ដោយៈ រ៉ាណេត
ភ្នំពេញៈ ជាមួយនឹងដំណឹងល្អ នៃលទ្ធផលបូមប្រេងដំណក់ដំបូងនៅកម្ពុជា សម្ដេចតេជោហ៊ុន សែនបានប្រកាសឱ្យដឹងថា បច្ចុប្បន្នកម្ពុជាមានមាសសុទ្ធរហូតដល់៤៤តោន ៤០០គីឡូក្រាម ដែលកំពុងតម្កល់ទុកនៅក្នុងប្រទេសចំនួន៣ផ្សេងគ្នា។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍នៅព្រឹកថ្ងៃទី២៩ ខែធ្នូ ឆ្នាំ២០២០ថា បច្ចុប្បន្ននេះជាមួយនឹងភាពល្អប្រសើរ នៃកំណើនសេដ្ឋកិច្ចកម្ពុជាមានមាសសុទ្ធចំនួន៤៤តោន និង៤០០គីឡូក្រាម ដែលតម្កល់នៅធនាគារធំៗចំនួន៣។
សម្ដេចតេជោបានបញ្ជាក់ថា ក្នុងចំណោមមាសទាំងអស់របស់កម្ពុជា មានតម្កល់នៅក្នុងប្រទេសស្វីសចំនួន១២តោន និង៤០០គីឡូក្រាម ដែលជាកេរតំណែលរបស់សម្ដេចព្រះបរមរតនៈកោដ។ តម្កល់ទុកនៅធនាគារកណ្តាល នៃចក្រភពអង់គ្លេសចំនួន១៧តោន ដែលជាមាសទិញថ្មី និងមាសចំនួន១៥តោនតម្កល់នៅធនាគារជាតិនៃកម្ពុជា៕
