ដោយ ៖ វុត្ថា
ភ្នំពេញ ៖ ក្រុមហ៊ុន ធៀន ធៀន ជាក្រុមហ៊ុនដ៏ធំមួយរបស់ប្រទេសចិន គ្រោងចូលរួមវិនិយោគលើគម្រោងប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់កម្ពុជាចេញទៅទីផ្សារនៃប្រទេសចិនបន្ថែម ខណៈភាគីចិនកន្លងមកនេះបានបង្កើនបរិមាណនៃការនាំចូលអង្ករកម្ពុជារហូតដល់ ៥០០ពាន់តោន និងថ្មីៗនេះបានអនុញ្ញាតឱ្យកម្ពុជានាំចេញចេកអំបូងលឿង និងស្វាយស្រស់ផងដែរ។
នៅក្នុងជំនួបពិភាក្សាជាមួយលោក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីពីម្សិលមិញនេះ លោក Wang Bingham អគ្គនាយកក្រុមហ៊ុន ធៀន ធៀន ឱ្យដឹងថា បន្ទាប់ពីបានទស្សនកិច្ចសិក្សាស្វែងយល់អំពីផលិតផល និងគុណភាពនៃផ្លែស្វាយ មៀន ខ្នុរ ធុរេន ដូងក្រអូប និងក្រូចថ្លុងរបស់កម្ពុជាមានទីផ្សារនៅក្នុងប្រទេសចិន។
លោកបន្តថា ដោយមើលឃើញពីសក្តានុពលនេះ លោកពិតជាមានការជឿជាក់ថានឹងទទួលការគាំទ្រ និងមានទីផ្សារខ្ពស់នៅប្រទេចិននាពេលដែលក្រុមហ៊ុនដាក់លក់នៅលើប្រព័ន្ធទីផ្សារពាណិជ្ជកម្មព័ត៌មានវិជ្ជាផ្ទាល់របស់ក្រុមហ៊ុន។
លោកបន្ថែមថា ដើម្បីឱ្យគម្រោនេះទទួលបានជោគជ័យ លោកបានស្នើសុំយោបល់ និងអនុសាសន៍ពីកម្ពុជាពាក់ព័ន្ធនឹងទីផ្សារប្រមូលទិញ និងនីតិវិធីនៃការនាំចេញផលិតផលខាងលើទៅប្រទេសចិន។
លោក វេង សាខុន រដ្ឋមន្ត្រីក្រសួងរុក្ខាប្រមញ្ញ និងនេសាទ បានសម្តែងការស្វាគមន៍ និងគាំទ្រចំពោះក្រុមហ៊ុនដែលមាបំណងពាក់ព័ន្ធនឹងគម្រោងវិនិយោគប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់កម្ពុជាចេញទៅប្រទេសចិន។
លោករដ្ឋមន្ត្រី ថា គម្រោងវិនិយោគនេះគឺពិតជាស្របតាមផែនការអភិវឌ្ឍវិស័យកសិកម្មរបស់ក្រសួងក្នុងការជំរុញផលិតកម្មកសិកម្មក្នុងស្រុកតាមរយៈការធ្វើទំនើបកម្មកសិកម្ម ការកែច្នៃ វេចខ្ចប់ និងនាំចេញ ដែលទាំងអស់នេះនឹងជួយជំរុញសេដ្ឋកិច្ចជាតិ។
លោករដ្ឋមន្ត្រីក៏បានស្នើដល់ក្រុមហ៊ុនសហការជាមួយស្ថានទូតចិនប្រចាំកម្ពុជា អគ្គនាយកដ្ឋានកសិកម្ម នាយកដ្ឋានសហប្រតិបត្តិកាអន្តរជាតិ និងនាយកដ្ឋានកសិឧស្សាហកម្ម សិក្សាស្វែងយល់បន្ថែមអំពីសក្តានុពុលនៃផលិតកម្មឈើហូបផ្លៃខាងលើ រួចរៀបចំចុះអនុស្សារណៈនៃការយោគយល់គ្នាជាមួយក្រសួង ដើម្បីក្រសួងមានលទ្ធភាពអាចជួយសម្របសម្រួលក្នុងការធ្វើផលិតកម្មកសិកម្មតាមកិច្ចសន្យាជាមួយសហគមន៍ និងជាពិសេសនីតិវិធីនៃការនាំចេញ៕
