ដោយៈសុខុម
ប៉េកាំង: ផ្លូវល្បឿនលឿនប៉េកាំង-អ៊ូយូមឈី (Beijing-Urumqi Expressway) ដែលជាផ្លូវល្បឿនលឿន ឆ្លងកាត់វាលខ្សាច់វែងបំផុតក្នុងពិភពលោក បានបើកឱ្យធ្វើចរាចរណ៍ពេញលេញកាលពីថ្ងៃពុធ ទី៣០ ខែមិថុនា កន្លងទៅ បន្ទាប់ពីកំណាត់ចុងក្រោយនៃផ្លូវនេះត្រូវបានដាក់ឱ្យដំណើរការ។
យោងតាមការចុះផ្សាយរបស់សារព័ត៌មានចិនXinhuanet បានឱ្យដឹងថា ផ្លូវល្បឿនលឿន ដែលតបភ្ជាប់រដ្ឋធានីប៉េកាំង និងទីក្រុងអ៊ូយូមឈី (Urumqi) ក្នុងតំបន់ភ្នំស្វយ័តស៊ីនជាំង (Xinjiang) ទីដែលជនជាតិភាគតិចវីហ្គួរ រស់នៅនេះមានប្រវែងសរុប២.៨០០គីឡូម៉ែត្រ ដោយក្នុងនោះប្រវែងជាង៥០០គីឡូម៉ែត្រ ឆ្លងកាត់វាលខ្សាច់រហោស្ថាន។
ក្រៅពីក្រុងប៉េកាំង និងតំបន់ភ្នំស្វយ័តស៊ីនជាំង ផ្លូវល្បឿនលឿននេះក៏ឆ្លងកាត់ខេត្តចំនួន៤ផ្សេងទៀតផងដែរ រួមមានខេត្តហឺប៉ី (Hebei) ខេត្តសានស៊ី (Shanxi) តំបន់ស្វយ័ត Inner Mongolia និងខេត្តកានស៊ូ (Gansu)។
ផ្លូវនេះឆ្លងកាត់ចន្លោះពីក្រុងអ៊ូយូមឈី និងទីក្រុងប៉េកាំង ចម្ងាយ១.៣០០គីឡូម៉ែត្រ ហើយវាជាផ្លូវល្បឿនលឿនបំផុតនៅទូទាំងប្រទេសចិន។
កំណាត់ផ្លូវល្បឿនលឿននេះ ដែលស្ថិតក្នុងភូមិសាស្ត្រតំបន់ថ្នាក់ខេត្តផ្សេងៗទៀត បានបើកឱ្យដំណើរការហើយ។
ដោយសារតែបរិស្ថានធម្មជាតិ មិនអំណោយផល និងស្ថានភាពភូមិសាស្ត្រ មានលក្ខណៈស្មុគស្មាញ កំណាត់ឆ្លងកាត់វាលខ្សាច់ នៃផ្លូវល្បឿនលឿននេះក្នុងតំបន់ភ្នំស្វយ័តស៊ីនជាំង ត្រូវបានបង្ហើយចុងក្រោយគេបង្អស់៕