ដោយ ៖ រ៉ាណេត
ភ្នំពេញ ៖ ជាមួយនឹងកំណើននៃចំនួនគម្រោងអភិវឌ្ឍន៍លំនៅឋានបែបទំនើបជាច្រើនកំពុងមមាញឹកក្នុងការសាងសង់ ដើម្បីបំពេញតម្រូវការស្នាក់នៅ ស្ថិតនៅតំបន់ផ្លូវជាតិលេខ១ បច្ចុប្បន្នក៏មានគម្រោងផ្សារសហគមន៍មិនតិចជាង៤គម្រោងនោះទេដែលកំពុង និងត្រៀបបង្ហាញខ្លួនក្នុងឆាប់ៗខាងមុខនេះ។
ចាប់ពីចំណុចគល់ស្ពានច្បារអំពៅតាមផ្លូវបណ្តោយជាតិលេខ១ បច្ចុប្បន្ននេះហាក់មិនមានផ្ទៃដីធំ និងទំនេរនោះទេ ពោលគឺត្រូវបានអភិវឌ្ឍន៍ជាសំណង់អាគារពាណិជ្ជកម្មផ្សេងៗក្រោមការវិនិយោគពីវិស័យឯកជន ហើយក៍អាចវិនិយោគទៅលើវិស័យលំនៅដ្ឋានដែលមានតម្លៃត្រឹមក្រោម២០ម៉ឺនដុល្លារទៀតនោះដែរ។ នេះបើតាមការអះអាងពីសំណាក់លោក អ៊ិន ណាង អគ្គនាយកក្រុមហ៊ុនអចលនទ្រព្យ Show Up Real Estate នៅព្រឹកថ្ងៃទី២៥ ខែកក្កដា ឆ្នាំ២០២០នេះ។
លោក អ៊ិន ណាង បានបន្តថា “ត្រឹមចម្ងាយប្រមាណ១០គីឡូម៉ែត្ររាប់ពីចំណុចគល់ស្ពានច្បារអំពៅ គឺមានគម្រោងអភិវឌ្ឍន៍ជាច្រើនកំពុងតែមានសកម្មភាពដែលភាគច្រើនគម្រោងទាំងអស់នេះត្រូវបានអ្នកអភិវឌ្ឍន៍ទិញទុកតាំងពីប៉ុន្មានឆ្នាំមុន ដែលតម្លៃដីនៅមានកម្រិត”។ លោកបន្តថា “តំបន់នៅអមសងខាងផ្លូវជាតិលេខ១ ភាគច្រើនត្រូវបានអភិវឌ្ឍន៍ទៅជាមណ្ឌលពាណិជ្ជកម្មកម្រិតមធ្យម ហើយបន្តិចទៀតប្រភេទអាជីវកម្មខ្នាតតូចអាចនឹងត្រូវបានជំនួសដោយប្រភេទផ្សារសហគមន៍តែម្ដង”។
ស្រដៀងទៅនឹងការលើកឡើងខាងលើនេះ នៅតាមបណ្តោយផ្លូវជាតិលេខ១ ក្រៅពីមានមជ្ឈមណ្ឌលពាណិជ្ជកម្មមួយចំនួន គេឃើញមានគម្រោងផ្សារសហគមន៍ជាច្រើនកំពុងតែមានប្រតិបត្តិការ រួមជាមួយនឹងគម្រោងថ្មីៗមួយចំនួនត្រៀមនឹងបង្ហាញខ្លួនក្នុងពេលដ៏ខ្លីខាងមុខនេះ។ បណ្តុំអាជីវកម្មកម្រិតមធ្យម និងកម្រិតខ្ពស់ ដែលកំពុងបង្ហាញវត្តមាននៅពេលបច្ចុប្បន្ន រួមមានបណ្តុំហាង និងអាហារដ្ឋាន THE PARK បណ្តុំអាហារដ្ឋានមន្ទីរពេទ្យជោរៃ ផ្សារសហគមន៍បឹងឫស្សី គម្រោងផ្សារសហគមន៍បឹងស្នោរហ្វូដ គម្រោងផ្សារទំនើបបុរីប៉េងហួត រួមជាមួយនឹងគម្រោងបង្កើតតំបន់ពាណិជ្ជកម្មចម្រុះខ្នាតមធ្យមផ្សេងទៀតដែលស្ថិតនៅជិតផ្សារព្រែកឯង។
អគ្គនាយកក្រុមហ៊ុនភ្នាក់ងារអចលនទ្រព្យ Easy Property Investment លោក ម៉ម សិរីបញ្ញា បានមានប្រសាសន៍ថា ចំនួននៃគម្រោងមណ្ឌលពាណិជ្ជកម្ម និងផ្សារសហគមន៍ទាំងនេះហាក់នៅមិនទាន់គ្រប់គ្រាន់ទៅនឹងតម្រូវការនោះឡើយនោះទេ បើប្រៀបទៅនឹងកំណើននៃចំនួនមនុស្សដែលចូលទៅរស់នៅក្នុងតំបន់ខាងលើនេះ។
លោកបានបញ្ជាក់ថា “ត្រឹមតែគម្រោងរបស់បុរី ប៉េង ហួត ដែលមានវិសាលភាពរហូតដល់ប្រមាណ៥០០ហិកតា មានលំនៅដ្ឋានរាប់ម៉ឺនខ្នង ហើយនៅមានបណ្តុំលំនៅដ្ឋានទួលស្បូវ ព្រមទាំងបុរីកម្រិតមធ្យមជាច្រើនគម្រោងទៀត ដែលពោរពេញទៅដោយការរស់នៅរបស់អ្នកមានកម្រិតជីវភាពមធ្យម និងលើមធ្យម ហើយទាំងអស់នេះហើយដែលជាហេតុផលជម្រុញឱ្យមានការបង្កើតបណ្តុំហាងអាហារដ្ឋានបែបទំនើប គម្រោងផ្សារទំនើប និងផ្សារសហគមន៍ ក៏ដូចជាមណ្ឌលពាណិជ្ជកម្មខ្នាតមធ្យម”។
លោក ម៉ម សិរីបញ្ញា បានមានប្រសាសន៍បន្តទៀតថា “រាល់ការអភិវឌ្ឍន៍ទាំងអស់ខាងលើនេះ គឺសុទ្ធតែធ្វើឡើងដើម្បីឆ្លើយតបទៅនឹងតម្រូវការជាក់ស្ដែង ហើយនៅពេលខាងមុខនេះ ខ្ញុំជឿថា នឹងមានការអភិវឌ្ឍជាងនេះបន្ថែមទៀត ជាពិសេសក្រោយពេលគម្រោងដ៏ធំដែលមានតម្លៃរាប់ពាន់លានដុល្លាររបស់ក្រុមហ៊ុន OCICលេចចេញជារូបរាងឡើង ខណៈដែលបច្ចុប្បន្នកំពុងតែចាប់ផ្តើមអនុវត្តជំហានដំបូងដោយការចាក់ដីនៅតាមច្រាំងទន្លេក្នុងតំបន់កោះនរាហ៍ដើម្បីបង្កើតជាទីក្រុងទំនើបមួយទៀតដែលតភ្ជាប់ទៅ
