ដោយ ៖ រ៉ាណេត
ភ្នំពេញ ៖ នៅក្នុងខែកុម្ភៈនេះ វ៉ាក់សាំងប្រឆាំងជំងឺកូវីដចំនួន៦០ម៉ឺនដូសនឹងនាំមកកាន់កម្ពុជាចាក់ជូនប្រជាពលរដ្ឋ និងអ្នកដែលប្រឈមជួរចំនួន៣០ម៉ឺននាក់ដំបូង ខណៈដែលរាជរដ្ឋាភិបាលកម្ពុជាបានត្រៀមបម្រុងវ៉ាក់សាំងសរុបចំនួន២០លានដូសសម្រាប់ចាក់ជូនប្រជាជននៅទូទាំងប្រទេសដោយឥតគិតថ្លៃ។
សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសនៅក្នុងពិធីសម្ពោធការដ្ឋានសាងសង់រោងចក្រប្រព្រឹត្តិកម្មស្អាតបាក់ខែង ដាក់ឱ្យប្រើប្រាស់ជាផ្លូវការនូវរោងចក្រទឹកស្អាតចម្ការមននៅព្រឹកថ្ងៃទី១ ខែកុម្ភៈ ឆ្នាំ២០២១ថា រាជរដ្ឋាភិបាលកម្ពុជា នឹងត្រៀមបម្រុងវ៉ាក់សាំងចំនួន ២០លានដូស សម្រាបចាក់ជូនប្រជាពលរដ្ឋ១០លាននាក់ ដោយមិនគិតថ្លៃ ដែលក្នុងវ៉ាក់សាំងប្រឆាំងកូវីដ១៩ ទាំង២០លានដូសនេះមានជំនួយ១១លានដូសផងដែរ។
-->
សម្តេចបានគូសបញ្ជាក់ដូច្នេះថា៖ “យើងត្រូវត្រៀមបម្រុង២០លានដូស ដែលពីមុនត្រូវការដល់២៦លានសម្រាប់មនុស្ស១៣លាននាក់ ប៉ុន្តែឥឡូវនេះដោយយើងកាត់បន្ថយពី៨០ភាគរយ ដែលឥឡូវអត្រានេះមកនៅត្រឹ៦០-៧០ភាគរយ យើងត្រូវការត្រឹម២០លានដូស គឺត្រូវការចាក់១០លាននាក់ ឥឡូវក្រុមការងារវ៉ាក់សាំងកំពុងពិនិត្យ”។
សម្តេចបញ្ជាក់ថា៖ “ជើងទី១ នឹងមកដល់៦០ម៉ឺនដូស បន្ទាប់ទៅនឹងបំពេញបន្ថែម។ បន្ទាប់ទៅយើងនឹងទទួលពីខូវ៉ាក់ (COVAX) ដែលជារបស់អង្គការសុខភាពពិភពលោកចំនួន៧លានដូស បន្ថែមលើនេះយើងទិញតាមរយៈខូវ៉ាក់ ចំនួន១លានដូសទៀត អញ្ចឹងយើងបាន៩លានដូសហើយ ពិតមែនតែមិនទាន់ដល់ដៃ តែគម្រោងរបស់យើងមាន”។
សម្តេចបន្ថែមថា៖ “យើងនឹងទទួលពីអូស្រ្តាលីចំនួន៣លានដូស ដែលអូស្រ្តាលី សម្រេចផ្តល់ផ្តល់ថវិកាចំនួន២៨លានដុល្លារអាមេរិកដល់កម្ពុជា សម្រាប់រយៈពេល ២០២០-២០២៣ តាមរយៈគំនិតផ្តួចផ្តើមទទួលបានវ៉ាក់សាំងកូវីដ១៩តំបន់ ដែលកញ្ចប់ដំបូងនឹងទទួលបាននៅពាក់កណ្តាលឆ្នាំ២០២១។ ជំនួយឥតសំណងនេះ នឹងជួយឱ្យកម្ពុជាទទួលបានវ៉ាក់សាំងដែលប៉ាន់ស្មានសម្រាប់មនុស្ស១.៥លាននាក់ ដែលស្មើនឹង៣លានដូស”។
ការផ្តល់ជំនួយរបស់ចិន ខូវ៉ាក់ និងអូស្រ្តាលី បានធ្វើឱ្យកម្ពុជាទទួលបានជំនួយវ៉ាក់សាំងកូវីដ១៩សរុបចំនួន១១លានដូស ដោយកម្ពុជា នៅខ្វះ៩លានដូសទៀត ដើម្បីបានគ្រប់ចំនួន២០លានដូស។ សម្រាប់វ៉ាក់សាំង៩លានផ្សេងទៀតនេះ ត្រូវបានសម្តេចតេជោ ហ៊ុន សែន បញ្ជាក់ថា នឹងបន្តស្នើសុំជំនួយ និងទិញពីប្រទេសចិនបន្ថែម ដោយសម្តេចបានសរសេរលិខិតទៅ នាយករដ្ឋមន្រ្តីចិន រួចរាល់ហើយ ដើម្បីស្នើសុំវ៉ាក់សាំងបន្ថែមនេះ។
ជាមួយគ្នានេះសម្តេចក៏បានសរសេរលិខិតទៅនាយករដ្ឋមន្រ្តីឥណ្ឌាថែមទៀត។ ជាមួយគ្នានេះ សម្តេចក៏បានបញ្ជាក់ពីគម្រោងទិញនូវវ៉ាក់សាំងរបស់អង់គ្លេស (AstraZeneca)។ សម្តេចលើកឡើងថា បើសិនជាវ៉ាក់សាំង AstraZeneca ស្ថិតក្នុងតម្លៃត្រឹម៤-៥ដុល្លារបច្ចុប្បន្ននេះ កម្ពុជានឹងអាចមានលទ្ធភាពក្នុងការទិញផងដែរ។
សម្តេចតេជោ ហ៊ុន សែន បានថ្លែងថា ការចូលរួមបរិច្ចាគថវិការបស់ព្រះមហាក្សត្រ សម្តេចម៉ែ និងសម្បុរសជននានា ដែលមានទឹកប្រាក់សរុប៥៧លានដុល្លារនោះ នឹងអាចគ្រប់គ្រាន់សម្រាប់ការទិញវ៉ាក់សាំង។ ទោះជាយ៉ាងនេះក្តី សម្តេចតេជោក៏បានស្នើសុំជំនួយតាមរយៈអគ្គរដ្ឋទូតអឺរ៉ុប ឱ្យសហភាពអឺរ់ុបជួយផ្តល់វ៉ាក់សាំងដល់ប្រទេសកម្ពុជាផងដែរ៕
