ដោយ វុត្ថា
បាងកកៈ មហាវិទ្យាល័យសភាពាណិជ្ជសាស្ត្រថៃ (UTCC) គ្រោងនឹងបើកសាខារបស់ខ្លួន នៅក្នុងប្រទេសកម្ពុជានាពេលខាងមុខនេះ ដើម្បីបន្ថែមជម្រើសសិក្សាដល់និស្សិត ដែលចង់បន្តសិក្សាក្នុងប្រទេសសមាជិកអាស៊ាន និងផ្តល់អាហារូបករណ៍បន្ថែមដល់និស្សិតកម្ពុជា។
លោកបណ្ឌិត ចាក់គ្រីន ស្រ៊ីមូន (Jakarin Srimoon) អនុប្រធាន UTCC ទទួលបន្ទុកកិច្ចការអន្តរជាតិ នៅក្នុងជំនួបពិភាក្សាការងារជាមួយលោកអ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ កាលពីថ្ងៃទី១៧ ខែវិច្ឆិកា ឆ្នាំ ២០២០កន្លងមកថា គម្រោងនេះ គឺដើម្បីចូលរួមអភិវឌ្ឍន៍ធនធានមនុស្សលើវិស័យធុរកិច្ច និងពាណិជ្ជកម្មដល់និស្សិតកម្ពុជា និងមកពីតំបន់អាស៊ាន។
លោកអ៊ូក សោភ័ណ បានស្វាគមន៍គម្រោងខាងលើ និងបានស្នើប្រតិភូ UTCC សិក្សាអំពីលទ្ធភាព ពង្រីកសាខាដំបូងទៅកាន់ខេត្តសៀមរាប និងសហការជាមួយសាកលវិទ្យាល័យភូមិន្ទភ្នំពេញ ដែលមាននាយកដ្ឋានភាសាថៃ ព្រមទាំងវិទ្យាស្ថានបណ្តុះប ណ្តាលពាណិជ្ជកម្ម និងស្រាវជ្រាវ ដែលស្ថិតនៅក្រោមក្រសួងពាណិជ្ជកម្ម។
លោកឯកអគ្គរាជទូត ក៏បានវាយតម្លៃខ្ពស់ ចំពោះកិច្ចសហការលើវិស័យអប់រំរវាងប្រទេសទាំងពីរ និងបានថ្លែងអំណរគុណរាជរដ្ឋាភិបាលថៃ ដែលកន្លងមកបានផ្តល់អាហារូបករណ៍ដល់និស្សិតកម្ពុជា មកបន្តការសិក្សានៅក្នុងប្រទេសថៃ ក្រោមគម្រោងព្រះរាជឧបត្ថម្ភរបស់ព្រះអង្គម្ចាស់ក្សត្រីយ៍មហាចក្រីសិរិនថន។
មហាវិទ្យាល័យសភាពាណិជ្ជកម្មថៃ (UTCC) មានប្រវត្តិយូរបំផុតក្នុងចំណោមសាកលវិទ្យាល័យឯកជនទាំងអស់នៅក្នុងប្រទេសថៃ។ បទពិសោធន៍នៃការអប់រំរបស់មហាវិទ្យាល័យនេះ មានរយៈពេល ៦០ឆ្នាំមកហើយ ដែលផ្តល់នូវបរិយាកាសល្អប្រសើរសម្រាប់សិស្សនិស្សិត ដើម្បីបង្កើនសក្តានុពល និងរីកចម្រើនដើម្បីទទួលបាននូវឧត្តមភាពសិក្សា។
កម្មវិធីសិក្សាបែបអន្តរជាតិត្រូវបានបង្កើតឡើង ក្នុងគោលបំណងដើម្បីផ្តល់នូវការអប់រំលើការបង្កើតអាជីវកម្ម លំដាប់ពិភពលោក ដែលមានគុណភាពខ្ពស់ដល់សិស្សនៅកម្រិតបរិញ្ញាបត្រនិងក្រោយឧត្តម។ បច្ចុប្បន្ននិស្សិតមកពីជាង៤០ ប្រទេសកំពុងសិក្សានៅមហាវិទ្យាល័យនេះ ស្របតាមកម្មវិធីបណ្តុះបណ្តាលអន្តរជាតិ៕
