ដោយៈ គង់ សូរិយា
ភ្នំពេញៈ ច្រកទ្វារព្រំដែនទ្វេរភាគីជាមួយប្រទេសជិតខាងចំនួន៩ នឹងត្រូវដំឡើងជាច្រកទ្វារអន្តរជាតិនាពេលខាងមុខ ដើម្បីសម្រួលការដឹកជញ្ជូននិងលំហូរពាណិជ្ជកម្ម។
យោងតាមឯកសារក្រសួងមហាផ្ទៃបានឲ្យដឹងថា កម្ពុជាមានច្រកទ្វារព្រំដែនសម្រាប់ទំនាក់ទំនងក្រៅប្រទេសចំនួនសរុប៨៣កន្លែង ដែលមានទាំងច្រកទ្វារព្រំដែនគោក ព្រំដែនទឹក និងអាកាស។
មានច្រកទ្វារព្រំដែនចំនួន៩កន្លែង ជាប់ខេត្តចំនួន៩ ដែលរដ្ឋាភិបាលកំពុងសម្រេចត្រៀមដំឡើង ទៅជាច្រកព្រំដែនអន្តរជាតិនៅពេលខាងមុខ ដើម្បីសម្រួលការធ្វើពាណិជ្ជកម្ម និងការធ្វើដំណើរឆ្លងកាត់របស់ភ្ញៀវទេសចរណ៍ជាតិនិងអន្តរជាតិ។
ច្រកទ្វារទាំង ០៩ កន្លែងដែលគ្រោងដំឡើងជាច្រកទ្វារអន្តរជាតិរួមមាន ទី១ ច្រកទ្វារទ្វេភាគី ដា (ខេត្តត្បូងឃ្មុំ) ទី២ ច្រកទ្វារតំបន់ សំរោង (ខេត្តស្វាយរៀង) ទី៣ ច្រកទ្វារ ស្ទឹងបត់ (ខេត្តបន្ទាយមានជ័យ) ទី៤ ច្រកទ្វារតំបន់ ជប់គគីរ (ខេត្តឧត្តរមានជ័យ) ទី៥ច្រកទ្វារតំបន់ អានសេះ (ខេត្តព្រះវិហារ) ទី៦ ច្រកទ្វារតំបន់ ផ្លូវ ៥៦ (ថ្មដា) (ខេត្តពោធិ៍សាត់) ទី៧ ច្រកទ្វារទ្វេភាគី ជ្រៃធំ (ខេត្តកណ្តាល) ទី៨ ច្រកទ្វារ ម៉ឺនជ័យ (ខេត្តព្រៃវែង) និងទី៩ កំពង់ផែ កែប (ខេត្តកែប)៕
