ដោយ៖ វុត្ថា
ភ្នំពេញ៖ ក្រសួងសាធារណការ និងដឹកជញ្ជូន បានធ្វើការសាកល្បងក្បាលរថភ្លើងលើផ្លូវដែកថ្មីពីវត្តតាំងកសាង ចូលដល់ព្រលានយន្តហោះអន្តរជាតិភ្នំពេញហើយ ខណៈទូររថភ្លើងពិតប្រាកដនឹងមកដល់កម្ពុជានាពេលឆាប់ៗនេះ។
តាមការចុះផ្សាយពីគេហទំព័រហ្វេសបុក របស់ក្រសួងសាធារណៈការបានសរសេរថា “អស្ចារ្យ! ថ្ងៃ០១ មេសា ២០១៨ វេលាម៉ោង ១៤:៤៥នាទី នេះ ជាពេលវេលាដែររថភ្លើងដំបូងបង្អស់បានបើក ចូលទៅកាន់ស្ថានីទើបសាងសង់ថ្មីនៅអាកាសយានដ្ឋានអន្តរជាតិភ្នំពេញ!”។
ផ្លូវដែកឆ្លងកាត់តាមបណ្តោយមហាវិថីសហព័ន្ធរុស្ស៊ីនេះ មានប្រវែងប្រមាណ១៦០០ម៉ែត្រ តភ្ជាប់ពីផ្លូវដែកស្ថានីយ៍អាយស្ម័យានភ្នំពេញ ដែលមានស្រាប់ មកកាន់ស្ថានីយ៍ថ្មី នៅអាកាសយានដ្ឋានអន្តរជាតិភ្នំពេញ។ ជាមួយនឹងការដឹកជញ្ជូនថ្មីក្នុងរាជធានីភ្នំពេញនេះ នឹងជួយសម្រួលដល់អ្នកដំណើរ ទៅព្រលានយន្តហោះ មិនមានការព្រួយបារម្ភបញ្ហាកកស្ទះ និងគ្រោះថ្នាក់ចរាចរណ៍ឡើយ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានអោយដឹងកាលពីពេលថ្មីៗនេះថា ជាមួយនឹងការដឹកជញ្ជូនថ្មីក្នុងរាជធានីភ្នំពេញនេះ នឹងជួយសម្រួលដល់អ្នកដំណើរ ទៅព្រលានយន្តហោះ មិនមានការព្រួយបារម្ភបញ្ហាកកស្ទះ និងគ្រោះថ្នាក់ចរាចរណ៍ឡើយ។ លោកបន្តថា អ្វីដែលពិសេស គឺផ្លូវប្រមាណជាង១គីឡូម៉ែត្រនេះ នេះត្រូវពង្រីកទទឹងដល់ទៅ ១៤ម៉ែត្រ មានផ្លូវរថភ្លើងកណ្តាល បង្កប់ក្រោមថ្នល់បេតុង ដែលអនុញ្ញាតអោយយានយន្តធ្វើចរាចរណ៍ លើនោះបានដោយមិនមានការព្រួយបារម្ភ។ ដោយឡែកត្រង់កំណាត់ឆ្លងកាត់ផ្លូវសហព័ន្ធរុស្ស៊ី ត្រូវបានបង្កប់ក្នុងកៅស៊ូអេស៊ីផងដែរ។
រថភ្លើងដែលនឹងដាក់ដំណើរការផ្លូវការ គឺកំពុងរៀបចំនីតិវិធីនាំមកមកពីប្រទេស ម៉ិចស៊ីកូ មានបីការ៉ុង ផ្ទុកអ្នកដំណើរប្រមាណ១៥០នាក់ មានសុវត្ថិភាពខ្ពស់ និងផាសុខភាពក្នុងការធ្វើដំណើរ។
ក្រៅពីនេះក្រសួងក៏នឹងសិក្សាលទ្ធភាព ស្នើការសហការពីលេខាធិការដ្ឋានអាកាសចរណ៍ស៊ីវិល ដើម្បីអនុញ្ញាតអោយមានការកត់ត្រាចូល (Check in) អីវ៉ានរបស់អ្នកដំណើរតាមយន្តហោះ ពីស្ថានីយ៍រថភ្លើងភ្នំពេញ ដើម្បីដឹកជញ្ជូនអីវ៉ានតាមរថភ្លើងដាក់ចូលក្នុងយន្តហោះតែម្តង៕
