ដោយៈគង់ សូរិយា
កំពតៈ ក្រោកពីដំណេកនាពេលព្រឹកព្រលឹម អ្នកអាចក្រោកមើលថ្ងៃរះ ពីបឹងហ្កាឡូដ៏ស្ងប់ស្ងាត់របស់អ្នក ហើយស្រូបយកខ្សល់អាកាសបរិសុទ្ឋពីតំបន់ឆ្នេររួច បន្ទាប់មកយើងលុបមុខ ដើម្បីស្រស់ស្រូបអាហារពេលព្រឹក មុនធ្វើដំណើរដោយថ្មើរជើង ដើម្បីគយគន់សួនច្បារដែលមានផ្កាចម្រុះព៌ណ។
ជាគំរោងដែលពោរពេញដោយគំនិតច្នៃប្រឌិត “កំពតឋានសួគ៌” ត្រៀមស្វាគមន៍ភ្ញៀវទេសចរណ៍ជាតិ អន្តរជាតិ ទៅមើលអំពិលអំពែកពេលរាត្រី ជិះទូកទស្សនាធម្មជាតិខៀវស្រងាត់ និងទឹកថ្លាយង់នាដងព្រែក។
ជាគំរោងអភិវឌ្ឍន៍ដោយឧកញ៉ានួន អក និងអ្នកវិនិយោគជាច្រើនទៀត គំរោងនេះបានច្របាញ់បញ្ចូលគ្នានូវទស្សនទានអភិវឌ្ឍន៍បែបខ្មែរ និងបរទេសរួមបញ្ចូលគ្នា ដែលធ្វើឲ្យរមណីយដ្ឋាននេះ លេចត្រដែតឡើងលើស្រុកទឹកឈូ នៃខេត្តកំពត ដែលកំពុងមានសក្តានុពលសេដ្ឋកិច្ច រមណីយដ្ឋានទេសចរណ៍ និងជំរុញការលើកកំពស់ជីវភាពរបស់ប្រជាពលរដ្ឋនៅមូលដ្ឋានផងដែរ។
កំពតឋានសួគ៌កំពុងពន្លឿន នូវការសាងសង់បឹងហ្កាឡូធ្វើពីឬស្សី ផ្ទះដែលរុំព័ទ្ឋដោយផ្កាចម្រុះព៌ណ និងបឹងហ្កាឡូជាច្រើនទៀតនៅជាប់មាត់ទឹក ដែលញាំងឲ្យបរិយាកាស និងរមណីយដ្ឋានតម្លៃរាប់រយលានដុល្លារនេះ ស័ក្តិសមនឹងឈ្មោះរបស់ខ្លួន។
ពេលវេលានៃការរីករាលដាលជំងឺកូវីដ១៩ នឹងបញ្ចប់នាពេលឆាប់ៗ ហើយវាជាពេលវេលាដ៏ប្រសើរ ដែលគ្រប់គ្នាត្រូវការលំហែរ បំបាត់ស្ត្រេសទាំងភ្ញៀវជាតិ អន្តរជាតិ។ ហេតុនេះ ការពន្លឿនគំរោងអភិវឌ្ឈន៍ នៅរមណីយដ្ឋានកំពតឋានសួគ៌ កំពុងដើរស្របគ្នានឹងផែនការថ្នាក់ជាតិផង និងពេលវេលាដែលប្រជាពលរដ្ឋកម្ពុជា នឹងចេញដើរកំសាន្តនាពេលខាងមុខផង។
លោកឧកញ៉ានួន អក បានមានប្រសាសន៍ឲ្យដឹងកាលពីពេលថ្មីៗនេះថា លោកមានគោលដៅប្រែក្លាយតំបន់នេះ ជាឋានសួគ៌ទេសចរណ៍មួយសម្រាប់ខេត្តកំពត ជាពិសេសសម្រាប់តំបន់ឆ្នេរ ដែលបាននិងកំពុងមានការអភិវឌ្ឍយ៉ាងលឿន។ លោកបន្តថា ការអភិវឌ្ឍរមណីយដ្ឋានកំពតឋានសួគ៌ មិនត្រឹមតែដើម្បីលើកកំពស់សេដ្ឋកិច្ច នៅមូលដ្ឋានប៉ុណ្ណោះទេ ប៉ុន្តែយើងក៏បាននិងកំពុងរូមចំណែកវិនិយោគ លើផលិតផលទេសចរណ៍ជាតិ ដែលរាជរដ្ឋាភិបាលចាត់ទុកជាមាសបៃតងផងដែរ។
លោកបន្តថា បច្ចុប្បន្នខេត្តកំពតមានសក្តានុពលខ្លាំងណាស់ សម្រាប់វិស័យទេសចរណ៍ និងអចលនទ្រព្យ ដោយបច្ចុប្បន្នតំបន់ជុំវិញខេត្ត ដែលមានរង្វង់៣០គីឡូម៉ែត្រ សុទ្ឋតែជាតំបន់អភិវឌ្ឈន៍ ដែលមានការវិនិយោគពីអ្នកវិនិយោគជាតិ អន្តរជាតិ៕
