ដោយៈ ម៉ាណេត
ភ្នំពេញៈ របាយការណ៍របស់ក្រុមហ៊ុន Maybank Kim Eng របស់ម៉ាឡេស៊ី បានឱ្យដឹងថា សេដ្ឋកិច្ចរបស់វៀតណាមនឹងនាំមុខគេ ក្នុងចំណោមប្រទេសបណ្តាប្រទេសសេដ្ឋកិច្ចកំពុងរីកចម្រើនទាំង៤ នៅអាស៊ានដែលគេស្គាល់ថាជា CLMV (កម្ពុជា ឡាវ មីយ៉ាន់ម៉ា និងវៀតណាម)។ នេះបើយោងតាមការចេញផ្សាយរបស់សារព័ត៌មាន Business Times នៅថ្ងៃទី២០ ខែឧសភា ឆ្នាំ២០២១។
របាយការណ៍ ដែលពិពណ៌នាអំពីការស្ទុះងើបឡើងវិញនៃតំបន់មានភាពយឺតយ៉ាវ និងមិនស្មើគ្នានេះ បានកត់សម្គាល់ថា ឥឡូវនេះ វៀតណាមនាំមុខក្នុងតំបន់ ដោយការនាំចេញ និងផលិតកម្មបានឈានដល់កម្រិតខ្ពស់ជាងកម្រិតមុនជំងឺរាតត្បាតរួចទៅហើយ។
របាយការណ៍បានឱ្យដឹងទៀតថា ប្រទេសនេះបានផ្លាស់ប្តូរវិបត្តិសេដ្ឋកិច្ចដោយជោគជ័យកាលពីឆ្នាំមុន។ ការនាំចេញបានកើនឡើង២៩,៦ភាគរយ ក្នុងរយៈពេល៤ខែដំបូង ឆ្នាំ២០២១នេះ ដោយទទួលបានកំណើនខ្លាំងលើផ្នែកគ្រឿងម៉ាស៊ីន កុំព្យូទ័រ និងគ្រឿងអេឡិចត្រូនិក។ ពេញមួយឆ្នាំ២០២០ ការនាំចេញរបស់ប្រទេសនេះកើនឡើង៦,៩ភាគរយ។
ការផ្លាស់ប្តូរទៅកន្លែងលក់រាយ និងកន្លែងកំសាន្តក៏កំពុងងើបឡើងដល់កម្រិតមុនជំងឺកូវីដ១៩ផងដែរ ទោះបីករណីថ្មីៗនេះធ្វើឱ្យឱ្យការចល័តរបស់ប្រជាជនធ្លាក់ចុះ២០ភាគរយក៏ដោយ។
ទោះជាយ៉ាងនេះក្តី ក្រុមហ៊ុន Maybank នៅតែព្យាករថា ក្នុងមួយឆ្នាំ២០២១ សេដ្ឋកិច្ចវៀតណាមនឹងមានកំណើន៦,៥ ភាគរយ។
ទោះយ៉ាងណា ក្រុមហ៊ុននឹងកាត់បន្ថយទស្សនវិស័យរបស់ខ្លួន សម្រាប់ប្រទេស៣ផ្សេងទៀត។ បច្ចុប្បន្នប្រទេសកម្ពុជាត្រូវបានរំពឹងថានឹងងើបឡើងវិញដោយខ្សោយជាង៤,២ភាគរយ។ ឡាវត្រូវបានរំពឹងថានឹងកើនឡើង៤,៨ភាគរយជំនួស៦ភាគរយ ហើយមីយ៉ាន់ម៉ាអាចចុះ៨ ភាគរយ ធ្លាក់ចុះពី៣ភាគរយ។
ខណៈប្រទេសកម្ពុជា និងឡាវកំពុងប្រយុទ្ធប្រឆាំងនឹងរលកឆ្លងថ្មីនៃជំងឺកូវីដ១៩ និងប្រទេសមីយ៉ាន់ម៉ាកំពុងប្រឈមនឹងភាពចលាចលនយោបាយរបស់ខ្លួន ដែលអាចជំរុញឱ្យប្រទេសនេះធ្លាក់ចូលក្នុងវិបត្តិសេដ្ឋកិច្ចជ្រៅ។
ដូច្នេះសេដ្ឋកិច្ចមីយ៉ាន់ម៉ាត្រូវបានរំពឹងថានឹងធ្លាក់ចុះខ្លាំង ខណៈវៀតណាម បន្ទាប់មកប្រទេសកម្ពុជា និង ឡាវ កំពុងទទួលបាននូវកំណើនក្នុងការនាំចេញ និងផលិតកម្មនៅឆ្នាំនេះ ខណៈតម្រូវការលើពិភពលោកបានកើនឡើង៕
