ដោយៈ រ៉ាណេត
កណ្តាលៈអាជ្ញាធរខេត្តកណ្តាល បានធ្វើការក្រើនរំលឹកទៅដល់ប្រជាពលរដ្ឋនៅទូទាំងខេត្តទាំងអស់ ត្រូវយកចិត្តទុកដាក់ពិនិត្យមើលទិន្នន័យក្បាលដី របស់ខ្លួនឱ្យបានច្បាស់លាស់ជៀសវាងខុសកម្មសិទ្ធិ និងអាចខាតបង់ដោយប្រការណាមួយ។
មន្ត្រីមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្តាល លោក ព្រំ ឆាត នៅថ្ងៃទី៣១ ខែកក្កដា ឆ្នាំ២០២០ បានអំពាវនាវឱ្យប្រជាពលរដ្ឋមកពិនិត្យមើលទិន្នន័យក្បាលដីរបស់ខ្លួនឲ្យបានច្បាស់លាស់ ជៀសវាងខុសកម្មសិទ្ធិរួមជារបស់ប្តី របស់ប្រពន្ធ ជារបស់ឪពុកម្តាយខុសឈ្មោះ ថ្ងៃខែឆ្នាំកំណើត ឬបាត់ទំហំដីជាដើម ដើម្បីសម្រួលឲ្យមន្ត្រីជំនាញ ធ្វើការកែសម្រួលឡើងវិញឲ្យបានត្រឹមត្រូវ មានមានតម្លាភាព និងពន្លឿនដល់ការចេញ ប័ណ្ណកម្មសិទ្ធិប្រើប្រាស់ស្របច្បាប់។
នៅក្នុងឱកាស លោកបានបញ្ជាក់ថា នេះជាដំណាក់កាលចុងក្រោយហើយ មុននឹងយកទិន្នន័យ ដែលបានបិទផ្សាយនេះទៅបោះពុម្ពជាប័ណ្ណកម្មសិទ្ធិ ប្រគល់ជូនបងប្អូនប្រជាពលរដ្ឋ ហើយការបិទផ្សាយក្បាលដីនេះ គឺមានរយៈពេលតែ១៥ថ្ងៃប៉ុណ្ណោះ។ ក្នុងរយៈពេលនេះ បងប្អូនប្រជាពលរដ្ឋអាចប្តឹង ឬជំទាស់តវ៉ាបានមកក្រុមមន្ត្រីជំនាញ ដែលនៅប្រចាំការជាប្រចាំគិតទាំងថ្ងៃឈប់សម្រាក់ ប្រសិនបើក្នុងករណីរកឃើញថា មានកំហុសណាមួយលើទិន្ន័យក្បាលរបស់ខ្លួន ដើម្បីឱ្យមន្ត្រីជំនាញធ្វើការងារ កែសម្រួលឲ្យត្រឹមត្រូវឡើងវិញ។
ការអំពាវនាវខាងលើនេះ ត្រូវបានធ្វើឱ្យឡើងនៅភូមិព្រៃធំ ស្រុកខ្សាច់កណ្តាល ខេត្តកណ្តាល ក្នុងឱកាសបិទផ្សាយជាសាធារណៈ នូវឯកសារនៃការវិនិច្ឆ័យ ក្នុងការចុះបញ្ជីដីធ្លី ដែលមានលក្ខណៈជាប្រព័ន្ធចំនួន៦៧១ក្បាលដី។
ការចុះបញ្ជីរក្បាលដីមានលក្ខណៈជាប្រព័ន្ធ គឺពិតជាមានសារៈសំខាន់ណាស់ក្នុងដំណើរនៃការចេញប័ណ្ណកម្មសិទ្ធិដីធ្លី ជូនប្រជាពលរដ្ឋបានត្រឹមត្រូវ ដើម្បីការបង្កើនសុវត្ថិភាពលើការកាន់កាប់ និងប្រើប្រាស់ដីធ្លីស្របច្បាប់ ស្របតាមប្លង់គោល និងប្លង់ហេដ្ឋារចនាសម្ព័ន្ធរបស់ស្រុក កាត់បន្ថយទំនាស់ដីធ្លី ធ្វើឱ្យដីមានតម្លៃងាយស្រួ លក្នុងការទិញលក់។
ជាមួយគ្នានេះ ដើម្បីឱ្យដំណើរការនៃការបិទផ្សាយទិន្នន័យ ចុះបញ្ជីរក្បាលដីនេះមានភាពរលូន អាជ្ញាធរមូលដ្ឋានត្រូវផ្តល់កិច្ចសហការ ឱ្យបានជាប់ជាប្រចាំជាមួយមន្រ្តីជំនាញ និងប្រជាពលរដ្ឋជាម្ចាស់ដី ក្នុងការជួយពិនិត្យនូវទិន្ន័យក្បាលដីឱ្យបានត្រឹមត្រូវ និងច្បាស់លាស់៕
