ដោយ ៖ រ៉ាណេត
ភ្នំពេញ ៖ អគារទីស្ដីការក្រសួងសាធារណការ និងដឹកជញ្ជូនថ្មី ស្ថិតនៅផ្លូវឯកឧត្តមជា សុផារ៉ា នឹងត្រូវដាក់ឱ្យប្រើប្រាស់នៅត្រឹមដើមខែមករា ឆ្នាំ២០២១ ខាងមុខនេះ បន្ទាប់ពីលទ្ធផលនៃការសាងសង់សម្រេចជិតបាន១០០ភាគរយទៅហើយ។
តាមរយៈសេចក្ដីជូនដំណឹងដែលបានផ្សព្វផ្សាយនៅព្រឹកថ្ងៃទី១៩ ខែធ្នូ ឆ្នាំ២០២០នេះ បានបញ្ជាក់ថា ក្រសួងសាធារណៈការ និងដឹកជញ្ជូននឹងធ្វើការផ្លាស់ប្តូរទីតាំងទីស្ដីការក្រសួងពីទីតាំងចាស់ដែលស្ថិតនៅសង្កាត់វត្តភ្នំ ខណ្ឌដូនពេញ រាជធានីភ្នំពេញ ទៅទីស្ដីការក្រសួងថ្មីដែលមានទីតាំងស្ថិតនៅផ្លូវ៥៩៨(ផ្លូវឯកឧត្តម ជា សុផារ៉ា)ក្នុងសង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។
ទន្ទឹមនឹងនេះ ក្រសួងសាធារណការ និងដឹកជញ្ជូនក៏បានជូនដំណឹហផងដែរថា សម្រាប់សាធារណៈជនទូទៅដែលមានបំណង់ទំនាក់ទំនងការងារផ្សេងៗសូមមេត្តាអញ្ជើញទៅកាន់ទីស្ដីការក្រសួងថ្មីចាប់ពីថ្ងៃទី៤ ខែមករា ឆ្នាំ២០២១តទៅ។
អគារទីស្ដីការក្រសួងសាធារណៈការថ្មី ដែលមានកម្ពស់១០ជាន់ ស្ថិតនៅលើទំហំដីជិត៤ហិកតា ស្ថិតនៅតាមបណ្តោយផ្លូវ ៥៩៨ (ផ្លូវឯកឧត្តម ជា សុផារ៉ា) សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ នឹងបញ្ចប់ការសាងសង់ទាំងស្រុងនៅត្រឹមចុង២០២០ឆាប់ៗខាងមុខនេះ។
អាគារទីស្ដីការថ្មីនេះ មានការសាងសង់ជាអគារ A,B,C,D,E,F,G,H,I,J សម្រាប់ធ្វើការបែងចែកទៅតាមផ្នែកនីមួយៗដើម្បីធានាបាននូវភាពងាយស្រួលក្នុងការបំពេញការងារ៕
