ដោយៈគង់ សូរិយា
ភ្នំពេញៈ រដ្ឋាភិបាលកម្ពុជាកំពុងបង្កើនមហិច្ឆតា ក្នុងការវិនិយោគលើហេដ្ឋារចនាសម្ព័ន្ឋ ដោយគ្រោងនឹងសាងសង់ផ្លូវប្រវែងជាង១០០គីឡូម៉ែត្រ តភ្ជាប់រវាងខេត្តក្រចេះ និងខេត្តកំពង់ធំ។
គំរោងសាងសង់ហេដ្ឋារចនាសម្ព័ន្ឋនេះ ទំនងនឹងធ្វើស្របគ្នាជាមួយនឹងការសាងសង់ស្ពានឆ្លងកាត់ទន្លេមេគង្គ ប្រចែងជាង១៧០០ម៉ែត្រតភ្ជាប់រវាងក្រុងក្រចេះ ទៅកាន់ផ្នែកម្ខាងទៀត នៃខេត្តក្រចេះផងដែរ។
ប្រធានមន្ទីរសាធារណការ និងដឹកជញ្ជូន ខេត្តក្រចេះ លោកសាំង ប៊ុនថេង បានមានប្រសាសន៍ឲ្យដឹងនាព្រឹកថ្ងៃទី៨ កក្កដានេះថា ក្រៅពីគម្រោងស្ថាបនាស្ពានឆ្លងកាត់ទន្លេមេគង្គ ក្រុមបច្ចេកទេសកំពុងចុះសិក្សា ក្នុងការស្ថាបនាផ្លូវជាតិមួយខ្សែទៀតប្រវែងជាង១០០ គីឡូម៉ែត្រពីខេត្តក្រចេះទៅខេត្តកំពង់ធំ។លោកបន្តថា ផ្លូវជាតិថ្មីមួយខ្សែនេះគឺផ្លូវ ៦០បេ។ បច្ចុប្បន្នក្រុមវិស្វករចិនកំពុងចុះសិក្សា ដែលគ្រោងធ្វើចាប់ពីស្ពានទន្លេមេគង្គថ្មីខេត្តក្រចេះ ទៅដល់កំពង់ថ្មក្នុងខេត្តកំពង់ធំ។
តាមការសិក្សាផ្លូវជាតិថ្មីមួយខ្សែនេះ សាងសង់កាត់តាមស្រុកព្រែកប្រសព្វរហូតដល់កំពង់ថ្មខេត្តកំពង់ធំ មានប្រវែងជាង១៣០គីឡូម៉ែត្រ។
លោកសាំង ប៊ុនថេង បានបន្តថា គម្រោងស្ថាបនាផ្លូវជាតិថ្មីនេះ រួមទាំងស្ពានឆ្លងទន្លេមេគង្គខេត្តក្រចេះ នឹងរួមចំណែកជួយដល់ការអភិវឌ្ឍខេត្តក្រចេះ សម្រួលការដឹកជញ្ជូននិងការធ្វើដំណើររបស់ភ្ញៀវទេសចរ ពីតំបន់ភាគកណ្ដាលមកតំបន់ភាគឦសាន ដែលនឹងរុញកំណើនការអភិវឌ្ឍន៍ និងលើកស្ទួយជីវភាពពលរដ្ឋតាមមូលដ្ឋាន។
ស្ពានឆ្លងទន្លេមេគង្គខេត្តក្រចេះ គ្រោងបើកការដ្ឋានសាងសង់នៅក្នុងឆ្នាំ២០២១ ក្រោយការសិក្សាបានបញ្ចប់។ នេះបើយោងតាម ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាសបើកសម្ពោធមជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់ កាលពីថ្ងៃទី ៤ កុម្ភៈកន្លងមក។
ស្ពានឆ្លងកាត់ទន្លេមេគង្គទីមួយរបស់ខេត្តក្រចេះ មានប្រវែង១៧៦១ម៉ែត្រ សាងសង់ឡើងក្រោមថវិកាកម្ចីសម្បទាន ពីសាធារណរដ្ឋប្រជាមានិតចិន ប្រើប្រាស់រយៈពេលចន្លោះពី២ ទៅ៣ឆ្នាំក្នុងការសាងសង់។
ទីកន្លែងសាងសង់ស្ពានឆ្លងកាត់ទន្លេមេគង្គខេត្តក្រចេះ កំណត់ទីតាំងរួចហើយ នៅតែរង់ចាំថ្ងៃបើកការដ្ឋានតែប៉ុណ្ណោះ៕
