ដោយៈប៊ី
ភ្នំពេញៈ ក្រុមហ៊ុន TADA ជាក្រុមហ៊ុនកូរ៉េ គ្រោងបោះទុនវិនិយោគបន្ថែមជាង២០លានដុល្លារ ដើម្បីផលិតកង់បីដោយប្រើប្រាស់អគ្គិសនី ក្នុងការផ្គត់ផ្គង់ដល់កម្ពុជានិងបណ្តាប្រទេសដទៃទៀតនៅក្នុងអាស៊ាន។
ឯកអគ្គរាជទូតកម្ពុជាប្រចាំនៅក្នុងប្រទេសកូរ៉េ លោក ឡុង ឌីម៉ង់ បានសរសេលើគណនីបណ្តាញសង្គមនៅល្ងាចទី៧ ខែកញ្ញា ឆ្នាំ២០២០កន្លងមកថា លោកអគ្គនាយកក្រុមហ៊ុន TADA ជាក្រុមហ៊ុនកូរ៉េដែលបាន និងកំពុងប្រតិបត្តិការម៉ូតូកង់បី នៅក្នុងប្រទេសកម្ពុជា បន្ទាប់ពី PassApp និង Grab នឹងមានគម្រោងដាក់ទុនវិនិយោគបន្ថែមជាង២០ លានដុល្លារ ដើម្បីផលិតកង់បីដោយប្រើប្រាស់អគ្គិសនី ក្នុងក្របខ័ណ្ឌអភិវឌ្ឍន៍ថាមពលស្អាតព្រមទាំងត្រៀមពង្រីក ទៅបណ្ដាប្រទេសដទៃទៀត នៅក្នុងអាស៊ានដោយផ្ដើមចេញពីកម្ពុជា។
លោកបានបន្តថា “មហិច្ចតារបស់ក្រុមហ៊ុននេះ គឺឆ្ពោះទៅដណ្ដើមទីផ្សារក្នុងសេវាដឹកជញ្ជូនកង់បីនៅកម្ពុជាយើង” ។
កាលពីខែសីហា ឆ្នាំ២០២០ ក្រុមហ៊ុនអាជីវកម្មចល័ត MVL ដែលបានដំណើរការកម្មវិធីធ្វើដំណើរ TADA នៅតំបន់អាស៊ីអាគ្នេយ៍ បានទទួលប្រាក់វិនិយោគទុនបន្ថែម៥លានដុល្លារក្នុងកិច្ចព្រមព្រៀងមួយថ្មីៗនេះ ដែលវិនិយោគដោយក្រុមហ៊ុន Central ។ មកទល់ពេលនេះ ក្រុមហ៊ុន MVL បានទទួលប្រាក់វិនិយោគទុនសរុបចំនួន ១៣,៤ លានដុល្លារហើយក្នុងរយៈពេល ២ ឆ្នាំនៃដំណើរការសេវាកម្មរបស់ខ្លួន។
MVL មានអ្នកប្រើប្រាស់រហូតដល់ទៅ៦០ម៉ឺននាក់ នៅក្នុងប្រទេសសិង្ហបុរី វៀតណាម និងកម្ពុជា ជាមួយនឹងគោលការណ៍សេវាកម្ម មិនកាត់កម្រៃជើងសារដ៏ពិសេសរបស់ខ្លួន។ MVL មានគម្រោងផលិតតុកតុកអគ្គិសនី ដើម្បីចែកចាយទៅក្នុងទីផ្សារអាស៊ីអាគ្នេយ៍ ដោយសហការជាមួយក្រុមហ៊ុន Myung-shin ដែលជាក្រុមហ៊ុនផលិតយានយន្តអគ្គិសនីមួយមានរោងចក្រផលិតនៅប្រទេសកូរ៉េខាងត្បូង។
ផ្អែកលើហិរញ្ញប្បទាននេះ MVL មានគម្រោងក្នុងការពន្លឿនផែនការរបស់ខ្លួនបន្ថែមទៀត ក្នុងការផ្គត់ផ្គង់យានយន្តអគ្គិសនី នៅក្នុងទីផ្សារអាស៊ីអាគ្នេយ៍។ MVL មានគោលបំណងចែកចាយ និងលក់រហូតដល់ ១ម៉ឺនគ្រឿងតុកតុកអគ្គិសនី នៅក្នុងប្រទេសកម្ពុជាឆ្នាំក្រោយនេះ។
លោក Kay Woo នាយកប្រតិបត្តិរបស់ MVL មានប្រសាសន៍ថា “ការមិនកាត់កម្រៃជើងសារពីអ្នកបើកបរ គឺជាអត្ថប្រយោជន៍ធំបំផុតរបស់ TADA ។ ជាមួយនឹងគោលការណ៍មិនកាត់កម្រៃជើងសារនេះ យើងនឹងអាចចែកចាយតុកតុកអគ្គិសនីនេះ យ៉ាងលឿនទៅកាន់អ្នកប្រើប្រាស់កម្មវិធីរហូតដល់ ៦០ម៉ឺននាក់ និងនាំចូលចល័តភាពបែបច្នៃប្រឌិតថ្មីមកកាន់ទីផ្សារអាស៊ីអាគ្នេយ៍” ៕
