រដ្ឋមន្ត្រីថៃ ៖ ថៃ និងកម្ពុជា នឹងបន្តពិភាក្សាដោះស្រាយជម្លោះលើប្លុកប្រេងត្រួតស៊ីគ្នា

ដោយ ៖ ប៊ី

ភ្នំពេញ៖ រដ្ឋមន្រ្តីក្រសួងថាមពលប្រទេសថៃ លោក Sontirat Sontijirawong រំពឹងថានឹងមានកិច្ចពិភាក្សាបន្តដើម្បីដោះស្រាយជម្លោះនៃប្លុកប្រេងនៅដែនសមុទ្រត្រួតស៊ីគ្នារវាងកម្ពុជា និងថៃ បន្ទាប់ពីការពន្យាពេល ២០ ឆ្នាំ។

ប្លុកប្រេងកាតនៅដែនសមុទ្រនេះ បង្កើតជាជម្លោះជាយូររវាងប្រទេសថៃ និងប្រទេសកម្ពុជា ដោយភាគីទាំងពីរអះអាងថាជាកម្មសិទ្ធិរបស់ខ្លួន។ នេះបើយោងតាមការកាសែតបាងកកប៉ុស្តិ៍ចុះផ្សាយនៅក្នុងសប្តាហ៍នេះ។

តែទោះជាយ៉ាងក៏ដោយ កិច្ចពិភាក្សាលើការដោះស្រាយជម្លោះនៃប្លុកប្រេងនៅដែនសមុទ្រត្រួតស៊ីគ្នារវាងកម្ពុជាមិនត្រូវបានបញ្ជាក់ពេលវេលាច្បាស់លាស់ឡើយ។

ប្រទេសថៃ និងប្រទេសកម្ពុជាបានជាប់គាំងក្នុងជម្លោះលើផ្ទៃទឹកទំហំប្រហែល ២៧.០០០ គីឡូម៉ែត្រការ៉េដែលផ្ទុកដោយប្រេង និងឧស្ម័នជាច្រើន។

នៅឆ្នាំ ២០១៩ ប្រទេសថៃ និងកម្ពុជាបានឈានដល់កិច្ចព្រមព្រៀង ដើម្បីបន្តកិច្ចពិភាក្សាឡើងវិញនៅឯកិច្ចប្រជុំរវាងក្រសួងរ៉ែ និងថាមពលកម្ពុជា និងក្រសួងថាមពលថៃ ដែលរៀបចំឡើងនៅទីក្រុងបាងកក។

បន្ទាប់ពីរយៈពេលជិត ២ ទសវត្សនៃជាប់គាំង ប្រទេសកម្ពុជា និងថៃបានយល់ព្រមបន្តការពិភាក្សាស្តីពីការអភិវឌ្ឍតំបន់ត្រួតស៊ីគ្នា (OCA) ដោយឈរលើគោលការណ៍ ដែលវាគួរតែត្រូវបានអភិវឌ្ឍដោយផ្អែកលើផលប្រយោជន៍ទៅវិញទៅមក៕