទៅ៣៥០ដុល្លារក្នុងមួយខែ។ អ្នកតម្បាញក៏កំពុងទទួលការបញ្ជាទិញ ពីប្រទេសមួយចំនួន ដូចជាជប៉ុន ឥណ្ឌូនេស៊ី អាមេរិក និងតៃវ៉ាន់” ។
អ្នកបញ្ចប់ការសិក្សាជានិស្សិត នៃកម្មវិធីខាងលើ អ្នកស្រី ទូច អេង មានប្រសាសន៍ថា អ្នកស្រីធ្លាប់រកចំណូលបានតិចជាង៣០ដុល្លារ ក្នុងនាមជាកសិករ ខណៈដែលអ្នកផ្សេងទៀតរកចំណូលបានច្រើនជាងនេះ ដោយធ្វើការនៅរោងចក្រ។
អ្នកស្រីអេងបានថ្លែងថា “ចាប់តាំងពីខ្ញុំបានចូលរួមក្នុងគម្រោងផលិតម៉ាស ខ្ញុំពិតជាអរគុណ ដែលខ្ញុំអាចរកប្រាក់បានចន្លោះពី២៥០ ដុល្លារទៅ២៨០ដុល្លារ ហើយក៏អាចជួយប្រទេសរបស់ខ្ញុំ ក្នុងការប្រយុទ្ធប្រឆាំងនឹងការរីករាលដាលនៃជំងឺដង្ហើមថ្មីផងដែរ” ៕
