ដោយៈគង់ ម៉ាលីន
ភ្នំពេញៈ ជាមួយនឹងដំណើរវិវត្តន៍រីកចម្រើនលើបច្ចេកវិទ្យា ក្នុងវិស័យហិរញ្ញវត្ថុ ធនាគារហត្ថាបានវិនិយោគទឹកប្រាក់៥លានដុល្លារ លើបច្ចេកវិទ្យានេះដើម្បីសម្រួលដល់ការទូទាត់សាច់ប្រាក់របស់អតិថិជន។
ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៣ កក្កដានេះថា បច្ចេកវិទ្យាបាននិងកំពុងដើរតួនាទីកាន់តែមានសារៈសំខាន់ឡើង ក្នុងវិស័យហិរញ្ញវត្ថុ ហេតុនេះទើបយើងបង្កើនការវិនិយោគលើផ្នែកនេះ ដើម្បីសម្រួលដល់ការប្រើប្រាស់សេវាកម្មនានារបស់ធនាគារ ក៏ដូចជាជួយសម្រូលការប្រើប្រាស់សំរាប់អតិថិជន។
-->
លោកបន្តថា “យើងបាននិងកំពុងពង្រីក និងសម្រួលប្រព័ន្ឋទូទាត់របស់យើងតាមរយៈSmart Brand ជាអ្វីនៃការទូទាត់តាមប្រព័ន្ឋឌីជីថល ដែលកាន់តែមានភាពពេញនិយ មក្នុងសម័យកាលបច្ចុប្បន្ន”។ លោកបន្តថា “ជាមួយនឹងការសាងសង់អាគារការិយាល័យកណ្តាលកំពស់២២ជាន់ លើផ្លូវ៦០ម៉ែត្រ បាននិងកំពុងឆ្លុះបញ្ចាំងពីស្ថាប័នរបស់យើងមានសុខភាពកាន់តែល្អ”។
លោកឧកញ៉ាបានបន្តថា ជាមួយនឹងការពង្រីកនូវការទូទាត់តាមប្រព័ន្ឋឌីជីថល ការរពង្រីកការដាក់ម៉ាស៊ីនATM របស់យើងក៏បានធ្វើព្រមជាមួយគ្នាផងដែរ ដើម្បីធ្វើយ៉ាងណាឲ្យអតិថិជនរបស់យើង អាចប្រើប្រាស់សេវាកម្មបានកាន់តែលឿន មានប្រសិទ្ឋភាព និងអាចទុកចិត្តបាន។
លោកបន្តថា “គោលដៅរបស់យើងចង់ឲ្យអតិថិជន ប្រើប្រាស់ឥណទានរបស់យើងបានកាន់តែច្រើន មានប្រសិទ្ឋភាព និងប្រើប្រាស់សេវាកម្មរបស់យើងកាន់តែលឿន និងទទួលបានជោគជ័យ”។
យោងតាមរបាយការណ៍របស់ធនាគារជាតិនៃកម្ពុជាបានឲ្យដឹងថា ការទូទាត់សាច់ប្រាក់តាមប្រព័ន្ឋឌីឌីថលនៅកម្ពុជា បានកើនឡើង៣០ភាគរយ ក្នុងត្រីមាសទី១ឆ្នាំនេះ។ ជាមួយគ្នានេះធនាគារជាតិនៃកម្ពុជា បានលើកទឹកចិត្តប្រជាពលរដ្ឋឲ្យទូទាត់សាច់ប្រាក់តាមប្រព័ន្ឋឌីជីថល ក្នុងអំឡុងវិបត្តិកូវីដ១៩ ដើម្បីកាត់បន្ថយហានិភ័យនៃការរីករាលដាលជំងឺនេះ៕
