ដោយ៖ ប៊ី
វ៉ាស៊ីនតោនៈ ទីប្រឹក្សាសេដ្ឋកិច្ចជាន់ខ្ពស់នៃសេតវិមាន បានព្យាករណ៍កាលពីថ្ងៃអាទិត្យថា សេដ្ឋកិច្ចសហរដ្ឋអាមេរិក នឹងសម្រេចបានកំណើន២០ភាគរយ នៅក្នុងត្រីមាសទី៣ និងទី៤ឆ្នាំនេះ បើទោះជាមានបញ្ហាផ្ទុះឡើងជាថ្មីនៃជំងឺ COVID-19 ក៏ដោយ។
លោក Larry Kudlow ទីប្រឹក្សាសេដ្ឋកិច្ចជាន់ខ្ពស់ បាននិយាយនៅលើបណ្តាញទូរទស្សន៍ CNN ថា “ខ្ញុំមិនបដិសេធថា រដ្ឋមួយចំនួនមិនទាន់ងើបឡើងវិញនោះទេ ប៉ុន្តែចំពោះរូបភាពទាំងមូលគឺវិជ្ជមាន” ។ លោកថា “ខ្ញុំនៅតែគិតថាការស្ទុះងើបឡើងវិញ នៃរាងអក្សរVកំពុងដំណើរការ ហើយខ្ញុំនៅតែគិតថា នឹងមានអត្រាកំណើន២០ភាគរយ នៅក្នុងត្រីមាសទី ៣ និងទី ៤” ។
រដ្ឋបាលប្រទេសនេះ កាលពីថ្ងៃព្រហស្បតិ៍ គ្រោងនឹងធ្វើការផ្សព្វផ្សាយជាសាធារណៈនូវការប៉ាន់ស្មានលើកដំបូង នៃផលិតផលស្រុកសរុបនៅក្នុងត្រីមាសទី២ ជារយៈពេលមួយដែលសេដ្ឋកិច្ចបានបិទនៅ ដើម្បីទប់ស្កាត់ការរីករាលដាលនៃជំងឺ COVID-19 ។
មូលនិធិរូបិយវត្ថុអន្តរជាតិ (IMF) បានប៉ាន់ប្រមាណថា ក្នុងអំឡុងពេលខែមេសាដល់ខែមិថុនា ផលិតផលក្នុងស្រុកសរុបរបស់អាមេរិកបានធ្លាក់ចុះ៣៧ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
ទោះបីជាយ៉ាងក៏ដោយ ក៏ធនាគារកណ្តាលរបស់សហរដ្ឋអាមេរិក បានព្រមានអំពីការរំពឹងទុកនៃការងើបឡើងវិញ នៃសេដ្ឋកិច្ចនៅពាក់កណ្តាលឆ្នាំនេះ។
សម្រាប់ឆ្នាំ២០២០រំពឹងថា ផលិតផលក្នុងស្រុកសរុបនឹងធ្លាក់ចុះ៦,៥ ភាគរយ។
សហរដ្ឋអាមេរិកបានធ្លាក់ចូលក្នុងវិបត្តិសេដ្ឋកិច្ច ក្នុងខែកុម្ភៈឆ្នាំ២០២០ ប៉ុន្តែដើម្បីដោះស្រាយវិបត្ដិសុខភាពនេះ សភាអាមេរិកនៅចុងខែមីនាបានអនុម័ត កញ្ចប់ជំនួយស ង្គ្រោះសេដ្ឋកិច្ចចំនួន២,២ ទ្រីលានដុល្លារអាមេរិកហៅថាកញ្ចប់ Cares Act។ កញ្ចប់ថវិកានេះរួមបញ្ចូលទាំងការត្រួតពិនិត្យដោយផ្ទាល់ ដល់ជនជាតិអាមេរិក និងថវិកាចំនួន៣៤៩ ពាន់លានដុល្លារអាមេរិក ដើម្បីគាំទ្រដល់អាជីវកម្មខ្នាតតូច និងមធ្យម។
កញ្ចប់ជំនួយលើកទី២ សរុបជិត៥០០លានដុល្លារអាមេរិក ត្រូវបានបញ្ចប់នៅខែមេសា។ អត្ថប្រយោជន៍សម្រាប់ភាពអត់ការងារ បានកើនឡើងចំនួន៦០០ដុល្លារ ក្នុងមួយសប្តាហ៍ ដែលជាផ្នែកមួយនៃកិច្ចខិតខំប្រឹងប្រែង ដើម្បីការពារបុគ្គលក្នុងពេលមានវិបត្តិ។ ប៉ុន្តែវិធានការណ៍នេះនឹងផុតកំណត់នៅថ្ងៃសុក្រកន្លងមកនេះ៕
