ដោយៈ ហ្សូលី
ភ្នំពេញៈ កម្ពុជាបាននាំចេញកង់ដែលតម្លើង នៅក្នុងប្រទេសកម្ពុជាទៅកាន់ទីផ្សារបរទេសសម្រេចបានជិត២០០លានដុល្លារ គិតត្រឹមរយៈពេល៥ខែ នៃឆ្នាំ២០២០នេះ កើនឡើងប្រមាណ១៩ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ២០១៩។
យោងតាមតួលេខ ដែលទទួលបានពីនាយកដ្ឋានគយបានបង្ហាញថា ចាប់តាំងពីខែមករា រហូតមកដល់ខែឧសភា កម្ពុជាបាននាំចេញកង់ទៅកាន់បណ្តាប្រទេសផ្សេងៗបានចំណូល ១៩៧ លានដុល្លារ កើនឡើង២៦ភាគរយ។
ទីផ្សារដែលនាំមុខគេ និងមានសារៈសំខាន់បំផុតសម្រាប់កម្ពុជាក្នុងការនាំចេញកង់គឺសហភាពអ៉ឺរ៉ុប បន្ទាប់មកគឺសហរដ្ឋអាមេរិក ប្រទេសអង់គ្លេស និងជប៉ុន។ កង់ចំនួន ៤៩៥,៣៤១គ្រឿង បានដឹកជញ្ជូនទៅកាន់សហភាពអ៉ឺរ៉ុប ស្មើទឹកប្រាក់ប្រមាណ១១៩លានដុល្លារ ហើយនាំចេញទៅកាន់អាមេរិកចំនួន២២៣,៩១២គ្រឿង ស្មើនឹងទឹកប្រាក់ប្រមាណ៤៤លានដុល្លារ។
ទន្ទឹមនេះកង់ចំនួន១២៥,៦០២គ្រឿង ស្មើនឹងទឹកប្រាក់ចំនួន២៥លានដុល្លារ បាននាំចេញទៅកាន់ចក្រភពអង់គ្លេស ខណៈដែលកង់ចំនួន៣៣៨គ្រឿងផ្សេងទៀត ដែលស្មើនឹងទឹកប្រាក់ជាង៩ម៉ឺនដុល្លារ បាននាំចេញទៅកាន់ប្រទេសជប៉ុន។ ក្រៅពីប្រទេសខាងលើ កម្ពុជាបាននាំចេញទៅកាន់ទីផ្សារបណ្តារប្រទេសនានា រកចំណូលបានប្រហែល ៨លានដុល្លារ។
ការតម្លើងកង់បានទាក់ទាញសង្វាក់ផលិតកម្មពិភពលោក និងរោងចក្រគ្រឿងបន្លាស់នៅក្រៅប្រទេស ឱ្យចូលមកវិនិយោគនៅប្រទេសកម្ពុជាកាន់តែច្រើន ជាពិសេសស្ថិតនៅតំបន់សេដ្ឋកិច្ចពិសេសនៅក្រុងបាវិត ខេត្តស្វាយរៀង។
កាលពីឆ្នាំមុន កម្ពុជារកចំណូលបានពីការនាំចេញកង់ ទៅកាន់ទីផ្សារបរទេសស្មើនឹងទឹកប្រាក់ចំនួន៤១៨លានដុល្លារ កើនឡើងច្រើនបើធៀបនឹងឆ្នាំ២០១៨ ដែលរកចំណូលបានត្រឹម ៣៣១លានដុល្លារតែប៉ុណ្ណោះ៕
