ដោយ ហ្សូលី
ភ្នំពេញៈ បច្ចុប្បន្នប្រទេសកម្ពុជា មានភាពរីករាយដោយសារជំងឺ Covid-19 ក្នុងប្រទេសបានឈានចូលដល់សភាពធូរស្រាល និងមិនមានភាពធ្ងន់ធ្ងរ ដែលជាហេតុឱ្យសេដ្ឋកិច្ចមានសកម្មភាពតិចៗឡើងវិញ។
ក្នុងនោះវិស័យអចលនទ្រព្យ ធ្លាប់ជួបប្រទះភាពជាប់គាំងនោះ ក៏ត្រូវចាប់ផ្តើមមានដំណើរការស្វែងរកវិធីសាស្ត្រយ៉ាងណា ឱ្យទីផ្សារអចលនវត្ថុ ទៅដល់ដៃគោលដៅអតិថិជន។
ជាក់ស្តែងទាំងក្រុមហ៊ុនអចលនទ្រព្យក្តី ឬភ្នាក់ងារលក់អចលនទ្រព្យក្តី សុទ្ធតែមានគន្លឹះនៃការស្វែងរកទីផ្សាររៀងៗខ្លួន ប៉ុន្តែដើម្បីកាន់តែជោគជ័យ ចាំបាច់ត្រូវអភិវឌ្ឍចំនេះដឹងបន្ថែមឱ្យបានច្រើន។ ក្រៅពីថតវីដេអូ ថតរូប បញ្ជូនផលិតផលទៅដល់ដៃអតិថិជននោះ អ្នកលក់ត្រូវស្វែងរកប្រព័ន្ធផ្សព្វផ្សាយបន្ថែម ដែលអាចនាំឱ្យការផ្សាយលិតផលមានភាពទូលំទូលាយបន្ថែមទៀត។ ថ្វីត្បិតតែចំណាយប្រាក់កាស លើការផ្សព្វផ្សាយច្រើន ប៉ុន្តែលទ្ធផលត្រឡប់មកនោះ គឺពិតជាទទួលបានទ្វេរដង។
អត្ថប្រយោជន៍មានដូចជា អតិថិជនស្គាល់ច្រើន និងបង្កើនកេរ្តិ៍ឈ្មោះឱ្យមានវិជ្ជាជីវៈត្រឹមត្រូវផងដែរ។
លោកម៉ន សុខា អគ្គនាយកក្រុមហ៊ុនអចលនទ្រព្យ UTRUST បានមានប្រសាសន៍ថា តាមពិតការផ្សព្វផ្សាយមានច្រើនដូចជា ការប្រើប្រាស់បណ្តាញទំនាក់ទំនងសង្គមហ្វេសប៊ុក និងទំនាក់ទំនងផ្សេងៗទៀត។ អញ្ចឹងសកម្មភាពដែលត្រូវធ្វើ គឺត្រូវធ្វើសកម្មភាពប្រូម៉ូតផ្សព្វផ្សាយ តាមរយៈការថតវីដេអូឬក៏រូបភាពជាសន្លឹកៗ ដើម្បីផ្សព្វផ្សាយបញ្ជាក់ថា ស្ថានភាពបច្ចុប្បន្នគម្រោងអភិវឌ្ឍដល់ណា ច្បាស់លាស់កម្រិតណា។
យោងតាមគេហទំព័រ ចែករំលែកការលក់អចលនទ្រព្យមួយបានឱ្យដឹងថា អតិថិជនហាក់បីដូចជាមានការធុញទ្រាន់នឹងការផ្ញើសារសួរ ខលទូរសព្ទញឹកញាប់ ព្រោះនេះជាការរំខានមួយដែលអតិថិជនតែងរអ៊ូរទាំ។ ប៉ុន្តែពួកគេងាកត្រឡប់មកអានអត្ថបទបែបផ្សព្វផ្សាយ ដោយសារតែមានព័ត៌មានលម្អិត ភ្ជាប់ជាមួយរូបភាពនិងវីដេអូរួចស្រាប់។ កត្តានេះ អាចបណ្តារចិត្តអតិថិជនមានសក្តានុពលទិញ និងចាប់អារម្មណ៍ទៅលើក្រុមហ៊ុនអភិវឌ្ឍអចលនទ្រព្យនោះ។
គន្លឹះចំបងបន្ថែម ក្រុមហ៊ុនអភិវឌ្ឍអចលនទ្រព្យ និងភ្នាក់ងារលក់អចលនទ្រព្យត្រូវស្វែងយល់ថា តើអតិថិជនចង់បានអ្វី? តម្រូវការមានដូចម្តេចខ្លះ? ថ្វីត្បិតតែវិស័យអចលនទ្រព្យនៅតែមានចរន្តក្តី ប៉ុន្តែអតិថិជននៅតែស្វែងរក និងទាមទារការផ្តល់ជូនពិសេសពីក្រុមហ៊ុនអភិវឌ្ឍដដែល។
អ្នកជំនាញអចលនទ្រព្យ លោកស្រី តាំង ហ៊ួរ មានប្រសាសន៍ថា ម្ចាស់គម្រោងអចលនទ្រព្យនានា គួរណាតែមានការបញ្ចុះតម្លៃ ឬផ្តល់ជាតម្លៃពិសេសឱ្យអតិថិជន និងត្រូវសម្រួលដល់ការបង់ប្រាក់ ធ្វើយ៉ាងណាឱ្យមានភាពងាយស្រួល មានន័យថាម្ចាស់អចលនវត្ថុអនុញ្ញាតឱ្យអតិថិជនបង់តិច តែរយៈពេលយូរនោះ ច្បាស់ជាមានទីផ្សារវិញជាមិនខាន។
ដូច្នេះភ្នាក់ងារលក់អចលនទ្រព្យ គប្បីចេះស៊ើបសួរពីគម្រោង ទីតាំងមានសក្តានុពល តម្លៃថោកសមរម្យ ឬលក្ខខណ្ឌបង់ប្រាក់គ្មានភាពស្មុគស្មាញ ដល់អតិថិជននោះទើបអាចនាំឱ្យទីផ្សារ នៃការលក់អចលនទ្រព្យមានភាពកាន់តែរលូនស្រួល៕