ដោយៈ ប៊ី
អន្តរជាតិៈ ក្រុមហ៊ុនអ្នកជំនាញរបស់អង្គការ សុខភាពពិភពលោកបានបញ្ជាក់ថា វ៉ាក់សាំងជំងឺកូវីដ-១៩ Sinovac ផលិតដោយក្រុមហ៊ុនចិន មានប្រសិទ្ធភាពក្នុងការទប់ស្កាត់ ប្រឆាំងនឹងជំងឺកូវីដ-១៩ ចំពោះមនុស្សពេញវ័យអាយុក្រោម៦០ឆ្នាំពិតមែន ប៉ុន្តែខ្វះទិន្នន័យគុណភាព លើហានិភ័យនៃផលប៉ះពាល់ធ្ងន់ធ្ងរ។ នេះបើយោងតាមការចេញផ្សាយរបស់សារព័ត៌មាន Aljazeera នៅថ្ងៃទី៦ ខែឧសភា ឆ្នាំ២០២១។
ក្រុមអ្នកជំនាញខាងប្រឹក្សាយុទ្ធសាស្ត្រ (SAGE) របស់ WHO បានពិនិត្យវ៉ាក់សាំងរបស់ក្រុមហ៊ុន Sinovac ពីការសាកល្បងដំណាក់កាលទី៣ នៅក្នុងប្រទេសចិន ប្រេស៊ីល ឥណ្ឌូណេស៊ី ទួរគីនិងឈីលី។
ការវាយតម្លៃនេះត្រូវបានធ្វើឡើងភ្លាមៗ បន្ទាប់ពីក្រុមអ្នកជំនាញរបស់ស្ថាប័នជំនា ញខាងប្រឹក្សាយុទ្ធសាស្ត្រ បានបង្ហាញពីទំនុកចិត្តទាប ចំពោះទិន្នន័យដែលផ្តល់ដោយក្រុមហ៊ុនផលិតឱសថចិនមួយទៀតឈ្មោះ Sinopharm លើវ៉ាក់សាំងកូវីដរបស់ខ្លួន ទាក់ ទងនឹងហានិភ័យនៃផលប៉ះពាល់ធ្ងន់ធ្ងរចំពោះអ្នកជំងឺមួយចំនួន។
ទោះបីជាងយ៉ាងក៏ដោយ ក៏ស្ថាប័នជំនាញខាងប្រឹក្សាយុទ្ធសាស្ត្រ មានជំនឿចិត្តទៅលើសមត្ថភាពរបស់វ៉ាក់សាំងនេះ ក្នុងការការពារការឆ្លងរោគ។
ស្ថាប័នជំនាញខាងប្រឹក្សាយុទ្ធសាស្ត្រ បាននិយាយនៅក្នុងការវាយតម្លៃមួយ ដែលត្រូវបានផ្សព្វផ្សាយលើគេហទំព័ររបស់WHOថា “យើងមានទំនុកចិត្តថា វ៉ាក់សាំង Sinovac ចំនួន២ដូស គឺមានប្រសិទ្ធភាពខ្ពស់ក្នុងការការពារជំងឺកូវីដ-១៩ ចំពោះមនុស្សពេញវ័យអាយុចាប់ពី១៨ដល់៥៩ឆ្នាំ។
ស្ថាប័នជំនាញខាងប្រឹក្សាយុទ្ធសាស្ត្រ បានលើកឡើងពីគម្លាតភស្តុតាង នៃសុវត្ថិភាពក្នុងការមានផ្ទៃពោះ និងសុវត្ថិភាពការពារ ចំពោះមនុស្សវ័យចំណាស់ អ្នកដែលមានជំងឺរ៉ាំរ៉ៃនិងការវាយតម្លៃករណីមានប្រតិកម្ម៕
