ដោយៈ ម៉ាណេត
ភ្នំពេញៈ បើទោះបីជាវិបត្តិកូវីដ១៩ មិនទាន់បង្ហាញភាពធូរស្បើយយ៉ាងក្តី ក្រុមហ៊ុន Flash Express របស់ថៃបានបង្ហាញមហិច្ឆតារបស់ខ្លួន ដោយប្រកាសថា ក្រុមហ៊ុនត្រៀមឈានជើងចូលទីកម្ពុជា មីយ៉ាន់ម៉ា និងវៀតណាម នៅ២០២២។ នេះបើយោងតាមការចេញផ្សាយ Deal Street Asia នៅថ្ងៃទី១ ខែមិថុនា ឆ្នាំ២០២១។
លោក Komsan Lee នាយកប្រតិបត្តិ និងស្ថាបនិកក្រុមហ៊ុន Flash Group បានថ្លែងថា យើងនឹងផ្តោតលើផែនការដើមរបស់ពួកយើង ក្នុងការចាប់ផ្តើមពង្រីកអាជីវកម្មនៅក្នុងតំបន់អាស៊ីអាគ្នេយ៍។
លោកបានថ្លែងបន្តថា ស្ថានភាពវិបត្តិកូវីដ១៩ អាចចោទជាបញ្ហាប្រឈមសម្រាប់យើង ប៉ុន្តែយើងនឹងបន្តធ្វើដំណើរឆ្ពោះទៅមុខ ជាមួយនឹងការរំពឹងទុកលើផែនការអភិវឌ្ឍន៍ដ៏រឹងមាំក្នុងត្រីមាសទី៤ ឆ្នាំ២០២១ បន្ទាបពីអាជីវកម្មមួយចំនួនរបស់យើងត្រូវបាននៅតំបន់អាស៊ីអាគ្នេហ៍។
ទោះបីជាយ៉ាងក៏ដោយ លោកមិនបានបង្ហាញទុនវិនិយោគ ដែលក្រុមហ៊ុនរបស់លោកបានត្រៀមបោះទុនក្នុងប្រទេសកម្ពុជា មីយ៉ាន់ម៉ា និងវៀតណាមនោះទេ។
ក្រុមហ៊ុន Flash Express ដែលបង្កើតឡើងនៅឆ្នាំ២០១៨ ផ្តោតលើសេវាកម្មដឹកជញ្ជូន E-Commerce ហើយត្រូវបានទទួលថាជាក្រុមហ៊ុនដឹកជញ្ជូនឯកជនធំបំផុតលំដាប់ទី២ របស់ប្រទេសថៃ បន្ទាប់ក្រុមហ៊ុន Kerry Thailand៕
