ដោយវុត្ថា
ភ្នំពេញៈ សមាគមធុរកិច្ចជប៉ុននៅកម្ពុជា និងសភាពាណិជ្ជកម្មក្ពុជាគ្រោងចុះញ្ញាតិរួមគ្នា ដើម្បីស្នើសុំឱ្យក្រុមហ៊ុនអាកាសចរណ៍ANA របស់ជប៉ុន បន្តប្រតិបត្តិការនៃជើងហោះហើរត្រង់មកកាន់កម្ពុជា ដែលនឹងផ្ដល់អត្ថប្រយោជន៍យ៉ាងខ្លាំង ដល់វិស័យទេសចរណ៍ វប្បធម៌ និងធុរកិច្ចរវាងប្រទេសកម្ពុជា-ជប៉ុន។
គម្រោងស្នើសុំនេះ ត្រូវបានធ្វើឡើងនៅក្នុងជំនួបពិភាក្សាការងាររវាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងលោកកាន់ដា យូហ្គោ ប្រធានសមាគមធុរកិច្ចជប៉ុននៅកម្ពុជា និងក្រុមការងារ នាថ្ងៃទី២៦ ខែមិថុនា ឆ្នាំ ២០២០នេះ ។
សមាគមធុរកិច្ចជប៉ុននៅកម្ពុជា កាលពីពេលថ្មីៗនេះ បានចេញសេចក្តីអំពាវនាវ និងសំណូមពរសុំការគាំទ្រ ពីសំណាក់សមាជិករបស់ខ្លួននៅកម្ពុជា ស្នើដល់ក្រុមហ៊ុនអាកាសចរណ៍ជប៉ុន ANA បន្តធ្វើការហោះហើរត្រង់រវាងភ្នំពេញ-ណារីតា ឡើងវិញមុនពេលកំណត់ បន្ទាប់ពីក្រុមហ៊ុនមួយនេះ បានប្រកាសផ្អាកដំណើរការ រហូតដល់ដំណាច់ខែក ក្កដា ឆ្នាំ២០២០ខាងមុខនេះ។
តាមរយៈសេចក្ដីអំពាវនាវនេះបានបញ្ជាក់ថា ក្រុមហ៊ុនអាកាសចរណ៍ All Nippon Airways (ANA) បានប្រកាសនៅថ្ងៃទី៩ ខែមិថុនា ឆ្នាំ ២០២០ស្ដីអំ ពីការពន្យាររយៈពេលផ្អាកជើងហោះហើរត្រង់ភ្នំពេញ-ណារីតា រហូតដល់ថ្ងៃទី៣១ ខែកក្កដា ឆ្នាំ ២០២០ ដែលនេះអាចនឹងជះឥទ្ធិពលអវិជ្ជមាន មួយចំនួននាពេលពេលអនាគត ដល់ការធ្វើដំណើរទៅវិញទៅមក របស់មនុស្សជាច្រើនដែលពាក់ព័ន្ធ ជាមួយប្រទេសទាំងពីរនិងអាចផ្ដល់ផលលំបាកផ្សេងៗ ចំពោះជីវភាពប្រចាំថ្ងៃ រួមទាំងការងាររបស់ពួកគេ។
ក្រុមហ៊ុនANA Holdings បានប្រកាសកាត់បន្ថយទិសដៅហោះហើរ មួយចំនួនដែលមិនសូវទទួលបានផលចំណេញ និងគុណប្រយោជន៍ ដោយសំអាងទៅលើជើងហោះហើរអន្តរជាតិ ដែលតម្រូវការមានការថយចុះយ៉ាងគំហុក ដោយសារការជះឥទ្ធិពលអវិជ្ជមាននៃវីរុសកូរ៉ូណាប្រភេទថ្មី(COVID-19) ព្រមទាំងនៅពេលអនាគតនឹងមានការចេញដោយជាក់លាក់នូវការកាត់បន្ថយទិសដៅហោះហើរ និងប្រកាសជាសាធារណៈអំពីផែនការអាជីវកម្មថ្មីនៅចុងខែកក្កដា ឆ្នាំ ២០២០។
សភាពាណិជ្ជកម្មកម្ពុជា និង សមាគមធុរកិច្ចជប៉ុននៅកម្ពុជា បានចុះអនុស្សារណៈយោគយល់ជាមួយគ្នាកាលពីថ្ងៃទី២៦ ខែវិច្ឆិកា ឆ្នាំ២០១៨ ដើម្បីលើកកម្ពស់កិច្ចសហប្រតិបត្តិការរវាងស្ថាប័នទាំងពីរ និងពង្រឹងទំនាក់ទំនងធុរកិច្ចសម្រាប់វិស័យឯកជន។
អ្នកឧកញ៉ា និងលោក កាន់ដា យូហ្គា ក៏បានពិភាក្សាលើចំណុចសំខាន់ៗខាងក្រោម៖• ការបង្កើនកិច្ចសហប្រតិបត្តិការរវាងស្ថាប័ននិងស្ថាប័ន ជាពិសេស រវាងសមាជិកនិងសមាជិក ស្របតាមក្របខណ្ឌកិច្ចសហប្រតិបត្តិការមេគង្គ-ជប៉ុន។• កិច្ចសហការលើវិស័យធុរកិច្ចឌីជីថល ដើម្បីជំរុញឱ្យទំនាក់ទំនងធុរកិច្ចរវាងប្រទេសទាំងពីរ កាន់តែមានប្រសិទ្ធភាពទ្វេរដង៕
