ដោយៈ រ៉ាណេត
ភ្នំពេញៈ ដីទំនេរដែលមានទំហំធំរហូតដល់ជាង២៦ហិកតា ស្ថិតនៅក្បែរគម្រោងអភិវឌ្ឍន៍ក្រុងរណបជិតតំបន់អរិយក្សត្រ ក្នុងឃុំតាកូវ និងឃុំស្វាយជ្រុំ ស្រុកខ្សាច់កណ្តាល ខេត្តកណ្តាល ដែលស័ក្ដិសមទៅនឹងគម្រោងអភិវឌ្ឍន៍ធំៗ ត្រូវបានប្រកាសដាក់លក់នៅក្នុងតម្លៃទាបជាងទីផ្សារ។
ប្រធានក្រុមប្រឹក្សាភិបាលក្រុមហ៊ុនភ្នាក់ងារអចលនទ្រព្យ DEYTHMEY Real Estate លោក វិន ឈុនហ៊ាត បានមានប្រសាសន៍ប្រាប់ឱ្យដឹងនៅរសៀលថ្ងៃទី១៧ ខែធ្នូ ឆ្នាំ២០២០នេះ បច្ចុប្បន្នទីផ្សារដីធ្លីនៅប៉ែកខាងកើតទន្លេរ ទល់មុខរាជធានីភ្នំពេញបានចាប់ផ្តើមកម្រើកឡើងវិញជាបណ្តើរៗ បន្ទាប់ពីដំណឹងនៃការសាងសង់ស្ពានមិត្តភាពកម្ពុជា-កូរ៉េ នឹងត្រូវអនុវត្តក្នុងពេលឆាប់ៗ រួមជាមួយនឹងព័ត៌មាននៃការបណ្តាក់ទុនវិនិយោគ និងអភិវឌ្ឍន៍បង្កើតក្រុងរណបពីសំណាក់ក្រុនហ៊ុនចិន។
លោកបានបន្តថា “ផ្តើមចេញពីការអភិវឌ្ឍវិស័យសំណង់លំនៅដ្ឋាន ចាប់ពីតំបន់អរិយក្សត្រ ដែលទាំងសំណង់បុរីធំៗប្រមាណ៥គម្រោង រួមជាមួយនឹងគម្រោងសាងសង់ខុនដូបែបទំនើបផងដែរនោះ បានជំរុញឱ្យតម្លៃដីឡើងថ្លៃជាបន្តបន្ទាប់ ជាពិសេសក្រោយដំណឹងសាងសង់ស្ពានមិត្តភាពកម្ពុជា-កូរ៉េ តភ្ជាប់ពីរាជធានីភ្នំពេញ និងខេត្តកណ្តាលនៅប៉ែកខាងកើតទន្លេនឹងត្រូវអនុវត្តក្នុងពេលឆាប់ៗខាងមុខនេះ”។
លោកបន្តថា ក្រៅពីគម្រោងអភិវឌ្ឍន៍ធំៗ ដូចបានលើកឡើងខាងលើនេះ នៅមានព័ត៌មាននិយាយថា ស្ថិតនៅក្នុងស្រុកខ្សាច់កណ្តាល នឹងមានការអភិវឌ្ឍជាក្រុងរណបបែបទំនើប ក្រោមការបណ្តាក់ទុនវិនិយោគពីសំណាក់ក្រុមហ៊ុនចិន ក្នុងតម្លៃរាប់រយលានដុល្លារ រួមជាមួយនឹងការបង្កើតហេដ្ឋារចនាសម្ព័ន្ធនានា សម្រាប់បម្រើដល់វិស័យទេសចរណ៍ផងដែរ”។
ជាមួយនឹងការលើកឡើង ពីគម្រោងអភិវឌ្ឍន៍ថ្មីៗខាងលើនេះ លោក វិន ឈុនហ៊ាត ក៏បានបញ្ជាក់ដែរថា “ភ្ជាប់ជាមួយគម្រោងទាំងនេះ បច្ចុប្បន្នមានអ្នកវិនិយោគធំៗដែលមានដើមទុនច្រើនបាននាំគ្នាទិញដី ដែលមានទំហំធំទុកអភិវឌ្ឍន៍ ឬវិនិយោគបន្តយកចំណេញនៅថ្ងៃខាងមុខ។ ជាក់ស្ដែង ដីដែលមានទំហំជាង២៦ហិកតា នៅជាប់គម្រោងសាងសង់ផ្លូវ៩០ម៉ែត្រ ដែលមាន៣០ម៉ែត្រ ទៅ៣០ម៉ែត្រមក និងមានផ្លូវទឹកសម្រាប់ទូកទេសចរណ៍នៅចំកណ្តាល៣០ម៉ែត្រ រួមជាមួយគម្រោងផ្លូវកាត់ទទឹងផ្ទៃដីទំហំ៣០ម៉ែត្រ ដែលវិនិយោគដោយរដ្ឋាភិបាល ត្រូវបានប្រកាសដាក់លក់ក្នុងតម្លៃ១០០ដុល្លារ ក្នុងមួយម៉ែត្រការ៉េ។ ដីនេះមានប្លងរឹងស្របច្បាប់ត្រឹមត្រូវ មិនជាប់ពាក់ព័ន្ធនឹងរឿងវិវាទ ហើយក៏មិនប៉ះពាល់ដីក្នុងតំបន់ការពារនោះដែរ។
សម្រាប់ព័ត៌មានលម្អិត ពីការដាក់លក់ដីទំហំជាង២៦ហិកតាខាងលើនេះ អាចទាក់ទងបានតាមទូរស័ព្ទ ៖ ០៧៧ ៦៦៩ ៣៤៥ / ០៧០ ៤៥ ០៥ ៤៥៕
