ដោយៈ ប៊ី
ព្រះសីហនុៈ គម្រោងសាងសង់ផ្លូវក្រុងទាំង៣៤ខ្សែ នៅខេត្តព្រះសីហនុ ជិតរួចរាល់១០០ភាគរយហើយ ខណៈគម្រោងនេះកំពុងលើកមុខមាត់ខេត្តព្រះសីហនុ ថែមមួយកម្រិតទៀត។ នេះបើយោងតាមការរាយការណ៍ពីវឌ្ឍនភាពការងារស្ថាបនាផ្លូវក្រុងទាំង៣៤ខ្សែ របស់ក្រសួងរៀបចំដែនដី នគរូបនីយកម្ម និងសំណង់។
ឧបនាយករដ្ឋមន្ត្រីជា សុផារ៉ារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិ គ្រប់គ្រង និងអភិវឌ្ឍតំបន់ ឆ្នេរសមុទ្រកម្ពុជា (គ.អ.ឆ.ក.) នៅថ្ងៃទី២៨ ខែឧសភា ឆ្នាំ២០២១នេះ បានដឹកនាំក្រុមការងារចុះពិនិត្យវឌ្ឍនភាពការងារស្ថាបនាផ្លូវក្រុងទាំង ៣៤ខ្សែ នៅខេត្តព្រះសីហនុ ដែលជាគម្រោងរបស់រាជរដ្ឋាភិបាល អនុវត្តដោយ គ.អ.ឆ.ក.។
-->
ការចុះពិនិត្យវឌ្ឍនភាពការងារស្ថាបនាផ្លូវក្រុងទាំង ៣៤ខ្សែនេះ មានការចូលរួមជាមួយ លោក ថោង ខុន រដ្ឋមន្រ្តីក្រសួង ទេសចរណ៍ និងជាអនុប្រធានអចិន្រ្តៃយ៍ គ.អ.ឆ.ក. លោក សាយ សំអាល់ រដ្ឋមន្រ្តីក្រសួងបរិស្ថាន និងជាអនុប្រធាន គ.អ.ឆ.ក លោក គួច ចំរើន អភិបាលខេត្តព្រះសីហនុ និងសមាជិក គ.អ.ឆ.ក. រួមទាំងមន្រ្តីជំនាញផងដែរ។
ការងារស្ថាបនាផ្លូវក្រុងទាំង ៣៤ខ្សែនេះ គិតមកដល់បច្ចុប្បន្នទទួលបានលទ្ធផលដូចតទៅ៖
*ការងារចាក់បេតុងផ្លូវសម្រេចបាន ១០០%។
*ការងារអ៊ុតកៅស៊ូបេទីម កម្រាស់ ៧០មីលីម៉ែត្រ សម្រេចបាន ១០០%។
*ការងារគំនូសចរាចរណ៍សម្រេចបាន ១០០%។
*ការងារដំឡើងផ្លាកសញ្ញាចរាចរណ៍ សម្រេចបាន ១០០%។
*ការងារដំឡើងបង្គោលភ្លេីងបំភ្លឺផ្លូវសម្រេចបាន ១០០%។
*ការងារដាំដើមឈេីសម្រេចបាន ១០០%
*ការងារបន្ទប់ទឹកសាធារណៈសម្រេចបាន ៩៣%
*ការងារបំពាក់កាមេរ៉ាសុវត្ថិភាពសម្រេចបាន ៦០%
*ការងារធ្វើផ្លូវប្របឆ្នេរអូរឈើទាលកាត់តាមពយតាមូង សម្រេចបាន៩៥%
*ការងារស្ថាបនាស្ថានីយ៍ប្រព្រឹត្តិកម្មទឹកកខ្វក់ទី២ សម្រេចបាន ១០០%។
*ការងារស្ថាបនាស្ថានីយ៍ប្រព្រឹត្តិកម្មទឹកកខ្វក់ទី១ សម្រេចបាន ៨៤%។
និងកំពុងពិនិត្យលទ្ធភាពស្ថាបនាស្ថានីយ៍ប្រព្រឹត្តិកម្មទឹកកខ្វក់ទី៣។
ដើម្បីលើកកម្ពស់សោភណភាព និងសម្រួលដល់ការធ្វើចរាចរណ៍នៅក្នុងព្រះសីហនុ ដែលទីគោលដៅទេសចរណ៍ និងសេដ្ឋកិច្ចដ៏សំខាន់របស់កម្ពុជានៅភាគនិរតីនោះ រាជរដ្ឋាភិបាលបានសម្រេចទម្លាក់កញ្ចប់ថវិកាជាតិរហូតដល់ទៅប្រមាណជា៣០០លានដុល្លារអាមេរិក ដើម្បីសាងសង់ផ្លូវធំតូចសរុបចំនួន៣៤ខ្សែ មានប្រវែងផ្លូវសរុប ៨២.១៤៥គីឡូម៉ែត្រ នៅក្នុងក្រុងព្រះសីហនុ។ ផ្លូវទាំង៣៤ខ្សែ បានចាប់ផ្តើមបើកការដ្ឋានសាងសង់ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី១៦ ខែវិច្ឆិកា ឆ្នាំ២០១៩៕
