ដោយ ហ្សូលី
ប៉េកាំងៈ តម្រូវការបរទេសសម្រាប់ទំនិញចិន បានថយចុះនៅក្នុងខែឧសភាម្តងទៀត ជាសញ្ញាបង្ហាញថា ការថយចុះនៃប្រទេសសេដ្ឋកិច្ចធំលំដាប់ទី២ នៅលើពិភពលោក ទោះបីជាធ្លាប់បានរាយការណ៍ព័ត៌មានថា សកម្មភាពអាជីវកម្មចិនមានសន្ទុះកាន់តែខ្លាំងក៏ដោយ។
តួលេខថ្មីដែលទទួលបានពីអាជ្ញាធរពន្ធគយ របស់ប្រទេសចិនបានបង្ហាញថា ការធ្លាក់ចុះនៃតម្លៃទំនិញសកល បានជំរុញឱ្យទីក្រុងប៉េកាំង ទិញធនធានជាយុទ្ធសាស្ត្រដូចជា ប្រេងឆៅ ស្របពេលដែលភាពតានតឹងកើនឡើងនៅសហរដ្ឋអាមេរិក។
ការធ្លាក់ចុះនេះ ក៏មានការកើតឡើងពីដៃគូពាណិជ្ជកម្មរបស់ចិនដែរ នោះគឺតំបន់អាស៊ីអាគ្នេយ៍ ដែលជាអ្នកទិញទំនិញចិនច្រើនជាងគេបំផុត ពេលនេះបានរាយការណ៍ពីការធ្លាក់ចុះតែ១ភាគរយ នៃការនាំចូលពីប្រទេសចិន បន្ទាប់ពីខែមុនមានការកើនឡើង៨ ភាគរយកាលពីខែមេសា ដោយសារការរីករាលដាលនៃជំងឺរាតត្បាត។
ការនាំចេញទៅសហរដ្ឋអាមេរិក និងអឺរ៉ុបបានធ្លាក់ចុះ១១ភាគរយ ក្នុងរយៈពេល៥ ខែដំបូងនៃឆ្នាំនេះ ដោយសារបណ្តាប្រទេសលោកខាងលិច បានព្យាយាមបើកទ្វារសេដ្ឋកិច្ចរបស់ខ្លួនឡើងវិញ ទោះបីមានការធ្លាក់ចុះករណីវីរុសក៏ដោយ។
ការនាំចេញសរុបរបស់ចិន បានកើនឡើងត្រឹមតែ១,៤ភាគរយ កាលពីខែមុនបន្ទាប់ពីការកើនឡើង៨,២ភាគរយ កាលពីខែមេសា និងធ្លាក់ចុះ១៣,៣ភាគរយ នៅក្នុងត្រីមាសទីមួយ។
លោក Larry Hu សេដ្ឋវិទូនៅក្រុមហ៊ុន Macquarie Group ក្នុងទីក្រុងហុងកុងបាននិយាយថា ការនាំចេញរបស់ចិនអាចចុះខ្សោយបន្ថែមទៀត នៅប៉ុន្មានខែខាងមុខនេះដោយសារល្បឿនយឺត នៃការស្តារឡើងវិញនៃវីរុសក្នុងចំណោមប្រទេសអភិវឌ្ឍន៍។
លោក Hu បានមានប្រសាសន៍ថា“ កុំរំពឹងថានឹងមានការស្ទុះងើបឡើងវិញខ្លាំង នៅក្នុងពាណិជ្ជកម្មក្រៅប្រទេស នៅពេលដែលពិភពលោកទាំងមូល ប្រឈមមុខនឹងការគំរាមកំហែង នៃការធ្លាក់ចុះសេដ្ឋកិច្ចដែលមានការអូសបន្លាយពេល” ។
លោក Bo Zhuang អ្នកវិភាគនៅក្រុមហ៊ុន TS Lombard បាននិយាយថា បញ្ហានេះបង្ហាញពីការខិតខំប្រឹងប្រែងរបស់ទីក្រុងប៉េកាំង ក្នុងការរៀបចំសម្រាប់ការប្រឈមមុខកាន់តែខ្លាំងឡើងជាមួយសហរដ្ឋអាមេរិក។
ទិន្នន័យគយបង្ហាញថា ការនាំចូលរ៉ែដែក និងស្ពាន់របស់ប្រទេសចិន ដែលត្រូវបានវាស់វែងដោយបរិមាណ បានកើនឡើង៣,៥ភាគរយ និង២១ភាគរយកាលពីខែមុនដោយសារការស្ថាបនាហេដ្ឋារចនាសម្ព័ន្ធ ដែលគាំទ្រដោយរដ្ឋាភិបាល ព្រោះវត្ថុធាតុដើមទាំងពីរនេះជាគ្រឿងផ្សំសំខាន់សម្រាប់វិស័យសំណង់៕ FINANCIAL TIMES
