ដោយវុត្ថា
ភ្នំពេញ៖ វិស័យឯកជនមានតួនាទីយ៉ាងសំខាន់នៅក្នុងការចូលរួមប្រយុទ្ធប្រឆាំងនឹងការរាតត្បាតជំងឺង Covid-19 ក៏ដូចជាចូលរួមកាត់បន្ថយផលវិបាកមកលើវិស័យសេដ្ឋកិច្ច តាមរយៈការផ្តល់នូវព័ត៌មានពិតនិងទាន់ពេលវេលាអំពីផលប៉ះពាល់របស់ជំងឺងកូវីដ-១៩ មកលើអាជីវកម្ម និងស្នើសុំអន្តរាគមន៍ទាន់ពេលវេលាពីរដ្ឋាភិបាល។
បណ្ឌិត តាន់ មុន្នីវណ្ណ អនុប្រធានសភាពាណិជ្ជកម្មកម្ពុជា បានលើកឡើងយ៉ាងដូច្នេះនៅក្នុង “សន្និសីទភាពជាអ្នកដឹកនាំអន្តរជាតិ” តាមប្រព័ន្ធអនឡាញកាលពីថ្ងៃទី ១៣ ខែកញ្ញា ឆ្នាំ ២០២០ម្សិលមិញនេះ ដែលរៀបចំឡើងដោយសហព័ន្ធសន្តិភាពសកល ក្រោមមូលបទថា “ឱកាសនិងក្ដីសង្ឃឹមក្នុងអំឡុងវិបត្តិសកល៖ ការពឹងផ្អែកគ្នាទៅវិញទៅមក វិបុលភាពរួម និងគុណតម្លៃសកល” ។
លោកបន្តថា កិច្ចសហការរវាងសភាពាណិជ្ជកម្មកម្ពុជាជាមួយបណ្ដាសមាគម និងសភាពាណិជ្ជកម្មអន្តរជាតិនៅកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩។ លោកបន្ថែមថា ការដាក់ចេញនូវវិធានការដ៏មានប្រសិទ្ធភាពរបស់រាជរដ្ឋាភិបាលក្នុងការទប់ស្កាត់ការរីករាលដាលជំងឺកូវីដ-១៩ នៅកម្ពុជា រួមនិងវិធានការរក្សាលំនឹងអាជីវកម្ម-ធុរកិច្ចក្នុងវិស័យដែលរងផលប៉ះពាល់ធ្ងន់ធ្ងរ។
បណ្ឌិត តាន់ មុនី្នវណ្ណ ស្នើដល់គ្រប់ភាគីពាក់ព័ន្ធឲ្យជួយគាំទ្រគ្នាទៅវិញទៅមកទៅតាមលទ្ធភាព ជាពិសេស ការផ្ទេរបច្ចេកវិទ្យា និង ការចែករំលែកការអនុវត្តល្អៗ ដើម្បីរួមគ្នាដោះស្រាយវិបត្តិជាសាកលនេះ ឆ្ពោះទៅរកវិបុលភាពរួម និងបានស្នើសុំឲ្យមានការអនុវត្តពេញលេញនូវអនុសាសន៍ដ៏មានប្រយោជន៍របស់អង្គសន្និសីទ ជាពិសេសធាតុចូលវិស័យឯកជន។
ស្ថិតក្នុងវិបត្តិការរាតត្បាតជាសកលនៃជំងឺកូវីដ-១៩ សន្និសីទភាពជាអ្នកដឹកនាំអន្តរជាតិ ត្រូវបានរៀបចំតាមប្រព័ន្ធអនឡាញជាលើកដំបូង ក្នុងគោលបំណងពិភាក្សាអំពីបញ្ហាប្រឈមនានា និងលើកឡើងជាដំណោះស្រាយជាក់លាក់ និងការអនុវត្តល្អ ដោយផ្ដោតលើគោលការណ៍៣៖ ១)ការពឹងផ្អែកគ្នាទៅវិញទៅមក ២)វិបុលភាពរួម និង ៣)គុណតម្លៃសកល៕
