ដោយ ៖ វុត្ថា
ភ្នំពេញ ៖ ក្រុមហ៊ុនបដិសណ្ឋារកិច្ចដ៏ធំរបស់អាមេរិក Hilton ដែលបម្រើក្នុងវិស័យបដិសណ្ឋារកិច្ចដ៏ល្បីឈ្មោះមួយនៅលើពិភពលោក បានប្រកាសចុះហត្ថលេខាលើកិច្ចព្រមព្រៀងគ្រប់គ្រងជាមួយក្រុមហ៊ុនអភិវឌ្ឍន៍អចលនទ្រព្យក្រុមហ៊ុន GFC Company Limited ដើម្បីដំណើរការសណ្ឋាគារថ្មីនៅចំកណ្តាលរាជធានីភ្នំពេញ។
តាមការចុះផ្សាយគេហទំព័រ Hospitalitynet នៅថ្ងៃទី២៥ ខែកក្កដា ឆ្នាំ២០២០នេះ បានឱ្យដឹងថា គម្រោងសណ្ឋាគារនេះ គឺ
ជាផ្នែកមួយនៃការអភិវឌ្ឍរបស់ក្រុមហ៊ុនស្ថិតក្នុងផែនការដោយការដាក់ឈ្មោះពាណិជ្ជកម្ម Hilton Phnom Penh គ្រោងដំណើរការនៅឆ្នាំ ២០២២ ដែលមាន ២៨០ បន្ទប់ ។
សណ្ឋាគារនេះស្ថិតនៅចម្ងាយប្រមាណ៩ គីឡូម៉ែត្រពីអាកាសយានដ្ឋានអន្តរជាតិភ្នំពេញ ពោលគឺនៅជិតទីតាំងល្បីៗ មួយចំនួនរបស់រាជធានីដូចជាផ្សារកណ្តាល ផ្សារថ្មី និងអគារ Vattanac Capital Tower ជាដើម។
សណ្ឋាគារ Hilton Phnom Penh នឹងចូលរួមលើកស្ទួយវិស័យបដិសណ្ឋារកិច្ចនៅកម្ពុជា ដែលជាបណ្តុំភោជនីយដ្ឋាន ហាងកាហ្វេ បារ និងកន្លែងទទួលភ្ញៀវ ដើម្បីបំពេញតាមចំណង់ចំណូលចិត្តរបស់អតិថិជន។ ក្រៅពីនេះ ក៏មានកន្លែងប្រជុំ និងកន្លែងរៀបចំព្រឹត្តិការណ៍នានាដែលមានទីតាំង ១៥០០ ម៉ែត្រក្រឡារួមទាំងបន្ទប់រួមដែលមានទំហំ ៨៧៥ ម៉ែត្រក្រឡា។សណ្ឋាគារនេះក៏នឹងមានកន្លែងជួបជុំពិភាក្សាលើជំនួញ មជ្ឈមណ្ឌលហាត់ប្រាណ និងអាងហែលទឹកផងដែរ។
សណ្ឋាគារ Hilton គឺជានិមិត្តសញ្ញាដ៏ល្បីល្បាញរបស់សហរដ្ឋអាមេរិកដែលបំរើដល់វិស័យសណ្ឋាគារ និងបដិសណ្ឋារកិច្ច នៅទូទាំងពិភពលោក៕
