ដោយៈវឌ្ឈនៈ
ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជានឹងអញ្ជើញចូលរួមកិច្ចប្រជុំដ៏មានសារៈសំខាន់មួយនៅចុងខែឧសភានេះ ដែលកិច្ចប្រជុំនេះរៀបចំដោយលោកម៉ូន ជេអ៊ីនប្រធានាធិបតីនៃសាធារណៈរដ្ឋកូររ៉េ។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ដែលបានចេញផ្សាយនាព្រឹកថ្ងៃទី២៨ ឧសភានេះបានឱ្យដឹងថា តបតាមការអញ្ជើញរបស់លោកមូន ចេអ៊ីន ប្រធានាធិបតីនៃសាធារណរដ្ឋកូរ៉េ សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញចូលរួមកិច្ចប្រជុំកំពូលលើកទី២ នៃភាពជាដៃគូសម្រាប់ការអភិវឌ្ឍបៃតង និងគោលដៅសកលឆ្នាំ២០៣០ ដែលនឹងប្រព្រឹត្តិទៅតាមប្រព័ន្ធវីដេអូ នៅថ្ងៃទី៣១ ឧសភា ២០២១នៅទីក្រុងសេអ៊ូល សាធារណរដ្ឋកូរ៉េ។
៉
តាមសេចក្តីប្រកាសដដែលនេះថា “កិច្ចប្រជុំនេះបានលើកយកប្រធានបទ ការស្ដារបៃតងឡើងវិញប្រកបដោយបរិយាប័ន្ន ដើម្បីសម្រេចបាននូវអព្យាក្រឹតភាពកាបូន”។
សម្ដេចតេជោហ៊ុនសែន នឹងអញ្ជើញថ្លែងសុន្ទរកថាលើប្រធានបទ ការស្ដារបៃតងឡើងវិញ ប្រកបដោយបរិយាប័ន្នពីជំងឺកូវីដ១៩ នៅក្នុងសម័យប្រជុំកិច្ចសន្ទនារបស់ថ្នាក់ដឹកនាំ ដោយផ្ដោតទៅលើទិដ្ឋភាពសំខាន់ៗមួយចំនួន រួមមាន ១) ភាពចាំបាច់ក្នុងការកែសម្រួលគោលនយោបាយនិងធនធាន ដើម្បីអាចជម្នះដោយជោគជ័យ លើជំងឺរាតត្បាតកូវី១៩ ទី២ ផលប៉ះពាល់អវិជ្ជមាននៃការប្រែប្រួលអាកាសធាតុទៅលើសន្តិសុខ និងការអភិវឌ្ឍសេដ្ឋកិច្ច សង្គម និងទី៣ សារសំខាន់នៃការស្ដារបៃតងឡើងវិញ សម្រាប់ការអភិវឌ្ឍប្រកបដោយចីរភាព ។
